ସିଂହଗାଁକୁ ଦ୍ୱିତୀୟ ସାଂସଦ ଆଦର୍ଶ ଗ୍ରାମ ଘୋଷଣା କଲେ ବୈଜୟନ୍ତ

ଭୁବନେଶ୍ୱର: ବିଜୁ ଜନତା ଦଳର ବରିଷ୍ଠ ନେତା ତଥା କେନ୍ଦ୍ରାପଡା ସାଂସଦ ବୈଜୟନ୍ତ ପଣ୍ଡା ପଟ୍ଟାମୁଣ୍ଡେଇ ବ୍ଲକ ସିଂହଗାଁ ପଞ୍ଚାୟତକୁ ସାଂସଦ ଆଦର୍ଶ ଗାଁ ଗ୍ରାମ ଯୋଜନାରେ ଦ୍ୱିତୀୟ ଆଦର୍ଶ ଗ୍ରାମ ଭାବେ ଘୋଷଣା କରିଛନ୍ତି।

ସାଂସଦ ପଣ୍ଡା ସିଂହଗାଁର ସର୍ବାଙ୍ଗୀନ ବିକାଶ କରାଯିବା ଦିଗରେ କେନ୍ଦ୍ର ପଞ୍ଚାୟତିରାଜ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ବିରେନ୍ଦ୍ର ସିଂହ, କେନ୍ଦ୍ରାପଡା ଜିଲ୍ଲାପାଳ ଦେବରାଜ ସେନାପତି ଏବଂ ରାଜ୍ୟ ସରକାରଙ୍କ ଗ୍ରାମ୍ୟ ଉନ୍ନୟନ ବିଭାଗ ସଚିବ ପି.କେ. ମହାପାତ୍ରଙ୍କୁ ଏକ ପତ୍ର ଲେଖି ଅବଗତ କରିବା ସହ ଏ ଦିଗରେ ସେମାନଙ୍କ ସହଯୋଗ ଲୋଡ଼ିଛନ୍ତି।

ସୂଚନାଯୋଗ୍ୟ ଯେ ଏହି ଯୋଜନାରେ ପ୍ରଥମ ବର୍ଷ ପ୍ରତ୍ୟେକ ସାଂସଦ ନିଜ ନିର୍ବାଚନ ମଣ୍ଡଳୀର ଗୋଟିଏ ଗ୍ରାମକୁ ଆଦର୍ଶ ଗ୍ରାମରେ ପରିଣତ କରିବେ। ପରବର୍ତ୍ତୀ ନିର୍ବାଚନ ପର୍ଯ୍ୟନ୍ତ ସାଂସଦ ମାନେ ଏହିପରି ଅନ୍ୟ ୨/୩ଟି ଗ୍ରାମକୁ ଆଦର୍ଶ ଗ୍ରାମ ରୂପେ ଗ୍ରହଣ କରିପାରିବେ। ଶ୍ରୀପଣ୍ଡା ପ୍ରଥମ ବର୍ଷ ଡେରାବିଶ ବ୍ଲକର ଗୋଲାରହାଟକୁ ଆଦର୍ଶ ଗ୍ରାମ ଭାବେ ଗ୍ରହଣ କରିଥିବା ବେଳେ, ସିଂହଗାଁକୁ ପରବର୍ତ୍ତୀ ଆଦର୍ଶ ଗ୍ରାମ ଭାବେ ଗ୍ରହଣ କରିଛନ୍ତି।