ଏମଏମଟିସିରୁ ୧୫% ଅଂଶଧନ ବିକିବେ ସରକାର

ନୂଆଦିଲ୍ଲୀ: ଚଳିତ ଆର୍ଥିକ ବର୍ଷରେ ସରକାର ଏମଏମଟିସିରୁ ତାଙ୍କର ୧୫% ଅଂଶଧନ ବିକ୍ରି କରିବାକୁ ଯୋଜନା କରୁଛନ୍ତି। ଏଥିରୁ ସରକାରଙ୍କୁ ପ୍ରାୟ ୮୦୦ କୋଟି ଟଙ୍କା ମିଳିବ। ଏମଏମଟିସି ଅଧ୍ୟକ୍ଷ ବେଦ ପ୍ରକାଶ ଏହି ସୂଚନା ଦେଇଛନ୍ତି।

ସେ କହିଥିଲେ, ସରକାର ଏମଏମଟିସିରୁ ୧୫% ଅଂଶଧନ ବିକ୍ରି କରିବାକୁ ଚାହୁଁଛନ୍ତି। ଆମେ ଏଥିପାଇଁ ପ୍ରସ୍ତୁତ ଅଛୁ। ଏହି ଅଂଶଧନ ବିକ୍ରି କଲେ ସରକାରଙ୍କୁ ପ୍ରାୟ ୮୦୦ କୋଟି ଟଙ୍କା ମିଳିବ।

ବର୍ତ୍ତମାନ ଏମଏମଟିସିରେ ସରକାରଙ୍କର ୮୯.୯୩% ଅଂଶଧନ ରହିଛି। ଆଉ ସରକାର ୧୫% ଅଂଶଧନ ବିକ୍ରି କରି ଦେଲେ ତାହା ସେବି ଦ୍ୱାରା ନିର୍ଦ୍ଧାରିତ ମିନିମନ୍ ପବ୍ଲିକ ସେୟାରହୋଲ୍ଡିଂ (ସାଧାରଣ ଲୋକଙ୍କ ଅଂଶଧନ) ସ୍ତରକୁ ଛୁଇଁ ପାରିବ କଂପାନୀ। ସବୁ ପିଏସୟୁଗୁଡ଼ିକରେ ଅତିକମରେ ୨୫% ଘରୋଇ ଭାଗିଦାରୀ ରହିବାକୁ ସେବି ବାଧ୍ୟତାମୂଳକ କରି ଦେଇଛି।

୨୦୧୩ ଜୁନରେ ସରକାର ଏମଏମଟିସିରୁ ୯.୩୩% ଅଂଶଧନ ବିକ୍ରି କରି ଥିଲେ। ଏଥିରୁ ସରକାରଙ୍କୁ ମିଳିଥିଲା ୫୭୦ କୋଟି ଟଙ୍କା। ପୁଞ୍ଜିପ୍ରତ୍ୟାହାର ପାଇଁ ସରକାର ବାଛି ଥିବା ଡଜନେରୁ ଅଧିକ କଂପାନୀ ମଧ୍ୟରେ ଏମଏମଟିସି ବି ରହିଛି। ଅନ୍ୟ କଂପାନୀଗୁଡ଼ିକ ହେଲା ଆଇଓସି, ଏନଟିପିସି, ଭେଲ, ନାଲକୋ, ଏନଏମଡିସି, ନେସନାଲ ଫର୍ଟିଲାଇଜର, ରାଷ୍ଟ୍ରୀୟ କେମିକାଲ ଓ ଫର୍ଟିଲାଇଜର।