ବାସ୍ତବରେ ଏମାନେ ହିଁ ମୋଦି ସେନା: ଦେଖନ୍ତୁ ଭିଡ଼ିଓ…

ନୂଆପଡ଼ା (ଓଡ଼ିଶା ରିପୋର୍ଟର): ପରିବେଶ ସ୍ୱଚ୍ଛ ରଖିବା ପାଇଁ ସ୍ୱଚ୍ଛ ଭାରତ ମିଶନ୍‌ କାର୍ଯ୍ୟକାରି କରାଯାଇଛି। ଏଥିପାଇଁ ବିଜ୍ଞାପନ ମାଧ୍ୟମରେ ବହୁ ପ୍ରଚାର ପ୍ରସାର କରାଯାଉଛି। ଏପରିକି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ତାଙ୍କ ମନ୍ତ୍ରିମଣ୍ଡଳର ମନ୍ତ୍ରୀମାନେ ବିଭିନ୍ନ ସ୍ଥାନରେ ସଫେଇ କରିଥିଲେ। ଏହା ସତ୍ତ୍ୱେ ସ୍ୱଚ୍ଛ ଭାରତ ମିଶନ୍‌ ସଫଳ ହୋଇଥିବା ଦେଖିବାକୁ ମିଳିନାହିଁ। ଓଡ଼ିଶାରେ ଯେଉଁଠି ଦେଖିବେ ଗଦା ହୋଇଛି କୁଢ଼ କୁଢ଼ ଅଳିଆ। ମୋଦିଙ୍କର ଏହି ସ୍ୱପ୍ନକୁ ନୂଆବର୍ଷରେ ସାକାର କରିବାକୁ ଯାଇଛନ୍ତି ଦିବ୍ୟାଙ୍ଗ। ବାଡ଼ି ଧରି ଚାଲୁଥିଲେ ମଧ୍ୟ ଗାଁ ପରିବେଶକୁ ପରିଷ୍କାର କରିଛନ୍ତି। ନୂଆପଡ଼ା ଜିଲ୍ଲାରେ ୨୦ ଜଣ ଦିବ୍ୟାଙ୍ଗ ଗ୍ରାମୀଣ ପରିବେଶ ସ୍ୱଚ୍ଛ କରି ଅନ୍ୟ ପାଇଁ ଉଦାହରଣ ସୃଷ୍ଟି କରିଛନ୍ତି। ସତେ ଯେପରି ଲାଗୁଛି ଦିବ୍ୟାଙ୍ଗମାନେ ଆଜି ମୋଦି ସେନାର ସଦସ୍ୟ ହୋଇଯାଇଛନ୍ତି।

ପାଦ ଅଛି କିନ୍ତୁ ଚାଲି ପାରୁନାହାନ୍ତି। କିଏ ହ୍ୱିଲ୍ ଚେୟାରରେ ତ ଆଉ କିଏ ବାଡ଼ି ସାହାରାରେ ଚାଲୁଛି। ଆଉ କିଏ ଦେଖି ପାରୁନି ତ ଆଉ କିଏ ଶୁଣି ପାରୁନି। କିନ୍ତୁ ସମସ୍ତଙ୍କ ଲକ୍ଷ୍ୟ ନିଜ ପରିବେଶକୁ ସ୍ୱଚ୍ଛ ଓ ସୁନ୍ଦର ରଖିବା। ସମସ୍ତେ ହାତରେ ଝାଡ଼ୁ ଓ କୁଦାଳ ଧରି ଲାଗି ପଡ଼ିଛନ୍ତି ଗାଁ ଦାଣ୍ଡ ସଫେଇରେ। ଦିବ୍ୟାଙ୍ଗଙ୍କ ଏଭଳି ଦୃଷ୍ଟାନ୍ତମୂଳକ କାର୍ଯ୍ୟ ଦେଖିବାକୁ ମିଳିଛି ନୂଆପଡା ଜିଲ୍ଲା କୋନାବିରା ଗାଁରେ। ନୂଆବର୍ଷରେ ପ୍ରାୟ ୨୦ଜଣ ଦିବ୍ୟାଙ୍ଗ ଏକାଠି ହୋଇ ଗାଁର ରାସ୍ତାଘାଟ, ନାଳ ନର୍ଦ୍ଦମା, ସ୍କୁଲ ପଡିଆ ଆଦି ସଫା କରୁଛନ୍ତି।

ଦିବ୍ୟାଙ୍ଗ ଗୁଞ୍ଜରୀ ମାଝୀ କହିଛନ୍ତି-“ଆମେ ଦେଖିପାରୁନୁ ବୋଲି ଲୋକେ ଅନ୍ଧ କହୁଛନ୍ତି। ଏମାନେ କିଛି କାମ କରିପାରିବେ ନାହିଁ। ଲୋକଙ୍କ ମନରୁ ଏହି ଭ୍ରାନ୍ତ ଧାରଣା ଦୂର ହେବା ଦରକାର। ଆମେ ସବୁ କରିପାରିବୁ ବୋଲି ପ୍ରମାଣିତ କରିଦେଇଛୁ।”

ଦିବ୍ୟାଙ୍ଗ ବେଲମତୀ ମାଝୀ କହିଛନ୍ତି-“ଗାଁରେ ରାସ୍ତା ଅପରିଷ୍କାର ହୋଇଛି। ଏଥିରୁ ମୁକ୍ତି ପାଇବା ପାଇଁ ଗ୍ରାମୀଣ ପରିବେଶ ସଫା କରୁଛୁ।”

କେବଳ ଏଇ ଗାଁ ନୁହେଁ, ଆଗାମୀ ଦିନରେ ସଫେଇ କାର୍ଯ୍ୟକ୍ରମ ଅନ୍ୟ ଗାଁରେ ମଧ୍ୟ କରାଯିବ। ନୂଆବର୍ଷରେ କୋନାବିରା ଗାଁରୁ ଆରମ୍ଭ ହୋଇଛି ଏହି ଅଭିଯାନ। ହାତରେ ଝାଡ଼ୁ ଧରି ଗାଁଦାଣ୍ଡ ସଫେଇ କରିବା ସହ ଏମାନେ ପ୍ଲାକାର୍ଡ ଧରି ଲୋକଙ୍କୁ ସଚେତନ ମଧ୍ୟ କରୁଛନ୍ତି।

Previous ArticleNext Article

Send this to a friend