ଆଇଓସିଏଲ୍‌ ବିବାଦରେ ରାଜନୈତିକ ମୋଡ଼: ଦାମ କହିଲେ- ମୁଖ୍ୟମନ୍ତ୍ରୀ ଧର୍ମେନ୍ଦ୍ରଙ୍କୁ ଭେଟିବା ଠିକ୍‌ ନୁହେଁ, ସେ ଚାନ୍ଦା ନେଉଛନ୍ତି

ଭୁବନେଶ୍ୱର (ଓଡ଼ିଶା ରିପୋର୍ଟର): ଆଇଓସିଲ୍‌ ଓ ରାଜ୍ୟ ସରକାରଙ୍କ ମଧ୍ୟରେ ଲାଗିଥିବା ବିବାଦର ସମାଧାନ ହେଉନି। ବାରମ୍ବାର ଓ୍ୱାର୍କିଂ ଗ୍ରୁପ୍ ବୈଠକ ଫେଲ୍ ମାରିବା ପରେ ଆସନ୍ତାକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ପେଟ୍ରୋଲିୟମ୍‌ ଓ ପ୍ରାକୃତିକ ଗ୍ୟାସ ବିଭାଗ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟି ଆଲୋଚନା କରିବେ। ଏହା ପରେ ଏହି ବିବାଦର ସମାଧାନ ହେବ ନା ପୁଣି ଆଇନଗତ ଲଢେଇକୁ ସରକାର ଯିବେ, ତାକୁ ନେଇ ଚର୍ଚ୍ଚା ଲାଗି ରହିଛି। ଅନ୍ୟପକ୍ଷରେ ଏହି ବିବାଦରେ କେଁ ପୁରାଇଛନ୍ତି ରାଜ୍ୟର ବରିଷ୍ଠ ମନ୍ତ୍ରୀ ଦାମୋଦର ରାଉତ। କହିଛନ୍ତି, ମୁଖ୍ୟମନ୍ତ୍ରୀ ଧର୍ମେନ୍ଦ୍ରଙ୍କୁ ଭେଟିବା ଠିକ୍‌ ହୋଇନି।

କ’ଣ ରାଜ୍ୟ ସରକାରଙ୍କ ଯୁକ୍ତି?
ଏମ୍ଓୟୁ ଅନୁସାରେ ୨୦୦୯-୧୦ ମସିହାରେ ଆଇଓସିଏଲ୍‌ ପ୍ରକଳ୍ପ ଶେଷ ହେବା କଥା। କିନ୍ତୁ ପ୍ରକଳ୍ପ କାମ ଶେଷ ହେଲା ୨୦୧୬ରେ। ରାଜ୍ୟ ସରକାରଙ୍କୁ ନଜଣାଇ ଆଇସିଏଲ୍ ଉତ୍ପାଦନ କ୍ଷମତା ୯ ମିଲିୟନ୍ ଟନ୍‌ରୁ ୧୫ ମିଲିୟନ୍ ଟନ୍ ବୃଦ୍ଧି କରିଛନ୍ତି। ପ୍ରକଳ୍ପ ଲାଭଦାୟକ ନ ହେଲେ ସରକାର ସୁଧ ମୁକ୍ତ ଋଣ ଛାଡ କରିବେ ବୋଲି ଏମ୍‌ଓୟୁରେ ଉଲ୍ଲେଖ ରହିଥିଲା। କିନ୍ତୁ ଏବେ ଆଇସିଏଲ୍ ଲାଭରେ ଚାଲିଥିବାରୁ ସରକାର ସୁଧମୁକ୍ତ ଋଣ ଛାଡ଼ ପ୍ରତ୍ୟାହାର କରିବାକୁ ନିଷ୍ପତ୍ତି ନେଇଛନ୍ତି। ଏହାଛଡ଼ା ଏବେ ଭାଟ୍ ବାବଦକୁ ବର୍ଷକୁ ୧୪୮୫ କୋଟି ଟଙ୍କା ରାଜ୍ୟର କ୍ଷତି ହେଉଛି। ତେବେ ଏହାକୁ ବିରୋଧ କରିଥିଲା ଆଇଓସିଏଲ୍।
କିଏ କଣ କୁହିଛନ୍ତି?
ଆଇଓସିଏଲ୍‌ ବିବାଦ ସମାଧାନ ପାଇଁ ଆସନ୍ତାକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଭେଟୁଛନ୍ତି। ଏହା ପୂର୍ବରୁ ଦାମୋଦର ରାଉତ କେଁ ପୁରାଇଛନ୍ତି। ସେ କହିଛନ୍ତି-“ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହିତ ଆଲୋଚନା କରିବା ଠିକ୍‌ ହୋବନି। ଓଡ଼ିଶା ସରକାର ଧର୍ମେନ୍ଦ୍ର ସହିତ ଚୁକ୍ତି କରି ନାହାନ୍ତି। ଚୁକ୍ତି କରିଛନ୍ତି ଭାରତ ସରକାରଙ୍କ ଅଧୀନରେ ଥିବା ଭାରତୀୟ ତୈଳ ନିଗମ ସହିତ।”
ସେ କହିଛନ୍ତି-“ଆଇଓସିଏଲ୍‌ ଚୁକ୍ତିର ଖିଲାପ କରିଛି। ପରିବେଶ ସୁରକ୍ଷା ପ୍ରତି ଧ୍ୟାନ ଦେଉନି। ସ୍ଥାନୀୟ ଲୋକଙ୍କୁ ନିଯୁକ୍ତି ଦେଉନି। ତେଣୁ ରାଜ୍ୟ ସରକାର ଆଇଓସିଏଲ୍‌ରୁ ସୁଧମୁକ୍ତ ଋଣଛାଡ ପ୍ରତ୍ୟାହାର କଲେ। ଏଥିପାଇଁ କମ୍ପାନୀ ଅଧିକାରୀଙ୍କ ସମନ କରି ଡାକି ଆଲୋଚନା କଲେ ଲାଭ ମିଳିବ। ଧର୍ମେନ୍ଦ୍ରଙ୍କ ସହିତ ଆଲୋଚନା କଲେ କଣ ମିଳିବ। ସେ (ଧର୍ମେନ୍ଦ୍ର) ସେମାନଙ୍କଠାରୁ ଚାନ୍ଦା ନେଉଛି।”
ବିଜେପି ସାଧାରଣ ସଂପାଦକ ପୃଥ୍ୱୀରାଜ ହରିଚନ୍ଦନ କହିଛନ୍ତି-“କେନ୍ଦ୍ରମନ୍ତ୍ରୀଙ୍କୁ ଭେଟିବା ଯଦି ଠିକ୍‌ ହେଉନି ତାହାହେଲେ ସେ(ଦାମବାବୁ) କଣ ପାଇଁ ମୁଖ୍ୟମନ୍ତ୍ରୀଙ୍କୁ ପରାର୍ମଶ ଦେଉ ନାହାନ୍ତି? ଏଥିରୁ ସ୍ପଷ୍ଟ ହେଉଛି ତାଙ୍କ କଥା କେହି ଶୁଣୁ ନାହାନ୍ତି।”
ବିଜେଡି ମୁଖପାତ୍ର ସୂର୍ଯ୍ୟନାରାୟଣ ପାତ୍ର କହିଛନ୍ତି-“ଓଡ଼ିଶା ଭବନରେ ବୈଠକ ହେବ। କେନ୍ଦ୍ରମନ୍ତ୍ରୀ ତାଙ୍କର ଅଧିକାରୀଙ୍କୁ ଧରି ଓଡ଼ିଶା ଭବନକୁ ଆସି ଆଲୋଚନା କରିବେ।”
ଆଇଓସିଏଲ୍ ଏହି ବିବାଦକୁ ନେଇ ହାଇକୋର୍ଟ ଯାଇଥିଲା। ଆପୋଷ ସମାଧାନ କରିବାକୁ କୋର୍ଟ କହିବାପରେ ଓ୍ୱାର୍କିଂ ଗ୍ରୁପ୍‌ ବୈଠକ ବସିଥିଲା। କିନ୍ତୁ ସମାଧାନ ହୋଇନଥିଲା। ତେବେ ଆସନ୍ତାକଲି ବୈଠକରେ ସମାଧାନ ହେବ ନା ନାହିଁ ତା’ ଉପରେ ସମସ୍ତଙ୍କ ନଜର ରହିଛି।

Previous ArticleNext Article

Send this to a friend