କଥା କଥାକେ ପ୍ରେସ୍‌ମିଟ୍ କରୁଥିବା ବିଜେପି ଏବେ କାହିଁକି ଚୁପ୍?

ଭୁବନେଶ୍ୱର,(ଓଡ଼ିଶା ରିପୋର୍ଟ):ଅ ବିଜେପୁର ଝଟ୍‌କାପରେ ନୂଆ ରଣନୀତି ସନ୍ଧାନରେ ରାଜ୍ୟ ବିଜେପି।   ତେବେ ଏଣିକି ଗଣମାଧ୍ୟମକୁ ନ ଜଣାଇ ଗୁପ୍ତ ଭାବେ ମିଶନ ୧୨୦କୁ ଆଗକୁ ନେବ ଦଳ ।  ଦୋହଲିଯାଇଥିବା ନେତାଙ୍କ ମନୋବଳକୁ ଦମ୍ଭ ଦେବାକୁ  ଏପ୍ରିଲ ମାସରେ ଓଡିଶା ଆସିପାରନ୍ତି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା।   ଖାସ୍ କରି ତ୍ରିପୁରା ଫଳାଫଳର ଫଣ୍ଡାକୁ ଓଡିଶାରେ ଆପଣାଇବାକୁ ରୋଡମ୍ୟାପ କରିପାରେ ବିଜେପି।

ପ୍ରତିଦିନ ସରକାରଙ୍କ ବିରୋଧରେ ନୂଆ  ନୂଆ ଅଭିଯୋଗ କରି ନବୀନଙ୍କୁ ଟାର୍ଗେଟ କରୁଥିଲା ବିଜେପି। ହେଲେ ବିଜେପୁର ଝଟ୍‌କା ପରେ ଏବେ ଖାଁ ଖାଁ ରାଜ୍ୟ କାର୍ଯ୍ୟାଳୟ।  କଥା କଥାକେ ପ୍ରେସମିଟ କରୁଥିବା ପଦ୍ମ ଦଳ କ୍ୟାମ୍ପରେ ଏବେ ଅସମ୍ଭବ ନିରବତା ।  ମାଟ୍ରିକ୍ ପ୍ରଶ୍ନପତ୍ର ଭାଇରାଲ, ବିଜେଡି କର୍ପୋରେଟରଙ୍କ ଡି ଲିଙ୍କ ଓ ବିଜେଡିରେ ସୌମ୍ୟ ସାମନ୍ତଙ୍କ ଯୋଗଦାନ ଘଟଣା ଓ ପ୍ରସଙ୍ଗ ଥିଲେ ବି  ବି ସତେ ଯେମିତି ନିରବି ଯାଇଛି ବିଜେପି।   ତେବେ ଚର୍ଚ୍ଚା ହେଉଛି, ଏ ଶୂନଶାନ୍ ପରିବେଶ ପଛରେ ନୂଆ ରଣନୀତିର ବ୍ଲୁ ପ୍ରିଣ୍ଟ ତୟାର କରୁଛି କି ଦଳ ?  ହେଭିୱେଟ ଜୁଏଲ ଓରାମ ବି ଏକଥାକୁ ସ୍ୱୀକାର  କରୁଛନ୍ତି ।  ବିଜେପୁର ରଣନୀତି ଲିକ ହେବାରୁ ଫାଇଦା ନେଲା ସରକାରୀ ଦଳ।

ତେଣୁ ବିଫଳତାରୁ ଶିକ୍ଷା ଲାଭ କରି ଆଗକୁ ବଢିବା ପାଇଁ ବିଜେପି ଏଥର ନୂଆ  ଷ୍ଟାଇଲ ଓ ନୂଆ ଅନ୍ଦାଜରେ ମିଶନ ୧୯କୁ ଆଗକୁ ନେବ ବୋଲି ଜୁଏଲ୍ କହୁଛନ୍ତି।   ତେବେ ପ୍ରଶ୍ନ ଏଥିପାଇଁ ଦଳର ଚେହେରା ବଦଳିବ କି?  ବଦଳୁଥିବା ରଣନୀତିରେ ନୂଆ ନେତା ସାମିଲ ହେବେ କି? ତାକୁ ନେଇ ଚାଲିଚି ଚର୍ଚ୍ଚା। ସେପଟେ ତ୍ରିପୁରାରେ ଶୂନରୁ ଉଠି ସରକାର କରିବା ପଛର ରଣନୀତିକୁ ଓଡିଶା ପାଣିପାଗରେ ବି ଆପଣାଇ ପାରେ ବିଜେପି।   ନର୍ଥ-ଇଷ୍ଟର ଏହି ବାମଗଡ଼ରେ ପଦ୍ମ ଫୁଟାଇବାରେ ମୁଖ୍ୟ ଭୁମିକା ଥିଲା ସୁନୀଲ ଦେଓଧର ଓ ରାମମାଧବଙ୍କ ପରି ନେତାଙ୍କର । ଚର୍ଚ୍ଚା ହେଉଛି ଏମିତି ଜଣେ ନେତାଙ୍କୁ ବି ଓଡିଶାର ଫୁଲ ଟାଇମ ଦାୟିତ୍ୱ ଦେଇ ମିଶନ ୧୯କୁ ସଫଳ କରିବାକୁ ଯୋଜନା କରୁଛି ବିଜେପି ।

ପଞ୍ଚାୟତ ନିର୍ବାଚନ ବେଳେ ଦଳ ପାଇଁ ରଣନୀତି କରିଥିବା ସୌଦାନ ସିଂ ଓ ଅରୁଣ ସିଂଙ୍କ  ସହ ଦଳ ରାମମାଧବଙ୍କ ପରି ସଂଗଠକଙ୍କୁ ଓଡ଼ିଶା ଦାୟିତ୍ୱ ଦେଇପାରେ । ଏପଟେ ବିଜେପୁର ଝଟ୍‌କା ପରେ ନେତା ଓ କର୍ମୀଙ୍କ ଦୋହଲି ଯାଇଥିବା ମନୋବଳକକୁ ଦମ୍ଭ ଦେବାକୁ ଖୁବ ଶୀଘ୍ର ଓଡିଶା ଆସିପାରନ୍ତି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ।

Previous ArticleNext Article

Send this to a friend