ରାଜ୍ୟ ସରକାରଙ୍କ ଆଦିବାସୀ କାର୍ଡ଼: ଆରମ୍ଭ ହେଲା ଜନଜାତି କ୍ରୀଡ଼ା ପ୍ରତିଯୋଗିତା

ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟ ସରକାରଙ୍କ ଫୋକସ୍‌ରେ ଆଦିବାସୀ। ପ୍ରଥମେ ଟ୍ରାଇବାଲ୍ କାଉନସିଲ ଗଠନ କରିଥିଲେ। ଏବେ ଯୁବ ଓ ଛାତ୍ରଙ୍କ ଉପରେ ଆଖି। ଖାସ୍ ସେଥିପାଇଁ ଦେଶର ପ୍ରଥମ ରାଜ୍ୟ ଭାବେ ବିଜେଡି ସରକାର ଆରମ୍ଭ କରିଛନ୍ତି ଜନଜାତି କ୍ରୀଡ଼ା ପ୍ରତିଯୋଗିତା। ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନଫରେନେସିଂ ଯୋଗେ ଏହି ପ୍ରତିଯୋଗିତାକୁ ଉଦ୍‌ଘାଟନ କରିଛନ୍ତି। ୧୭ ବର୍ଷର ଶାସନ ପରେ ଏଭଳି ଆୟୋଜନକୁ ନେଇ କିନ୍ତୁ ରାଜନୈତିକ ଗନ୍ଧ ବାରିଛନ୍ତି ବିରୋଧୀ।

ବିଶ୍ୱ ସ୍ତରରେ ଓଡ଼ିଶା ପାଇଁ ଗୌରବ ଆଣିବେ ଜନଜାତି କ୍ରୀଡ଼ାବିତ୍। ଏହି ଲକ୍ଷ୍ୟରେ ରାଜ୍ୟର ୧୧୯ଟି ଜନଜାତି ଅଧ୍ୟୁଷିତ ବ୍ଲକ ସମେତ ୧୯୫ଟି ଅଣ ଜନଜାତି ଅଧ୍ୟୁଷିତ ବ୍ଲକରେ ଚାଲିଛି କ୍ରୀଡ଼ା ପ୍ରତିଯୋଗିତା। ପ୍ରତିଯୋଗିତାରେ ଏକକ ବିଭାଗରେ ଦୌଡ଼କୁଦ, ତୀରନ୍ଦାଜକୁ ରଖାଯାଇଥିବା ବେଳେ ଦଳଗତ ପ୍ରତିଯୋଗିତାରେ ଫୁଟବଲ୍, ହକି, କବାଡ଼ି, ଖୋଖୋ ଓ ଭଲିବଲ୍ ଭଳି ଖେଳ ହୋଇଛି। ସବ-ଜୁନିୟର, ଜୁନିୟର ଓ ସିନିୟର ବର୍ଗରେ ଚାଲିଛି ପ୍ରତିଯୋଗିତା। ଆସନ୍ତା ଜାନୁଆରୀରେ ଜିଲ୍ଲାସ୍ତରୀୟ ପ୍ରତିଯୋଗିତା ପରେ ଫେବ୍ରୁଆରୀରେ ରାଜ୍ୟ ସ୍ତରୀୟ ପ୍ରତିଯୋଗିତା ମାଧ୍ୟମରେ ବେଷ୍ଟ ଖେଳାଳି ଚୟନ କରାଯିବ।

ଏଭଳି କ୍ରୀଡ଼ା ଆୟୋଜନରେ ଓଡ଼ିଶା ଦେଶର ପ୍ରଥମ ରାଜ୍ୟ ବୋଲି କହିଛନ୍ତି ସରକାର। ତେବେ ୧୭ବର୍ଷର ଶାସନ ପରେ ଏଭଳି କ୍ରୀଡ଼ାକୁ ନେଇ କିନ୍ତୁ ରାଜନୈତିକ ଗନ୍ଧ ବାରିଛନ୍ତି ବିରୋଧୀ ବିଜେପି।

ଅଲିମ୍ପିଆନ୍‌ ଲାଜରୁସ୍ ବାର୍ଲା କହିଛନ୍ତି-“ଜନଜାତି ପିଲାମାନଙ୍କ ପାଇଁ ରାଜ୍ୟ ସରକାର ଖେଳକୁଦ ପ୍ରତିଯୋଗିତା କରୁଛନ୍ତି। ଏହା ସ୍ୱାଗତଯୋଗ୍ୟ କଥା। ଏହାକୁ ନେଇ ରାଜନୀତି କରାନଗଲେ ଭଲ।”

କ୍ରୀଡ଼ାମନ୍ତ୍ରୀ ଚନ୍ଦ୍ରସାରଥୀ ବେହେରା କହିଛନ୍ତି-“ସମଗ୍ର ଭାରତବର୍ଷରେ ଓଡ଼ିଶା ପ୍ରଥମ ରାଜ୍ୟ ଭାବେ ଏପରି କ୍ରୀଡ଼ା ଆୟୋଜନ କରୁଛି। ଏଥିରେ ଭାଗ ନେଉଥିବା ପିଲାଙ୍କ ଭବିଷ୍ୟତ ଉଜ୍ଜଳମୟ।”

ବିଜେପି ବିଧାୟକ ପ୍ରଦୀପ ପୁରୋହିତ କହିଛନ୍ତି-“ଆଦିବାସୀ ଭୋଟ୍‌ ହାତେଇବା ପାଇଁ ରାଜ୍ୟ ସରକାର ଏପରି କ୍ରୀଡ଼ା ଆୟୋଜନ କରୁଛନ୍ତି। ଏହାଛଡ଼ା ଅନ୍ୟ କିଛି ଉଦ୍ଦେଶ୍ୟକ ନାହିଁ। ଏହାଦ୍ୱାରା ଆଦିବାସୀମାନେ ପ୍ରଭାବିତ ହେବେ ନାହିଁ।”

Previous ArticleNext Article

Send this to a friend