୭ମ ଦିନରେ ଭିଏସଏସ ମେଡିକାଲରେ ଜୁନିୟର ଡାକ୍ତରଙ୍କ ଆନ୍ଦୋଳନ

ଭୁବନେଶ୍ୱର/ସମ୍ବଲପୁର: ଭିଏସ୍ଏସ୍ ମେଡିକାଲ୍ କଲେଜର ଜୁନିୟର ଡାକ୍ତରମାନେ କାର୍ଯ୍ୟବନ୍ଦ ଆନ୍ଦୋଳନ ଆଜି ୭ ଦିନରେ ଜାରି ରହିଛି। ପ୍ରାୟ ସାଢେ ୪ ଶହରୁ ଅଧିକ ଡାକ୍ତର ଆନ୍ଦୋଳନରେ ସାମିଲ ହୋଇଥିବାରୁ ମେଡିକାଲରେ ସ୍ୱାସ୍ଥ୍ୟସେବା ଉପରେ ଏହାର ଗୁରୁତର ପ୍ରଭାବ ପଡିଛି। ଆନ୍ଦୋଳନରତ ଡାକ୍ତରଙ୍କ ସହ ଆଜି ସ୍ଥାନୀୟ ବିଧାୟିକା ରାସେଶ୍ୱରୀ ପାଣିଗ୍ରାହୀ ଆଲୋଚନା କରିଥିଲେ ମଧ୍ୟ ସମାଧାନର ବାଟ ବାହାରି ପାରିନାହିଁ। ଆନ୍ଦୋଳନ ଯୋଗୁଁ ବୁର୍ଲା ବଡ଼ମେଡିକାଲର ପିଜି ଓ ସିନିୟର ରେସିଡେଣ୍ଟ ଡାକ୍ତରଙ୍କ ଚାମ୍ୱରରେ ତାଲା ପଡିଥିବା ବେଳେ କାଜୁଆଲିଟିରୁ ନେଇ ଓପିଡି ଓ ବିଭିନ୍ନ ୱାର୍ଡରେ ସ୍ୱାସ୍ଥ୍ୟସେବା ବିଗିଡ଼ି ଯାଇଛି। ଡାକ୍ତର ଅଭାବରୁ ରୋଗୀଙ୍କୁ ଠିକଣା ସମୟରେ ଚିକିତ୍ସା ମିଳୁ ନ ଥିବା ଅଭିଯୋଗ ହେଉଛି।

ଗତକାଲି ଭଳି ମଙ୍ଗଳବାର ମଧ୍ୟ ଜୁନିୟର ଡାକ୍ତର ଓ ହାଉସ୍ ସର୍ଜନମାନେ ପ୍ରତିବାଦ ଶୋଭାଯାତ୍ରାରେ ବୁର୍ଲା ସହର ପରିକ୍ରମା କରିଥିଲେ। ଶୋଭାଯାତ୍ରାରେ ସିନିୟର ରେସିଡେଣ୍ଟ ଡକ୍ଟର ସାମିଲ ହୋଇଥିଲେ ବୋଲି ଭିଏସ୍ଏସ୍ ମେଡିକାଲ୍ କଲେଜର ଜେଡିଏ ସଭାପତି ଶଙ୍କର ରାମଚନ୍ଦାନୀ କହିଛନ୍ତି।

ଏ ନେଇ ସ୍ୱାସ୍ଥ୍ୟମନ୍ତ୍ରୀ ଅତନୁ ସବ୍ୟସାଚୀ ନାୟକ କହିଛନ୍ତି, ସମସ୍ତଙ୍କ ପରାମର୍ଶକୁ ଗ୍ରହଣ କରାଯାଉଛି। ସରକାର ସମସ୍ତ ପ୍ରକାର ପଦକ୍ଷେପ ନେଉଛନ୍ତି। ମେଡିକାଲ କଲେଜରେ ଯାହାବି ସମସ୍ୟା ରହିଛି ଶୀଘ୍ର ସମାଧାନ କରାଯିବ। ଅନୁଷ୍ଠାନ ଓ ସ୍ୱାସ୍ଥ୍ୟସେବାରେ ଉନ୍ନତି ପାଇଁ ସରକାର ବଦ୍ଧ ପରିକର ଓ ଏ ନେଇ ସମସ୍ତଙ୍କ ପରାମର୍ଶକୁ ଅଗ୍ରାଧିକାର ଦିଆଯାଉଛି ବୋଲି ସେ କହିଛନ୍ତି।