ବେବୋ ହେବେ ସୀତା, ଡିମାଣ୍ଡ କଲେ ୧୨ କୋଟି

ବମ୍ବେ: ୨ ଛୁଆଙ୍କ ମା’ ହେବା ସହ ବୟସର ୪୦ତମ ପାହାଚ ଅତିକ୍ରମ କରିବା ପରେ ଵି’ ଟାଉନରେ ବେବୋଙ୍କ କ୍ରେଜ୍‌ କମି ନାହିଁ। ଏବେଵି ତାଙ୍କ ନିକଟରେ ନିର୍ଦ୍ଦେଶକଙ୍କ ଲାଇନ ଲାଗୁଛି। ଆଉ ଆକାଶଛୁଆଁ ପ୍ରାଇସ୍‌ ଡିମାଣ୍ଡ କରୁଛନ୍ତି ଛୋଟେ ନବାବଙ୍କ ବେଗମ।

ଏବେ ଫିଲ୍ମ ‘ସୀତା’ରେ ଲିଡ୍‌ ରୋଲ୍‌ରେ ଅଭିନୟ କରିବା ପାଇଁ କରୀନ କପୁରଙ୍କୁ ମିଳିଛି ଅଫର। ଆଉ ସେଥିପାଇଁ ସେ ମାଗିଛନ୍ତି ୧୨ କୋଟି ଟଙ୍କା।

ଅଲୌକିକ ଦେଶାଇ ଫିଲ୍ମଟିର ନିର୍ଦ୍ଦେଶନା ଦାୟିତ୍ୱରେ ଥିବା ବେଳେ ଏହା ‘ରାମାୟଣ’ ଆଧାରରେ ନିର୍ମାଣ ହେବ ବୋଲି ଜଣାପଡ଼ିଛି। ଏଥିରେ ଦେବୀ ସୀତାଙ୍କ ଭୂମିକାକୁ ବିଶେଷ ଭାବେ ପ୍ରାଧ୍ୟାନ୍ୟ ଦିଆଯିବ ବୋଲି ମଧ୍ୟ ଜଣାପଡ଼ିଛି।

କରୀନାଙ୍କୁ ଫିଲ୍ମର କନସେପ୍ଟ ପସନ୍ଦ ଆସିଛି। ସେ ଗୋଟେ ପ୍ରକାର ହିଁ କରିସାରିଛନ୍ତି। ତେବେ ସେ ପାରିଶ୍ରମିକ ବାବଦକୁ ୧୨ କୋଟି ଟଙ୍କା ମାଗିଥିବାରୁ ନିର୍ମାତା ଟିକେ ଦ୍ୱନ୍ଦ୍ୱରେ ଥିବା ଖବର ଆସିଛି। ସେମାନେ ‘ସୀତା’ ଭୂମିକା ପାଇଁ ଆଉ ଜଣେ କମ୍ ବୟସର ଅଭିନେତ୍ରୀ ମଧ୍ୟ ଖୋଜୁଥିବା ଜଣାପଡ଼ିଛି। ତେବେ କରୀନା ସେମାନଙ୍କର ପ୍ରଥମ ପସନ୍ଦ ବୋଲି ଜଣାପଡ଼ିଛି।

କରୀନା ସାଧାରଣତଃ ଗୋଟିଏ ଫିଲ୍ମ ପାଇଁ ୬ରୁ ୮ କୋଟି ଦାବି କରନ୍ତି। କିନ୍ତୁ ‘ସୀତା’ ଫିଲ୍ମ ପାଇଁ ଅଧିକ ସମୟ ଦେବାକୁ ପଡ଼ିବ ବୋଲି ସେ ୧୨ କୋଟି ଦାବି କରିଥିବା କୁହାଯାଉଛି। ନିର୍ମାତାଙ୍କ ଯୋଜନା ମୁତାବକ ଏହି ଫିଲ୍ମ ପାଇଁ ତାଙ୍କୁ ୮ରୁ ୧୦ ମାସ ସମୟ ଦେବାକୁ ପଡ଼ିପାରେ।

‘ସୀତା’ ଫିଲ୍ମରେ କରୀନାଙ୍କ ସହ ବଲିଉଡର ‘ଗଲିବୟ’ ରଣବୀର ସିଂହ ବି ଅଭିନୟ କରିବେ। ତେବେ ସେ ରାମ ନା ରାବଣ ଭୂମିକାରେ ଅଭିନୟ କରିବେ, ତାହା ଫାଇନାଲ୍ ହୋଇ ନଥିବା କୁହାଯାଉଛି।

 

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।