ବର୍ଷକ ପରେ କେମିତି ଅଛି ଅପପୁଷ୍ଟିର ଇଲାକା: ବଦଳିଛି ନଗଡ଼ାର ରୂପ, କିନ୍ତୁ ସ୍ଥିତି ଯେମିତିକି ସେମିତି

ଭୁବନେଶ୍ୱର: ବର୍ଷକ ତଳେ ନଜରକୁ ଆସିଥିଲା ନଗଡ଼ାର ନଗ୍ନଚିତ୍ର। ଅପପୁଷ୍ଟିର ତାଡନାରେ କଙ୍କାଳସାର ଶିଶୁଙ୍କୁ ଦେଖି ସାରା ଦେଶରେ ହୋଇଥିଲା ଚର୍ଚ୍ଚା । ଇତି  ମଧ୍ୟରେ ବର୍ଷେ ବିତି ଗଲାଣି । ହେଲେ ବଦଳିନି ନଗଡ଼ାର ଭାଗ୍ୟ । ଆଜି ବି ନଜରକୁ ଆସୁଛି ସମାନ ଚିତ୍ର । ନଗଡାର ନକ୍ସା ବଦଳାଇବା ଲାଗି ସରକାର ଆରମ୍ଭ କରିଥିବା ବିକାଶ ଯୋଜନା ବି ବାଟବଣା। କେମିତି ରହିଛି ନଗଡ଼ାର ବାସ୍ତବ ସ୍ଥିତି । ଗ୍ରାଉଣ୍ଡ ଜିରୋରେ ସ୍ଥିତି ପରଖିଛି ଓଡିଶା ରିପୋର୍ଟର ଟିମ୍(ଦେଖନ୍ତୁ ଭିଡିଓ ଷ୍ଟୋରି।

ପ୍ରଥମେ ଆମେ ଭେଟିଥିଲୁ ଉପର ନଗଡ଼ାର ଶିଶୁ କମଳି ପ୍ରଧାନଙ୍କୁ। ବୟସ  ୩ ବର୍ଷ, ଓଜନ ୧୦ କେଜିରୁ ବି କମ୍ । ଯେଉଁ ବୟସରେ ଖେଳକୁଦ କରି ଫୁର୍ତ୍ତି କରିବା କଥା, ସେହି ବୟସରେ ତା ଉପରେ ଅପପୁଷ୍ଟିର ବୋଝ । ଠିକ୍‌ରେ ଛିଡ଼ା ହେବା ବି କମଳି ପକ୍ଷେ ସମ୍ଭବ ନୁହେଁ । ଚିକିତ୍ସା ପାଇଁ କମଳିକୁ ଡାକ୍ତରଖାନା ବି ନେଇପାରୁନାହାନ୍ତି ବାପା କାନ୍ଦୁରିଆ ପ୍ରଧାନ ଓ ମାଁ ଟୁରୀ ପ୍ରଧାନ। କାରଣ ଚାରି ଚାରି ସନ୍ତାନଙ୍କ ଦାୟିତ୍ୱ ନେବାକୁ କେହିନାହାନ୍ତିଁ । କେବଳ ଏହି ଦମ୍ପତ୍ତି ନୁହଁନ୍ତି, ବିକାଶର ଅନ୍ଧାରୀ ଇଲାକାରେ ସଢ଼ୁଥିବା ଉପର ନଗଡ଼ାର ଅଧିକାଂଶଙ୍କ ଅବସ୍ଥା ସେଇଆ। ଇଏ ଥିଲା କେବଳ ଏକ ଉଦାହରଣ ଆହୁରି କିଛି ଶିଶୁ ଅଛନ୍ତି ଏମିତି ଅବସ୍ଥାରେ ।

ସାରା ବିଶ୍ୱ ଦେଖିଛି ନଗଡ଼ାର ନଗ୍ନ ଚିତ୍ର । ଅପପୁଷ୍ଟିର ଅପବାଦ ବି ମୁଣ୍ଡେଇଛନ୍ତି ରାଜ୍ୟ ସରକାର । ତଥାପି ବଦଳିପାରିଲାନି ନଗଡ଼ାବାସୀଙ୍କ ଭାଗ୍ୟ । ଏହି କଂସାଏ ପଖାଳ ସହ ଶାଗ ଚଟଣି ହିଁ ବୟାନ କରୁଛି, କେତେ ବଦଳିଛି ନଗଡ଼ାର ଅସଲ ଚିତ୍ର । ସରକାର ବିଶୁଦ୍ଧ ପାଣି ପାଇଁ ଯେଉଁ ଫିଲଟର ମାଗଣାରେ ଯୋଗାଇଥିଲେ, ତାହା ଏବେ ଅବ୍ୟବହୃତ । ସ୍ୱାସ୍ଥ୍ୟକେନ୍ଦ୍ରର ସ୍ୱାସ୍ଥ୍ୟସେବା କେବଳ ବୋର୍ଡରେ ହିଁ ସୀମିତ । ସ୍ଥିତି ଅନୁଧ୍ୟାନ ପାଇଁ ସରକାରୀ ଅଧିକାରୀ ଧାଉଁଛନ୍ତି ବାରମ୍ବାର, କିନ୍ତୁ ଫଳ କିଛି ନାହିଁ ।

ଅଧିକ ଖବର- କେବେ ବଦଳିବ ନଗଡ଼ାରେ ଭାଗ୍ୟ?

Previous ArticleNext Article

Send this to a friend