ପଇଡ଼ ପାଣି ପିଇବା ଦ୍ୱାରା ସ୍ୱାସ୍ଥ୍ୟର ଅନେକ ଫାଇଦା ହୋଇଥାଏ। ଏହାକୁ ପିଇବା ଦ୍ୱାରା ଶରୀରରେ ରକ୍ତ ସଞ୍ଚାରଣ ଠିକ୍ ରହିବା ସହ ଅନେକ ରୋଗରୁ ରକ୍ଷା ମିଳିଥାଏ। ଏହା ତ୍ୱଚା ସମସ୍ୟାରୁ ମୁକ୍ତି ଦେଇଥାଏ ଓ ଚେହେରା ସୁନ୍ଦର ଆକର୍ଷଣୀୟ ଦିଶିଥାଏ। ପଇଡ଼ ପାଣିର ଏମିତି ଆହୁରି ବହୁତ ଫାଇଦା ରହିଛି। ଆସନ୍ତୁ ଜାଣିବା ପଇଡ଼ ପାଣିରୁ ଆମକୁ କି ଲାଭ ମିଳିଥାଏ।
୧- ପଇଡ଼ ପାଣି ଶରୀରର ଓଜନ କମାଇବାରେ ସାହାଯ୍ୟ କରେ। କମ୍ ଫ୍ୟାଟ୍ ଯୁକ୍ତ ପଇଡ଼ ପାଣି ପିଇବା ଦ୍ୱାରା ଭୋକ କମ୍ ହୋଇଥାଏ। ଫଳରେ ଓଜନ କମିଥାଏ।
୨- ଏହା ଆମ ଶରୀରର ରୋଗ ପ୍ରତିରୋଧକ ଶକ୍ତି ବଢ଼ାଇଥାଏ। ପଇଡ଼ ପାଣିରେ ରାଇବୋଫ୍ଲୋୱିନ୍, ଥାୟମିନ୍, ପାୟରିଅକ୍ସିନ୍ ଓ ଫୋଲେଟ୍ ପରି ଅନେକ ପୋଷକ ତତ୍ତ୍ୱ ଭରି ରହିଛି। ଏଥିରେ ଆଣ୍ଟିବ୍ୟାକ୍ଟେରିଆଲ ଗୁଣ ରହିଛି, ଯାହା ଫଳରେ ଶରୀରର ରୋଗ ପ୍ରତିରୋଧ ଶକ୍ତି ବଢ଼ିବା ସହ ଫ୍ଲୁ ରୁ ମୁକ୍ତି ମିଳେ।
୩- ଗର୍ଭବତୀ ମହିଳାଙ୍କ ପାଇଁ ପଇଡ଼ ପାଣି ଅତ୍ୟନ୍ତ ଲାଭଦାୟୀ। ଏହାଦ୍ୱାରା ପାଚନ କ୍ରିୟା ଭଲ ରହିବା ସହ କୋଷ୍ଠ କାଠିନ୍ୟ ଓ ଛାତି ପୋଡ଼ାଜଳା ହେବା ଭଳି ସମସ୍ୟାରୁ ମୁକ୍ତି ମିଳିଥାଏ। ତେଣୁ ଡାକ୍ତରମାନେ ଗର୍ଭବତୀ ମହିଳାଙ୍କୁ ସର୍ବଦା ପଇଡ଼ ପାଣି ପିଇବାକୁ ପରାମର୍ଶ ଦେଇଥାନ୍ତି।
୪- ଏଥିରେ ଥିବା ମିନେରାଲ, ପୋଟାସିୟମ ଓ ମ୍ୟାଗ୍ନେସିୟମ ଦ୍ୱାରା କିଡ୍ନି ଜନିତ ରୋଗରୁ ରକ୍ଷା କରିଥାଏ। ଏହା ୟୁରିନର ଉତ୍ପାଦନ ଓ ପ୍ରବାହକୁ ସୁସ୍ଥ ରଖିଥାଏ।
୫- ଯଦି ଆପଣଙ୍କ ତ୍ୱଚାରେ ବ୍ରଣ କିମ୍ବା କିଛି ଦାଗ ହୋଇଛି ତେବେ ପଇଡ଼ ପାଣିକୁ ତ୍ୱଚାରେ ଲଗାନ୍ତୁ। ଦେଖିବେ କିପରି ଅଳ୍ପ ଦିନରେ ସବୁ ଭଲ ହୋଇଯିବ ଓ ଚେହେରା ଉଜ୍ୱଳ ଦିଶିବ। ଏହାକୁ ଆପଣ ହାତ ଓ ନଖକୁ ସୁସ୍ଥ ରଖିବା ପାଇଁ ମଧ୍ୟ ବ୍ୟବହାର କରିପାରିବେ।
୬- ପଇଡ଼ ପାଣି କୋଲେଷ୍ଟ୍ରଲ ଓ ଫ୍ୟାଟ୍ ଫ୍ରି ହୋଇଥିବାରୁ ଏହା ହୃତପିଣ୍ଡ ପାଇଁ ବହୁତ ଭଲ। ଏହାସହ ଏହାର ଆଣ୍ଟି ଅକ୍ସିଡେଣ୍ଟ ଗୁଣ ମଧ୍ୟ ରକ୍ତ ସଞ୍ଚାରରେ ଭଲ ପ୍ରଭାବ ପକାଇଥାଏ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।