ବମିଖାଲ ପରି ଆଉ ୪ଟି ସ୍ଥାନରେ ଏମିତି ଚାଲିଛି ଓଭରବ୍ରିଜ୍‌, କାମ ମାନକୁ ନେଇ ଉଠିଲା ପ୍ରଶ୍ନ

ଭୁବନେଶ୍ୱର (ଓଡ଼ିଶା ରିପୋର୍ଟର): ବମିଖାଲ ଓଭରବ୍ରିଜ୍ ଭୁଶୁଡିବା ଘଟଣା ଠିଆ କରିଛି ଅନେକ ପ୍ରଶ୍ନ। ଖାସ୍ କରି କାମର ମାନ ସନ୍ଦେହ ଘେରକୁ ଆସିଛି। ଅଧିକାଂଶ ସ୍ଥାନରେ ଡେଡଲାଇନ୍‌ ବହୁ ଆଗରୁ ସରିଯାଇଥିଲେ ମଧ୍ୟ କାମ ବହୁ ପଛରେ ପଡିଛି। ଠିକା ସଂସ୍ଥାମାନେ ମନଇଚ୍ଛା କାମ ଚଳାଇଥିବା ବେଳେ ପ୍ରଶାସନ ନିରବଦ୍ରଷ୍ଟା ସାଜିଥିବା ଅଭିଯୋଗ ହେଉଛି। ଜଟଣୀ, ସମ୍ବଲପୁର ଓ ରାଉରକେଲାରେ ଏପରି ମନ୍ଥର ଗତିରେ ଚାଲିଥିବା କାମକୁ ନେଇ ଓଡ଼ିଶା ରିପୋର୍ଟର ସ୍ପେଶାଲ ରିର୍ପୋଟ।

jatani
                                                                                     ଜଟଣୀ

ଜଟଣୀ ଫ୍ଲାଏ ଓଭର: ଖୋର୍ଦ୍ଧା-ପୁରୀ ରୋଡର ଜଟଣୀ ଫ୍ଲାଏ ଓଭର। ୨୦୧୫ରେ ଟେଣ୍ଡର କରାଯାଇ କାମ ଆରମ୍ଭ ହୋଇଥିଲା। ଚଳିତବର୍ଷ ଏହା ସରିବା କଥା। ହେଲେ ଠିକା ସଂସ୍ଥା ପଣ୍ଡା ଇନଫ୍ରା ଏଯାଏଁ ମାତ୍ର ୧୦ ପ୍ରତିଶତ କାମ ସାରିଛି। ଗୁରୁତ୍ୱପୂର୍ଣ୍ଣ କଥା ହେଲା ଡେଡଲାଇନ ୨୦୧୮ ଯାଏଁ  ବଢାଯାଇଛି, ହେଲେ ଏହି ନିର୍ଦ୍ଧାରିତ ସମୟରେ କାମ ସରିବା ନେଇ ସନ୍ଦେହ ଦେଖାଦେଇଛି। ଅନ୍ୟପକ୍ଷରେ କାମର ମାନକୁ ନେଇ ଆପତ୍ତି ଉଠାଇଛି ଜଟଣୀ ବ୍ୟବସାୟୀ ସଂଘ। ଫ୍ଲାଏଓଭର ଲାଗି ଆପ୍ରୋଚ୍ ରୋଡ ନିର୍ମାଣ ହୋଇନାହିଁ। ୪୦ ଫୁଟ୍ ବଦଳରେ ୨୦ ଫୁଟ୍ ତଳୁ ପିଲର ଉଠାଯାଇଥିବା ସଂଘ ଅଭିଯୋଗ କରିଛି।

ଜଟଣୀ ବ୍ୟବସାୟୀ ସଂଘ ସଭାପତି ସୁଦର୍ଶନ ସୁନ୍ଦରାୟ କହିଛନ୍ତି- “ନୟାଗଡ଼ର ପୂର୍ବତନ ମନ୍ତ୍ରୀ ଏଥିରେ ପାର୍ଟନର ଅଛନ୍ତି। ୱାର୍କ ସେକ୍ରେଟାରୀ ତାଙ୍କ ସାଙ୍ଗ। ଏଠି ତଳଠାରୁ ଉପର ପର୍ଯ୍ୟନ୍ତ ସମସ୍ତଙ୍କୁ ଟଙ୍କା ଦେଇ ସେ ଦୁର୍ନୀତି କରୁଛନ୍ତି। ନିମ୍ନମାନର କାମ ହେଉଛି। ୬୦ ଫୁଟ ବଦଳରେ ୨୦ ଫୁଟରେ ଫାଇଲିଂ କରାଯାଇଛି। ଏହାର ସିସିଟିଭି ଫୁଟେଜ ଆମ ପାଖରେ ଅଛି। ପ୍ରଧାନମନ୍ତ୍ରୀଙ୍କଠାରୁ ଆରମ୍ଭ କରି ମୁଖ୍ୟମନ୍ତ୍ରୀ ଭିଜିଲାନ୍ସ ଓ କ୍ରାଇମବ୍ରାଞ୍ଚକୁ ଆମେ ଅଭିଯୋଗ କରିଛୁ। ହେଲେ କିଛି ଲାଗ ହୋଇନାହିଁ।”

smb
                                                                                         ସମ୍ବଲପୁର

ସମ୍ବଲପୁର ଓଭରବ୍ରିଜ୍‌: ସମ୍ବଲପୁରରେ ମଧ୍ୟ ସମାନ ଅବସ୍ଥା। ଏଠି ବି ଓଭରବ୍ରିଜ୍ କାମ ନେଇଛି ପଣ୍ଡା ଇନଫ୍ରା। ଏଠାରେ ମଧ୍ୟ ମନ୍ଥର ଗତିରେ କାମ ଚାଲିଛି। ବିନା ସେଫଟି ମେଜର୍ସରେ କାମ ଚାଲିଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି। ନିର୍ମାଣ ସାମଗ୍ରୀ ଏଣେତେଣେ ପଡି ରହିଥିବା ବେଳେ ଲୋକେ ଅତି ଅସୁରକ୍ଷିତ ଭାବେ ଯାତାୟତ କରୁଥିବା ଅଭିଯୋଗ ହୋଇଛି।

ସ୍ଥାନୀୟ ବାସିନ୍ଦା ସୁବ୍ରତ କୁମାର ପଣ୍ଡା କହିଛନ୍ତି- “ଭୁବନେଶ୍ୱରରେ ବ୍ରିଜ୍‌ ଭୁଶୁଡି ପଡ଼ିବା ଘଟଣାରେ ପଣ୍ଡା ଇନଫ୍ରା ବିରୋଧରେ କାର୍ଯ୍ୟାନୁଷ୍ଠାନ ନିଆଯିବା ଉଚିତ। ରାଜ୍ୟ ସରକାର ତା’ର ଲାଇସେନ୍‌ ରଦ୍ଦ କରି ତାକୁ ଲାଇଫ ଟାଇମ୍‌ ପାଇଁ ବନ୍ଦ କରାଯିବା ଦରକାର।

ସମ୍ବଲପୁର ଅତିରିକ୍ତ ଜିଲ୍ଲାପାଳ ତ୍ରିଲୋଚନ ମାଝି କହିଛନ୍ତି- “କାମର ମାନ ପରୀକ୍ଷା କରିବାକୁ ଦାବି ହୋଇଛି। ଏନେଇ ଜିଲ୍ଲାପାଳଙ୍କୁ ଅବଗତ କରାଯିବା ସହ ଉଚିତ ପଦକ୍ଷେପ ନିଆଯିବ।”

rkl
                                                                                   ରାଉରକେଲା

ରାଉରକେଲା: ରାଉରକେଲାରେ ନିର୍ମାଣ ହେଉଛି ଦୁଇଟି ଫ୍ଲାଏଓଭରର। ସମାନ ହାଲ୍ ତାରିଣୀ ମନ୍ଦିର ନିକଟରେ ଚାଲିଥିବା ଫ୍ଲାଏ ଓଭରର। ନିର୍ମାଣ ସାରିବା ଲାଗି ଧାର୍ଯ୍ୟ ଅବଧି କେବେଠୁ ସରିଗଲାଣି। ଏସ୍‌ଟିଆଇ ଛକରେ ନିର୍ମାଣଧୀନ ଫ୍ଲାଏଓଭର ନିର୍ମାଣ ସାରିବାର ଡେଡଲାଇନ୍‌କୁ ଆଉ ମାସେ ବାକି ଅଛି। ତେବେ ଉଭୟ ସ୍ଥାନରେ ୫୦ ପ୍ରତିଶତ କାମ ବି  ହୋଇନି

ଏହି ଦୁଇଟି ସ୍ଥାନରେ କାମ ଶୀଘ୍ର ସାରିବାକୁ ଠିକା ସଂସ୍ଥାକୁ କୁହାଯାଇଥିବା ପୂର୍ତ୍ତବିଭାଗ ନିର୍ବାହୀ ଯନ୍ତ୍ରୀ ବି.କେ. ପତି କହିଛନ୍ତି।

Previous ArticleNext Article

Send this to a friend