ହୁସିଆର ଗାଡ଼ି ଚାଳକ! ଓଡ଼ିଶାରେ ଲୋକଙ୍କୁ ଠକୁଛନ୍ତି ୮୬ଟି ପେଟ୍ରୋଲ ପମ୍ପ

ଭୁବନେଶ୍ୱର (ଓଡ଼ିଶା ରିପୋର୍ଟର): ପେଟ୍ରୋଲ ପମ୍ପରେ ତେଲ ଠକୁଛନ୍ତି ଡିଲର। ଗ୍ରାହକଙ୍କ ଆଖିରେ ଆଙ୍ଗୁଳି ଗେଞ୍ଜି ବେଧଡ଼କ ଭାବେ ଚାଲିଛି ଏହି ଲୁଟ୍‌। ଟାଙ୍କିରେ ଚିପ୍ ବା ଇଲେକ୍‌ଟ୍ରୋନିକ୍ସ ଯନ୍ତ୍ରାଂଶ ଲଗେଇ ଠକେଇ କରୁଛନ୍ତି ପମ୍ପ ଡିଲର। ଦେଉଥିବା ଟଙ୍କାର ମୂଲ୍ୟ ଅନୁସାରେ ପେଟ୍ରୋଲ କିମ୍ବା ଡିଜେଲ୍ ମିଳୁନାହିଁ। ଓଡ଼ିଶାର ୮୬ଟି ପେଟ୍ରୋଲ ପମ୍ପରେ ଏମିତି ତେଲ ଠକେଇ ଯନ୍ତ୍ରାଂଶ ଲାଗିଥିବାର ଖୁଲାସା କରୁଛି ପେଟ୍ରୋଲିୟମ ମନ୍ତ୍ରଳାୟ। ଏନେଇ ଗତ ମାସରେ ରାଜ୍ୟ ସରକାରଙ୍କୁ ଚିଠି ଲେଖିଛି ପେଟ୍ରୋଲିୟମ ମନ୍ତ୍ରଳାୟ। ଯାହାକୁ ନେଇ ଗ୍ରାହକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।

ଚିଠିରେ ଉଲ୍ଲେଖ ରହିଛି-ଉତ୍ତରପ୍ରଦେଶରେ ପେଟ୍ରୋଲ ପମ୍ପରେ ଚିପ୍ ଲଗାଇ ଠକୁଥିବା ରାକେଟ୍‌ରେ ଗିରଫ ହୋଇଥିବା ଜଣେ ଅଭିଯୁକ୍ତ ଓଡ଼ିଶାରେ ୮୬ଟି ପେଟ୍ରୋଲ ପମ୍ପରେ ଟାମ୍ପର୍ଡ ଇକ୍ୟୁପ୍‌ମେଣ୍ଟ ଲଗାଇଥିବା ମାନିଛି। ତେବେ ଏହାକୁ ରୋକିବା ପାଇଁ କି କାର୍ଯ୍ୟାନୁଷ୍ଠାନ ନେଇଛନ୍ତି ରାଜ୍ୟ ସରକାର?

ଯୋଗାଣ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ର କହିଛନ୍ତି-“ବର୍ତ୍ତମାନ ସମଗ୍ର ରାଜ୍ୟରେ ଥିବା ସମସ୍ତ ପେଟ୍ରୋଲ ପମ୍ପରେ ଚଢ଼ାଉ କରାଯିବ। ଯେଉଁ ପେଟ୍ରୋଲ ପମ୍ପରେ ଠକେଇ ହୋଇଥିବା ଜଣାପଡ଼ିବ, ସେନେଇ ସରକାରଙ୍କୁ ଅବଗତ କରାଯିବ। ଏହାଛଡ଼ା ସେମାନଙ୍କ ଲାଇସେନ୍ସ ରଦ୍ଦ କରିବାକୁ ସୁପାରିସ୍‌ କରିବୁ।”

ଉତ୍ତରପ୍ରଦେଶରେ ପେଟ୍ରୋଲ ପମ୍ପରେ ତେଲ ଠକେଇ ରାକେଟ୍ ପଦାକୁ ଆସିବା ପରେ ଗତ ମେ’ ମାସରେ ସନ୍ଦେହରେ ଓଡ଼ିଶାର ବିଭିନ୍ନ ପେଟ୍ରୋଲ ପମ୍ପ ଉପରେ ମାପ ଓ ଓଜନ ବିଭାଗ ପକ୍ଷରୁ ଚଢ଼ାଉ ହୋଇଥିଲା। ହେଲେ କିଛି ତଥ୍ୟ ପାଇନଥିଲା। ଏପରିକି ଗତ ଅଗଷ୍ଟ ୨୪ ଓ ୨୫ ତାରିଖରେ ନିର୍ଦ୍ଦିଷ୍ଟ ସୂଚନା ଆଧାରରେ ସମ୍ବଲପୁରର ଦୁଇଟି ପେଟ୍ରୋଲ ପମ୍ପରେ ଚଢ଼ାଉ ହୋଇଥିଲା। ହେଲେ ସେଠାରେ ମଧ୍ୟ ଟାମ୍ପରିଂ ଚିହ୍ନଟ ହୋଇପାରି ନଥିଲା। ଏଠି ପ୍ରଶ୍ନ ଉଠୁଛି ପୂର୍ବରୁ ଚଢ଼ାଉ ଗନ୍ଧ ବାରି ନକଲି ଜାଗାରେ ପୁଣି ଅସଲି ଚିପ୍ ଲଗାଇ ଦେଉ ନାହାନ୍ତି ତ ଅସାଧୁ ଡିଲର?

ସେପଟେ ତେଲ କମ୍ପାନୀଙ୍କ କହିବା କଥା ପମ୍ପରେ ଲାଗିଥିବା ଇଲେ୍ରୋନିକ୍ସ ଇକ୍ୟୁପମେଣ୍ଟ ଠିକ୍ ଅଛି ନା ନାହିଁ ତାକୁ ଚେକ୍ କରିବା କାମ ରାଜ୍ୟ ମାପ ଓ ଓଜନ ବିଭାଗର। ତେବେ ନିର୍ଦ୍ଦିଷ୍ଟ ତ୍ରୁଟି ନଜରକୁ ଆସିଲେ ସଂପୃକ୍ତ ଡିଲରଙ୍କ ବିରୋଧରେ ନିଶ୍ଚିତ କାର୍ଯ୍ୟାନୁଷ୍ଠାନ ନିଆଯିବ।

Previous ArticleNext Article

Send this to a friend