ଗାଁର ପ୍ରଥମ ମାଟ୍ରିକୁଲେଟ୍, ଗ୍ରାଜୁଏଟ୍ ଓ ବିଏଡ୍: ଏବେ ପ୍ରଥମ ରାଷ୍ଟ୍ରପତି ପୁରସ୍କାରପ୍ରାପ୍ତ ଶିକ୍ଷକ

Murali

ଭୁବନେଶ୍ୱର (ଓଡ଼ିଶା ରିପୋର୍ଟର): ଉତ୍ତର ଭୁବନେଶ୍ୱର ନିର୍ବାଚନ ମଣ୍ଡଳି ଅନ୍ତର୍ଗତ କୁଣ୍ଟୁଣିଆ ଗାଁର ଏକ ସାଧାରଣ କୃଷକ ପରିବାରରେ ଜନ୍ମିତ ମୁରଲୀଧର ପରିଡ଼ା। ଘରେ ଏମିତି କେହି ପ୍ରତିଷ୍ଠିତ ବ୍ୟକ୍ତିତ୍ବ ନଥିଲେ, କିନ୍ତୁ ତାଙ୍କ ବାପା ପାଠର ମୂଲ୍ୟ ବୁଝିଥିଲେ। ତେଣୁ ମୁରଲୀଙ୍କ ପାଠପଢ଼ା ପ୍ରତି ସ୍ୱତନ୍ତ୍ର ଧ୍ୟାନ ଦେଇଥିଲେ ପରିବାର ଲୋକ। ଫଳେରେ ସେ ହୋଇଥିଲେ ଗାଁର ପ୍ରଥମ ମାଟ୍ରିକୁଲେଟ୍, ପ୍ରଥମ ଗ୍ରଜୁଏଟ୍, ପ୍ରଥମ ବିଏଡ୍ ଏବଂ ପ୍ରଥମ ଜାତୀୟ ପୁରସ୍କାର ପ୍ରାପ୍ତ ପିଲା। ନିକଟରେ ରାଜ୍ୟର ଜଣେ ଶ୍ରେଷ୍ଠ ଶିକ୍ଷକ ଭାବେ ସେ ଭାରତର ଉପରାଷ୍ଟ୍ରପତିଙ୍କଠାରୁ ସମ୍ମାନୀତ ହୋଇ ଓଡ଼ିଶାକୁ ଗର୍ବିତ କରିଛନ୍ତି।

ମୁରଲୀଧର ପରିଡ଼ା ଏକାଧାରାରେ ଜଣେ କବି ଓ ସଙ୍ଗୀତ ନିଦ୍ଦେର୍ଶକ। ତାଙ୍କ ଲିଖିତ ଭକ୍ତି ଭାର୍ଗବୀ ଓ ବିବର୍ଣ୍ଣ ବିଭାବରୀ ପୁସ୍ତକ ପାଠକଙ୍କ ପାଖରେ ପ୍ରିୟ। ସଙ୍ଗୀତ ନିଦ୍ଦେର୍ଶକ ଭାବେ ମଧ୍ୟ ତାଙ୍କର ନାଁ ରହିଛି। ନୀଳକନ୍ଦରରେ କଳାସୁନ୍ଦର, ତୁହିରେ କାଳିଆ ଅନ୍ତରେ ଥାଉ ପରି ଅନେକ ଭଜନରେ ନିଦ୍ଦେର୍ଶନା ମଧ୍ୟ ଦେଇଛନ୍ତି। ୨୦୧୨ରେ ଜାତୀୟ ଗଣଶିକ୍ଷା ବିଭାଗ ପକ୍ଷରୁ ଶ୍ରେଷ୍ଠ ଶିକ୍ଷକ ଭାବେ ରାଜ୍ୟସ୍ତରରେ ସମ୍ମାନୀତ ହୋଇଥିଲେ। ଓଡ଼ିଶା ରିପୋର୍ଟର ତରଫରୁ ତାଙ୍କୁ ଭେଟିଥିଲେ ବିଶ୍ୱବନ୍ଦିତା ଓ ବନ୍ଦନା।

ଓଡ଼ିଶା ରିପୋର୍ଟର: ଆପଣଙ୍କ ମତରେ ଆଦର୍ଶ ଶିକ୍ଷକ ଆମେ କାହାକୁ କହିବା ?

ମୁରଲୀ: ଜଣେ ଶିକ୍ଷକ ଯେତେବେଳେ ଶିକ୍ଷକତା କରେ, ସେ ବୃତ୍ତିକୁ ସେ ବ୍ରତ ଭାବରେ ଆଦରି ନେବା ଦରକାର। ବୃତ୍ତି ତ ଅନେକ ଅଛି। କିନ୍ତୁ କୈଣସି ଜନ୍ମରେ ସେ କରିଥିବା ପୁଣ୍ୟ କାମ ଯୋଗୁ ଶିକ୍ଷକତା ପରି ବୃତ୍ତିଟେ ପାଇଥାଏ। ମୋ ମତରେ ଯେଉଁ ଶିକ୍ଷକ ପିଲାର ଅନ୍ତର୍ନିହିତ ଶକ୍ତିର ବିକାଶ କରିପାରିଲା ସେ ହେଉଛି ପ୍ରକୃତ ଶିକ୍ଷକ।

ଓଡ଼ିଶା ରିପୋର୍ଟର: ଶିକ୍ଷାର ମାନ କମିଯାଇଛି ବୋଲି ଯେଉଁ ଅଭିଯୋଗ ଆସେ ସେଥିରେ ଆପଣଙ୍କର ମତ କ’ଣ?

ମୁରଲୀ: ସେଥିରେ ମୁଁ ଏକମତ ନୁହେଁ।

ଓଡ଼ିଶା ରିପୋର୍ଟର: ଶିକ୍ଷକମାନେ ତାଙ୍କ ଅଧିକାରରୁ ବଞ୍ଚିତ ହେଉଛନ୍ତି ବୋଲି ଆପଣ ଭାବୁଛନ୍ତି କି?

ମୁରଲୀଧର: ଅଧିକାରରୁ ବଞ୍ଚିତ ବିଷୟରେ ମୁଁ କହିପାରିବି ନାହିଁ। ସମାଜର ଅର୍ଥନୈତିକ ସ୍ଥିତି ଏବେ ଯାହା, ଜଣେ ଶିକ୍ଷକ ତା ପରିବାର ଭରଣ ପୋଷଣ ପାଇଁ ଅର୍ଥର ଆବଶ୍ୟକତା ରଖେ। ତେଣୁ ତା ପେଟ ଯେତେବେଳେ ପୋଡୁଛି ସେ ପେଟରେ ଓଦାକନା ଦେଇ ଶୋଇବା ଅପେକ୍ଷା, ରାସ୍ତାରେ ଧାରଣା ଦେବାକୁ ଉଚିତ ମଣୁଛି।

ଓଡ଼ିଶା ରିପୋର୍ଟର: ଶିକ୍ଷକଙ୍କର ବି ଧନ ଦରକାର। କିନ୍ତୁ ସେ ଅର୍ଥଲୋଭୀ ହେବା ଉଚିତ କି?

ମୁରଲୀଧର: ଆଦୈ ନୁହେଁ। ଶିକ୍ଷକ ଯଦି ଅର୍ଥଲୋଭୀ ହୁଏ ତେବେ ସେ ବୃତ୍ତିକୁ ଠିକ ଭାବେ ଗ୍ରହଣ କରିନାହିଁ। କେବଳ ଶିକ୍ଷକ ନୁହେଁ, ଅନ୍ୟ ବୃତ୍ତିର ଲୋକଙ୍କୁ ବି ସେଇ ଅନୁରୋଧ।

ଓଡ଼ିଶା ରିପୋର୍ଟର: ଅସନ୍ତୁଷ୍ଟ ଶିକ୍ଷକଙ୍କ ପାଇଁ ଆପଣ କ’ଣ ବାର୍ତ୍ତା ଦେବେ?

ମୁରଲୀଧର: ସବୁ ଦୁଃଖ କଷ୍ଟକୁ ଆମକୁ ହୃଦୟ ଭିତରେ ଚାପି ରଖି, ସମାଜରେ ଜଣେ ଆଦର୍ଶ ଶିକ୍ଷକ ହୋଇ ଠିଆ ହେବାକୁ ପଡ଼ିବ।

ଓଡ଼ିଶା ରିପୋର୍ଟର: ଶିକ୍ଷକତା ବ୍ୟତୀତ ଅନ୍ୟ କେଉଁ ଥିରେ ଆପଣ ଋଚି ରଖନ୍ତି?

ମୁରଲୀଧର: ସଙ୍ଗୀତ ଓ ସାହିତ୍ୟ ପ୍ରତି ମୋର ଆଗ୍ରହ ଅଛି। ଭକ୍ତି ଭାର୍ଗବୀ, ବିବର୍ଣ୍ଣ ବିଭାବରୀ ବହି ଲେଖିଛି। ବିଜ୍ଞାନ ଭିତ୍ତିକ କବିତା ଲେଖା ଚାଲିଛି। କୈବଲ୍ୟ ବନ୍ଧୁ ଛପା ଚାଲିଛି। ଏସବୁ କ୍ଷେତ୍ରରେ ନିଜକୁ ମୁଁ ନିୟୋଜିତ କରିଥାଏ।

ଓଡ଼ିଶା ରିପୋର୍ଟର: ପାଇଥିବା ପୁରସ୍କାର ପାଇଁ ଆପଣ କାହାକୁ ଧନ୍ୟବାଦ ଦେବେ?

ମୁରଲୀଧର: ପ୍ରଭୁ ଶ୍ରୀଜଗନ୍ନାଥଙ୍କୁ ଓ ମୋ ପରିବାରକୁ।

 

Previous ArticleNext Article

Leave a Reply

Your email address will not be published. Required fields are marked *

Send this to a friend