ତୃତୀୟ ମହଲାକୁ ନିରବରେ ସମର୍ଥନ ଦେଲେ ନବୀନ, କହିଲେ…

ଭୁବନେଶ୍ୱର (ଓଡ଼ିଶା ରିପୋର୍ଟର): ତୃତୀୟ ମହଲା ବିବାଦ ପ୍ରସଙ୍ଗରେ ଏଣ୍ଟ୍ରି ମାରିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଥାର୍ଡ ଫ୍ଲୋର ଉପରକୁ ଅଙ୍ଗୁଳି ଉଠାଉଥିବା ନେତାଙ୍କୁ ଟାର୍ଗେଟ୍ କରି ପରୋକ୍ଷରେ ସେମାନଙ୍କର ଅନ୍ୟ କିଛି ପ୍ରସଙ୍ଗ ନଥିବା କହିଛନ୍ତି। ଏଥିସହ ସାଂସଦ ବୈଜୟନ୍ତ ପଣ୍ଡାଙ୍କ ପ୍ରସଙ୍ଗରେ ଯାହା ଠିକ ହେବ ସେ ନେଇ ନିଷ୍ପତ୍ତି ନିଆଯିବ ବୋଲି କହିଛନ୍ତି ମୁଖ୍ୟମନ୍ତ୍ରୀ। ସେପଟେ ମୁଖ୍ୟମନ୍ତ୍ରୀଙ୍କ ମନ୍ତବ୍ୟ ଉପରେ କଡ଼ା ପ୍ରତିକ୍ରିୟା ରଖିଛନ୍ତି ସାଂସଦ ବୈଜୟନ୍ତ।

ତୃତୀୟ ମହଲାର ଅଣଓଡ଼ିଆ ଅଫିସରଙ୍କ ଉପରେ ସାଂସଦ ବୈଜୟନ୍ତ ସିଧାସଳଖ ଆକ୍ରମଣ କରିଥିଲେ। ଏହା ପରେ ବିଜେଡି ଓ ପାଓ୍ୱାର କରିଡରରେ ସୃଷ୍ଟି ହୋଇଥିଲା ହୃଦ୍‌କମ୍ପନ। ପ୍ରଥମଥର ପାଇଁ ଏହି ପ୍ରସଙ୍ଗରେ କାଉଁଣ୍ଟର କରିଛନ୍ତି ଖୋଦ ମୁଖ୍ୟମନ୍ତ୍ରୀ ତଥା ଦଳ ସୁପ୍ରିମୋ ନବୀନ ପଟ୍ଟନାୟକ। ନାଁ ନନେଇ ତୃତୀୟ ମହଲାକୁ ଟାର୍ଗେଟ୍ କରିଥିବା ନେତାଙ୍କୁ ନବୀନ କହିଛନ୍ତି- “ପ୍ରସଙ୍ଗ ନଥିଲେ ସେମାନେ ମୋ କାର୍ଯ୍ୟାଳୟ ଉପରେ ଏଭଳି ଆକ୍ରମଣ କରିଥାନ୍ତି। ଏଥିରେ କୌଣସି ନୂତନତ୍ୱ ନାହିଁ।”

ବୈଜୟନ୍ତଙ୍କ ମନ୍ତବ୍ୟ ପ୍ରସଙ୍ଗରେ ସାମ୍ୱାଦିକଙ୍କ ପ୍ରଶ୍ନରେ ନବୀନ କହିଛନ୍ତି-“ଯାହା ଠିକ୍ ତାହା କରାଯିବ। ମୁଁ ଉନ୍ନୟନ କାର୍ଯ୍ୟରେ ବ୍ୟସ୍ତ, ଲୋକେ ଏହା ଜାଣିଛନ୍ତି।”

ଦଳୀୟ କର୍ମକର୍ତ୍ତାଙ୍କ ବିରୋଧ ଓ ଛକାପଞ୍ଝା ଭିତରେ ଗତକାଲି ବୁହାଳୋରେ ପାନୀୟ ଜଳ ପ୍ରକଳ୍ପର ଉଦ୍‌ଘାଟନ କରିଥିଲେ ସାଂସଦ ବୈଜୟନ୍ତ ପଣ୍ଡା। ସେଠାରେ ବୈଜୟନ୍ତ ଥାର୍ଡ ଫ୍ଲୋରକୁ ନେଇ ଦେଇଥିବା ମନ୍ତବ୍ୟ ପରେ ବିବାଦ ତେଜିବାରୁ ଆଜି ସାମ୍ନାକୁ ଆସିଥିଲେ ମୁଖ୍ୟମନ୍ତ୍ରୀ। ହେଲେ ମୁଖ୍ୟମନ୍ତ୍ରୀ ଦେଇଥିବା ବୟାନ ଉପରେ ଆଜି ଟ୍ୱିଟ୍ କରି ତୀବ୍ର ପ୍ରତିକ୍ରିୟା ରଖିଛନ୍ତି ସାଂସଦ ବୈଜୟନ୍ତ ପଣ୍ଡା। ଏଭଳି ମନ୍ତବ୍ୟ ମୋତେ ମର୍ମାହତ କରିଥିବା ଉଲ୍ଲେଖ କରି ଛାଡ଼ିଛନ୍ତି ଏକାଧିକ ପ୍ରଶ୍ନବାଣ। ବିଜୁ ବାବୁ ଯେବେ ଭ୍ରଷ୍ଟ ବାବୁଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରୁଥିଲେ, ସେତେବେଳେ ତାଙ୍କ ପାଖରେ କଣ ଅନ୍ୟ କିଛି ଇସ୍ୟୁ ନଥିଲା?

ମାହାଙ୍ଗା ପ୍ରସଙ୍ଗକୁ ସାମ୍ନାରେ ରଖି ବୈଜୟନ୍ତ ପ୍ରଶ୍ନ କରିଛନ୍ତି, ଯଦି କିଛି ଇସ୍ୟୁ ନଥିଲା, ମାହାଙ୍ଗାରେ କାହିଁକି ୫ ପ୍ଲାଟୁନ ପୋଲିସ ମୁତୟନ କରାଯାଇଥିଲା? ଏପରିକି ମାହାଙ୍ଗାରେ ସେ କଣ ବିଶୃଙ୍ଖଳା ସୃଷ୍ଟି କରୁଥିଲେ, ତାଙ୍କ କାମ ଶାନ୍ତିପୂର୍ଣ୍ଣ ନଥିଲା ବୋଲି ମଧ୍ୟ ପ୍ରଶ୍ନ କରିଛନ୍ତି। ଏଥିସହ ମୋ ନେତାଙ୍କୁ ପୁଣି ଥରେ ଏହାର ତର୍ଜମା କରିବାକୁ ଅନୁରୋଧ କରୁଛି ବୋଲି ବୈଜୟନ୍ତ ଟ୍ୱିଟ୍ କରିଛନ୍ତି।

Previous ArticleNext Article

Send this to a friend