୭ମ ବେତନ କମିଶନଙ୍କ ସୁପାରିଶକୁ ବିରୋଧ: ସମୂହ ଛୁଟି ଧମକ ଦେଲା ରେଲୱେ ଇଞ୍ଜିନିୟର୍ସ ଆସୋସିଏସନ୍

ଭୁବନେଶ୍ୱର: ସମୂହ ଛୁଟି କିମ୍ୱା କାର୍ଯ୍ୟବନ୍ଦ ଆନ୍ଦୋଳନର ଧମକ ଦେଇଛି ରେଲୱେ ଇଞ୍ଜିନିୟର୍ସ ଆସୋସିଏସନ୍। ୭ମ ବେତନ କମିଶନଙ୍କ ତ୍ରୁଟିପୂର୍ଣ୍ଣ ଓ ଏକତରଫା ସୁପାରିଶକୁ ବିରୋଧ କରି ଏହି ଧମକ ଦେଇଛି ଆସୋସିଏସନ୍। ଇଣ୍ଡିଆ ଗେଜେଟ୍ ନୋଟିଫିକେସନ୍ ଅନୁସାରେ କେନ୍ଦ୍ର ସରକାରଙ୍କ ସମସ୍ତ ବିଭାଗର ମନ୍ତ୍ରାଳୟରେ ଇଞ୍ଜିନିୟରମାନଙ୍କୁ ଗ୍ରୁପ୍-ବିରେ ରଖାଯାଇଛି । ମାତ୍ର ରେଳ ବିଭାଗରେ ଇଞ୍ଜିନିୟରମାନଙ୍କୁ ଗ୍ରୁପ୍-ସିରେ ରଖାଯାଇଛି। ଏହା ରେଳବାଇରେ କାର୍ଯ୍ୟରତ ଇଞ୍ଜିନିୟରଙ୍କ ଭବିଷ୍ୟତ ପ୍ରତି ବିପଦ ସୃଷ୍ଟି କରିଛି ବୋଲି ଆସୋସିଏସନ୍ ପକ୍ଷରୁ କୁହାଯାଇଛି । ସରକାର ସେମାନଙ୍କ ସମସ୍ୟା ପ୍ରତି କର୍ଣ୍ଣପାତ ନ କଲେ ଆଗାମୀ ଦିଗରେ ଆନ୍ଦୋଳନ ତୀବ୍ରତର ହେବ ବୋଲି ଧମକ ଦିଆଯାଇଛି। ପୂର୍ବତଟ ରେଳପଥ ମୁଖ୍ୟାଳୟ ସମ୍ମୁଖରେ ଆଜି ଇଞ୍ଜିନିୟର୍ସ ଆସୋସିଏସନ୍ ପକ୍ଷରୁ ଧାରଣା ଦିଆଯିବା ସହ ବିକ୍ଷୋଭ ପ୍ରଦର୍ଶନ କରାଯାଇଥିଲା।