ତଥାକଥିତ ବଡ ବଡ଼ିଆ ମାଲେମାଲ୍‌, ଅଧା ଗରିବଙ୍କୁ ମିଳୁନି ସରକାରୀ ଚାଉଳ

ଭୁବନେଶ୍ୱର (ଓଡ଼ିଶା ରିପୋର୍ଟର): ରାଜ୍ୟରେ ୧ ଲକ୍ଷରୁ ଅଧିକ ଗରିବଙ୍କୁ ମିଳୁନି ସରକାରୀ ଚାଉଳ। ପାଠୁଆ ଓ ଚତୁର ଲୋକେ ଗରିବଙ୍କ ରାସନ କାର୍ଡ ହଡ଼ପ୍ କରି ନେଇଛନ୍ତି। ଫଳରେ ଏହି ତଥାକଥିତ ବଡବଡିଆ ଲୋକେ ସରକାରୀ ଚାଉଳ ହଡପ୍‌ କରି ମାଲାମାଲ୍‌ ହେଉଥିବା ବେଳେ ଗରିବଙ୍କୁ ମିଳୁନି ସରକାରୀ ସେବା। ସରକାରଙ୍କ ମହତ୍‌ ଯୋଜନା କାର୍ଯ୍ୟକାରୀ ହେଉନି। ହୀତାଧିକାରି ହନ୍ତସନ୍ତ ହେଉଛନ୍ତି ।

ଯୋଗ୍ୟତା ଥାଇ ମଧ୍ୟ ରାଜ୍ୟରେ ରାସନ ସାମଗ୍ରୀ ପାଉନାହାଁନ୍ତି ୬୫,୦୭୯ ପରିବାର। ଏଭଳି ଚମକାଇଲା ଭଳି ତଥ୍ୟ ରାଜ୍ୟ ଖାଦ୍ୟ କମିଶନ ଦେଇଛନ୍ତି। ଏହି ତଥ୍ୟ ଆଧାରରେ ଅସନ୍ତୋଷ ପ୍ରକାଶ କରି ଜିଲ୍ଲାପାଳମାନଙ୍କୁ ଚିଠି ଲେଖିଛନ୍ତି କମିଶନ।

ରାସନ ସାମଗ୍ରୀ ପାଇବା ପାଇଁ ଆବେଦନ କରି ଅପେକ୍ଷା କରିଛନ୍ତି ରାଜ୍ୟର ୧ ଲକ୍ଷ ୮୧୩ ଜଣ ହିତାଧିକାରୀ। ଖୋର୍ଦ୍ଧା, କଟକ, ପୁରୀ, କେନ୍ଦୁଝର, ନୂଆପଡ଼ା ଜିଲ୍ଲାରେ ଏମାନଙ୍କ ସଂଖ୍ୟା ୫୮,୪୨୪ । ୧୭ଟି ଜିଲ୍ଲାରେ ହିସାବ ଗଡବଡ ରହିଛି। ଏହି ସବୁ ଜିଲ୍ଲାରେ ତଦାରଖ ପାଇଁ ଥିବା ବ୍ୟବସ୍ଥା କାମ କରୁ ନ ଥିବା କମିଶନ ଚିଠିରେ ଲେଖିଛନ୍ତି। ସବୁଠାରୁ ବଡ଼ କଥା ହେଉଛି ୬୫,୦୭୯ ପରିବାର ଯୋଗ୍ୟ ବିବେଚିତ ହୋଇ ମଧ୍ୟ ରାସନ ପାଉନାହାଁନ୍ତି। ଯୋଗ୍ୟତା ଭିତ୍ତିରେ ଅଗ୍ରାଧୀକାର ପାଇବାକୁ ଏମାନଙ୍କ ନାଁ ଚୁଡାନ୍ତ ତାଲିକାରେ ରହିଥିଲେ ମଧ୍ୟ ସବୁ ନାଲିଫିତା ତଳେ ଅଟକି ଯାଇଛି ।

କମିଶନ ଲେଖିଛନ୍ତି ଯୋଗ୍ୟ ହିତାଧିକାରୀ ଏପରି ବଞ୍ଚିତ ହେବା ଘୋର ଅନ୍ୟାୟ। ଚୂଡାନ୍ତ ଯୋଗ୍ୟତା ତାଲିକାରେ ଥିବା ୨୨ ଲକ୍ଷ ୭୫ ହଜାର ପରିବାରଙ୍କୁ ଏପର୍ଯ୍ୟନ୍ତ ଛପା ରାସନ କାର୍ଡ ମିଳିନି। ଅସ୍ଥାୟୀ ବ୍ୟବସ୍ଥାରେ ଏମାନଙ୍କୁ ଚାଉଳ ଦେଇ ଡିଲର୍ ରେକର୍ଡ ପତ୍ରରେ ଜାଲିଆତି କରୁଥିବା କମିଶନ ଆଶଙ୍କା ପ୍ରକାଶ କରିଛନ୍ତି। ଏହି ୨୨ ଲକ୍ଷ ପରିବାରକୁ ଡିସେମ୍ବର ୩୧ ସୁଦ୍ଧା ଛପା ରାସନ କାର୍ଡ ଦେବାକୁ ନିର୍ଦ୍ଦେଶ ଦିଆଯାଇଛି।

ରାଜ୍ୟ ଖାଦ୍ୟ ଆୟୋଗ ସଦସ୍ୟା ସିପ୍ରା ମଲ୍ଲିକ କହିଛନ୍ତି-“ତାଲିକାଭୁକ୍ତ ହିତାଧିକାରୀଙ୍କୁ ରାସନ୍‌କାର୍ଡ଼ ପ୍ରଦାନ କରାଯିବ। ଏହାଛଡ଼ା ଯାହାଙ୍କର ନାଁ ଡ୍ରାପ୍ଟରେ ଅଛି, ସେମାନଙ୍କୁ ମଧ୍ୟ  ଖୁବ୍‌ ଶିଘ୍ର ସାମିଲ କରିବାର ସମୟ ଆସିଛି।”

ଗ୍ରାଉଣ୍ଡ ଜିରୋରୁ ସେମିତି କେତେଜଣ ଗରିବଙ୍କୁ ଭେଟିବା ଆସନ୍ତୁ

ବାରିପଦା ସହର ଉପକଣ୍ଠର ଦେବେନ୍ଦ୍ରରପୁର ଗାଁର ଜୟନ୍ତୀ ବେଉଆ। ସ୍ୱାମୀଙ୍କ ମୃତ୍ୟୁ ପରେ ଅସହାୟ ଜୟନ୍ତୀଙ୍କୁ ସରକାର  ୩୦୦ ଟଙ୍କା ବାର୍ଦ୍ଧକ୍ୟ ଭତ୍ତା ଦେଉଛନ୍ତି। କିନ୍ତୁ ସରକାରଙ୍କ ଆଖିରେ ସେ ଗରିବ ନୁହଁନ୍ତି। ଖାଦ୍ୟ ସୁରକ୍ଷାରେ ରାସନ କାର୍ଡ ପାଇଁ ଆବେଦନ କଲା ପରେ ମଧ୍ୟ କାର୍ଡଖଣ୍ଡେ ମିଳୁନାହିଁ ବୋଲି ସେ ଅଭିଯୋଗ କରିଛନ୍ତି।

ବାରିପଦା ସହରର ୨୭ ନମ୍ବର ଓ୍ୱାର୍ଡରେ ରହନ୍ତି କ୍ରିଷ୍ଣା ସ୍ୱାଇଁ। ତାଙ୍କର ମଧ୍ୟ ସମାନ  ଅବସ୍ଥା। ଗୋଟିଏ ବଖରା ଆଜବେଷ୍ଟ ଘରେ ରହୁଛନ୍ତି ସ୍ୱାମୀ-ସ୍ତ୍ରୀ ଦୁଇ ପ୍ରାଣୀ। ରାସନ କାର୍ଡ ପାଇଁ ଅପେକ୍ଷା କରି ଆଖିରୁ ପାଣି ମଲାଣି। ହେଲେ ଆଜିପର୍ଯ୍ୟନ୍ତ ମିଳୁନି ରାସନ୍‌କାର୍ଡ଼।

ଢେଙ୍କାନାଳ ବଳଦିଆ ବନ୍ଧ କୀର୍ତ୍ତନ ନାୟକ ସରକାରଙ୍କ ହିସାବରେ ଗରିବ। ତେଣୁ ବିପିଏଲ କାର୍ଡ ଦେଇଛନ୍ତି। ହେଲେ ଏଯାଏଁ ଖାଦ୍ୟ ସୁରକ୍ଷାରେ ସାମିଲ ହୋଇପାରୁନାହାଁନ୍ତି।

ଖାଦ୍ୟ ସୁରକ୍ଷା ଆଇନରେ ସାମିଲ ହୋଇ ପ୍ରାୟ ୪୦ ହଜାର ଭୂତ ହିତାଧିକାରୀ ସରକାରଙ୍କ ପାଖରୁ ଚାଉଳ ନେଉଥିବା ବେଳେ ଏମାନଙ୍କ  ନାଁ ତୁରନ୍ତ ବାଦ ଦେବା ପାଇଁ ମଧ୍ୟ କମିଶନ ଲେଖିଛନ୍ତି।

Previous ArticleNext Article

Send this to a friend