ସୁନା ଦର ଆକାଶ ଛୁଆଁ, ତଥାପି ଭିଡ଼

ଭୁବନେଶ୍ୱର(ଓଡ଼ିଶା ରିପୋର୍ଟର): ରାତି ପାହିଲେ ଅକ୍ଷୟ ତୃତୀୟା। ବିଶ୍ୱାସ ରହିଛି ଅକ୍ଷୟ ତୃତୀୟାରେ ସୁନା କିଣିଲେ ଘରକୁ ଲକ୍ଷ୍ମୀ ଆସନ୍ତି। ତେବେ ବର୍ତ୍ତମାନ ସୁନା ଦର ଲୋକଙ୍କ ଆଗ୍ରହକୁ ଟିକେ ପାଣିଚିଆ କରିଦେଇଛି। ତଥାପି ଗ୍ରାହକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଛି। ଲୋକେ ଗହଣା କିଣିବା ପାଇଁ ଦୋକାନରେ ଭିଡ଼ ଜମେଇଛନ୍ତି। ଅନ୍ୟପକ୍ଷରେ ଗ୍ରାହକଙ୍କୁ ଆକୃଷ୍ଟ କରିବା ଲାଗି ଗହଣା ଦୋକାନ ଗୁଡ଼ିକ ମଧ୍ୟ ବିଭିନ୍ନ ମନଲୋଭା ସ୍କିମ୍ ଘୋଷଣା କରିଛନ୍ତି।

ଏବେ ଭୁବନେଶ୍ୱରରେ ୨୨ କ୍ୟାରେଟ ସୁନାର ଦର ରହିଛି, ୧୦ ଗ୍ରାମକୁ ୩୦ ହଜାର ୯୮୦ ଟଙ୍କା। ସେହିପରି ୨୪ କ୍ୟାରେଟ ସୁନା ଦର ୩୩ ହଜାର ୮୦୦ ଟଙ୍କା। ଉଚ୍ଚ ଦର ସତ୍ତ୍ୱେ ଘରକୁ ଲକ୍ଷ୍ମୀ ଆସିବା ବିଶ୍ୱାସକୁ ନେଇ ସୁନା କିଣିବାକୁ ଦୋକାନରେ ପହଞ୍ଚୁଛନ୍ତି ଗ୍ରାହକ।

କାହିଁକି ବଢ଼ିଛି ସୁନା ଦର: ବିଭିନ୍ନ କାରଣକୁ ନେଇ ଏବେ ଅନ୍ତର୍ଜାତୀୟ ବଜାରରେ ସୁନା ଦର ବୃଦ୍ଧି ପାଇଚି। ଚୀନ-ୟୁଏସ୍‌ଏ ଟ୍ରେଡ୍ ଓ୍ୱାର୍ ଏବଂ ସିରିୟା ଯୁଦ୍ଧ ଭଳି ଘଟଣାକୁ ନେଇ ବିଦେଶୀ ବଜାରରେ ସୁନାର ଦର ଉଚ୍ଚ ରହିଛି। ତେବେ ଗ୍ରାହକଙ୍କୁ ଆକୃଷ୍ଟ କରିବା ଲାଗି ବ୍ୟବସାୟୀ ବିଭିନ୍ନ ଅଫର ଦେଉଛନ୍ତି। ମେକିଂ ଚାର୍ଜେସ ଉପରେ ୫୦ ପ୍ରତିଶତ ଛାଡ଼, ଲକି-ଡ୍ର ମାଧ୍ୟମରେ ଘର, କାର ଏବଂ ଟଙ୍କା ଓ ଅନ୍ୟାନ୍ୟ ଉପହାର ଯୋଜନା ମାଧ୍ୟମରେ ଗ୍ରାହକଙ୍କୁ ଆକର୍ଷିତ କରାଯାଉଛି।

୨୦୧୦ ଅକ୍ଷୟ ତୃତୀୟାରେ ସୁନା ଦର ଥିଲା ୧୬ହଜାର ୧୬୭ ଟଙ୍କା। ତେବେ ତା’ପର ବର୍ଷ ସୁନା ଦର ହଠାତ୍ ୨୧ ହଜାର ୭୩୬ ଟଙ୍କାଙ୍କୁ ବୃଦ୍ଧି ପାଇଥିଲା। ତା’ ପରଠାରୁ ଦର କ୍ରମାଗତ ବଢ଼ି ଚାଲିଛି। ଗତବର୍ଷ ସୁନା ୧୦ ଗ୍ରାମ ପ୍ରତି ୨୮ ହଜାର ୮୬୧ ଟଙ୍କା ରହିଥିବା ବେଳେ ଏ ବର୍ଷ ୩୦ ହଜାର ଟପିଛି।

Previous ArticleNext Article

Send this to a friend