ଗୋଟିଏ ଗୋଷ୍ଠୀର ବ୍ଲକ ଘେରାଉ ବେଳେ ଅନ୍ୟ ଗୋଷ୍ଠୀର ବୋମା ମାଡ଼!

ଆଠଗଡ଼ (ନୀଳଗଣ୍ଠ ଦୋରା): ଆଠଗଡ ବିଜେଡିରେ ଗୋଷ୍ଠୀ କନ୍ଦଳ ଦାଣ୍ଡରେ ଗଡ଼ୁଛି। ଗୋଟିଏ ଗୋଷ୍ଠୀ ଆଜି ବ୍ଲକ ଅଫିସ୍‌ ଆଗରେ ବିକ୍ଷୋଭ କରୁଥିବା ବେଳେ ବୋମା ମାଡ଼ ହୋଇଥିଲା। ଗୋଟିଏ କି ଦୁଇ ନୁହେଁ କ୍ରମାଗତ ଭାବେ ତିନିଟି ବୋମା ପଡ଼ିଥିଲା। ଏଥିରେ ବିଜେଡିର ଅନ୍ୟ ଗୋଷ୍ଠୀର ହାତ ଥିବା ଅଭିଯୋଗ ହୋଇଛି।

ଗତ ପଞ୍ଚାୟତ ନିର୍ବାଚନ ପରଠାରୁ ବିଧାୟକ ରଣେନ୍ଦ୍ର ପ୍ରତାପ ସ୍ୱାଇଁ ଓ ଅଭୟ ବାରିକଙ୍କ ଗୋଷ୍ଠୀ ମଧ୍ୟରେ ଛକାପଞ୍ଝା ଲାଗି ରହିଛି। ଅଭୟଙ୍କ ସମର୍ଥିତ ସରପଞ୍ଚ ଓ ସମିତିସଭ୍ୟଙ୍କ ପଞ୍ଚାୟତରେ କୌଣସି ଉନ୍ନୟନ ମୂଳକ କାର୍ଯ୍ୟ ହେଉନଥିବା ଅଭିଯୋଗ କରି ସେମାନେ ଆଜି ବ୍ଲକ ଆଗରେ ଧାରଣା ଓ ବିକ୍ଷୋଭ ପ୍ରଦର୍ଶନ କରିଥିଲେ। ତେବେ ପ୍ରଶାସନ ଏଥିରେ ହସ୍ତକ୍ଷେପ କରି ଆନ୍ଦୋଳନକାରୀଙ୍କୁ ଡାକି ବୁଝାଇଥିଲେ। ପରେ ସିଡ଼ିପିଓଙ୍କ ଅଫିସ୍‌ ଆଗରେ ବୈଠକ ଚାଲିଥିବା ସମୟରେ ବୋମା ହୋଇଥିଲା। ଜୀବନ ବିକଳରେ ଆନ୍ଦୋଳନକାରୀମାନେ ଘଟଣାସ୍ଥଳରୁ ଦୌଡ଼ି ପଳାଇ ଯାଇଥିଲେ। ମାତ୍ର କାହାରି କିଛି କ୍ଷତି ଘଟିନାହିଁ। ଆନ୍ଦୋଳନକୁ ଭଣ୍ଡୁର କରିବା ପାଇଁ ଏହା ବିଧାୟକଙ୍କ ଷଡଯନ୍ତ୍ର ବୋଲି ବିରୋଧୀ ଅଭିଯୋଗ କରିଛନ୍ତି।

ଆଠଗଡ ବିଜେଡି ପ୍ରାୟତଃ ଦୁଇଫାଳ। ଆଗକୁ ଆସୁଛି ପୌର ନିର୍ବାଚନ। ପୁଣି ଦିନ କେଇଟା ପରେ ସାଧାରଣ ନିର୍ବାଚନ। ଯଦି ବିଜେଡିର ଏଭଳି ଗୋଷ୍ଠୀ କନ୍ଦଳ ଆଗକୁ ଲାଗି ରହେ ତାହା ନିର୍ବାଚନୀ ରାଜନୀତିରେ କି ପ୍ରଭାବ ପକେଇବ ତାହା ଦେଖେବାକୁ ବାକି ରହିଲା?

Previous ArticleNext Article

Send this to a friend