ପାଣି ପାଇଁ ତାତିଲେ ମହିଳା: ପିଏଚ୍‌ଡି ଅଫିସରେ ଭାଙ୍ଗିଲେ ମାଠିଆ

bolangiri

ବଲାଙ୍ଗିର (ସସ୍ମିତା ସାହୁ): ଏପ୍ରିଲ ଆରମ୍ଭରୁ ଅସହ୍ୟ ତାତି। ଗ୍ରୀଷ୍ମ ପ୍ରବାହ ସହ ଝାଞ୍ଜି ପବନରେ ହଇରାଣ ହରକତ ହେଉଛନ୍ତି ରାଜ୍ୟବାସୀ। କିଛି ସ୍ଥାନରେ ଦୁଇଦିନ ହେବ କାଳବୈଶାଖୀ ହୋଇଥିଲେ ବି ଗରମ ଓ ଗୁଳୁଗୁଳି କମିବାର ନାଁ ନେଉନାହିଁ। ରାଜ୍ୟର ଅନ୍ୟ ସହର ପରି ବଲାଙ୍ଗିରବାସୀ ମଧ୍ୟ ଅସହ୍ୟ ତାତିରେ ହନ୍ତସନ୍ତ ହେଉଛନ୍ତି। ବଲାଙ୍ଗିରରେ ତାପମାତ୍ରା ଏବେ ୪୦ ଡିଗ୍ରୀ ଛୁଇଁଛି। ଗରମ ସାଙ୍ଗକୁ ଲୋକଙ୍କ ଉପରେ ଦାଉ ସାଜିଛି ପିଇବା ପାଣି ସମସ୍ୟା ସବୁବର୍ଷ ପରି ବଲାଙ୍ଗିର ସହରର ବିଭିନ୍ନ ପଡାରେ ଜଳ ସମସ୍ୟା ଆରମ୍ଭ ହୋଇଯାଇଛି। କେଉଁଠି ପାଇପ ଯୋଗେ ଜଳ ଯୋଗାଣ ବନ୍ଦ ହୋଇଯାଇଛି ତ ଆଉ କେଉଁଠି ଟ୍ୟାଙ୍କର ଆସୁନାହିଁ। ବାରମ୍ବାର ଅଭିଯୋଗ ପରେ ମଧ୍ୟ କୌଣସି ପଦକ୍ଷେପ ନିଆଯାଉନାହିଁ। ଏପରି ସ୍ଥିତିରେ ରାସ୍ତାକୁ ଓହ୍ଲାଇଛନ୍ତି ସହରର ଶତାଧିକ ମହିଳା। ଆମ ଆଦମୀ ପାର୍ଟିର ଡାକରାରେ ଆଜି ମହିଳାମାନେ ଜନସ୍ୱାସ୍ଥ୍ୟ ବିଭାଗ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ଘେରାଉ କରିବା ସହ ମାଠିଆ ଭାଙ୍ଗି ପ୍ରତିବାଦ କରିଛନ୍ତି

ସୂଚନାଯୋଗ୍ୟ, ସହରର ଶାସ୍ତ୍ରୀନଗର, ସୂର୍ଯ୍ୟନଗର, ବରପାଲି ପଡା, ଆଦର୍ଶ ପଡା ସହ ଅନ୍ୟ ସ୍ଥାନରେ ପାନୀୟଜଳ ସମସ୍ୟା ଉତ୍କଟ ହେବାରେ ଲାଗିଛି। ଏହି ଅଞ୍ଚଳକୁ ପାଇପ ଯୋଗେ ଜଳ ଯୋଗାଣ ୭ ଦିନରେ ଥରେ ହେଉଥିବା ବେଳେ ଟ୍ୟାଙ୍କରେ ପାଣି ଯୋଗାଯାଉ ନଥିବା ଅଭିଯୋଗ ହେଉଛି।

ସହରର ୨୧ଟି ୱାର୍ଡରେ ପୌରସଂସ୍ଥା ଏବଂ ଜନସ୍ୱାସ୍ଥ୍ୟ ବିଭାଗ ଦ୍ୱାରା ପାନୀୟ ଜଳ ଯୋଗାଣ କରାଯାଉଛି ହେଲେ ୯ଟି ୱାର୍ଡକୁ ଏପର୍ଯ୍ୟନ୍ତ ପାଇପ୍ ଯୋଗେ ଜଳ ଯୋଗାଣ ହୋଇନାହିଁ। ଏହି ୯ଟି ୱାର୍ଡର ଲୋକେ ନଳକୂପ ଓ ପାଣି ଟ୍ୟାଙ୍କର ଉପରେ ନିର୍ଭର କରୁଛନ୍ତି ଏହି ଅଞ୍ଚଳରେ ଅଧିକାଂଶ ନଳକୂପ ଅଚଳ ହୋଇଯାଇଥିବା ବେଳେ ଟ୍ୟାଙ୍କର ଯୋଗେ ଜଳଯୋଗାଣ ଠିକ୍‌ ଭାବେ କରାଯାଉନାହିଁ। ଯେଉଁ ନଳକୂପ କାମ କରୁଛି, ସେଠୁ ପାଣି ନେବାକୁ ଲୋକେ ଘଣ୍ଟା ଘଣ୍ଟା ଧରି ଲାଇନ୍‌ରେ ଛିଡା ହେଉଛନ୍ତି।

ଗ୍ରୀଷ୍ମ ଋତୁ ଆସିଲେ ଏହି ସମସ୍ୟା ଆରମ୍ଭ ହେଉଛି। ପୌର ପ୍ରଶାସନ ସବୁବର୍ଷ ଦେଖୁଛି, ହେଲେ ଏହାର ସମାଧାନ ପାଇଁ କୌଣସି ପଦକ୍ଷେପ ନେଉନାହିଁ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ବାରମ୍ବାର ଦାବି ସତ୍ତ୍ୱେ ପ୍ରଶାସନ ଆଖିବୁଜି ବସିଥିବା ପ୍ରତିବାଦରେ ମହିଳାମାନେ ଆଜି ଏକ ଶୋଭାଯାତ୍ରାରେ ବାହାରି ଜନସ୍ୱାସ୍ଥ୍ୟ ବିଭାଗ ଅଫିସ ଘେରାଉ କରିଥିଲେ।

ସହରରେ ଶୀଘ୍ର ପାନୀୟ ଜଳ ସମସ୍ୟାର ସମାଧାନ କରା ନଗଲେ, ଆଗାମୀ ଦିନରେ ବଲାଙ୍ଗିର ବନ୍ଦ ଡାକରା ଦିଆଯିବ ବୋଲି ଆମ ଆଦମୀ ପାର୍ଟି ଜିଲ୍ଳା ସଂଯୋଜକ ଚେତାବନୀ ଦେଇଛନ୍ତି।

Previous ArticleNext Article

Send this to a friend