ଚାଷୀଙ୍କୁ ସମର୍ଥନ କରି ଆନ୍ଦୋଳନ ସ୍ଥଳକୁ ଯିବେ କେଜ୍ରିୱାଲ

ନୂଆଦିଲ୍ଲୀ: କୃଷି ଆଇନକୁ ବିରୋଧ କରି ଦିଲ୍ଲୀ-ହରିଆଣା ସୀମାରେ ଆନ୍ଦୋଳନ କରୁଥିବା ଚାଷୀଙ୍କୁ ସମର୍ଥନ କରିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ। ଦୀର୍ଘ ୧୨ ଦିନ ହେଲା ଆନ୍ଦୋଳନ କରୁଥିବା ଚାଷୀଙ୍କ ପାଇଁ କ’ଣ ସବୁ ବ୍ୟବସ୍ଥା ହୋଇଛି, ତା’ର ସମୀକ୍ଷା କରିବା ପାଇଁ ଆଜି କେଜ୍ରିୱାଲ ଘଟଣା ସ୍ଥଳକୁ ଯିବେ ବୋଲି ଜଣାପଡ଼ିଛି। କେବଳ କେଜ୍ରିୱାଲ ନୁହନ୍ତି, ତାଙ୍କ ସରକାରରେ ଥିବା କ୍ୟାବିନେଟ୍‌ ମନ୍ତ୍ରୀମାନେ ମଧ୍ୟ ସିଙ୍ଘୁ ସୀମାକୁ ଯାଇ ଆନ୍ଦୋଳନ କରୁଥିବା ଚାଷୀଙ୍କୁ ଭେଟିବେ।

କୃଷି ଆଇନ ଉଚ୍ଛେଦ ଦାବିରେ ପଞ୍ଜାବ ଓ ହରିଆଣାର ଚାଷୀମାନେ ଉଭୟ ସିଙ୍ଘୁ ଏବଂ ଟିକରି ସୀମାରେ ୧୨ଦିନ ହେଲା ଶାନ୍ତିପୂର୍ଣ୍ଣ ଭାବେ ବିକ୍ଷୋଭ କରୁଛନ୍ତି। ସେହିପରି ଗାଜିପୁର ସୀମାରେ ମଧ୍ୟ ଚାଷୀଙ୍କ ସଂଖ୍ୟା ବଢ଼ିବାରେ ଲାଗିଛି। ଏଠାରେ ଆନ୍ଦୋଳନ କରୁଥିବା ଚାଷୀଙ୍କ ସହ ଉତ୍ତର ପ୍ରଦେଶର ଶହଶହ କୃଷକ ମଧ୍ୟ ସାମିଲ ହେଉଛନ୍ତି।

କେନ୍ଦ୍ର ସରକାରଙ୍କ କୃଷି ଆଇନକୁ ବିରୋଧ କରି ଚାଷୀମାନେ ଆସନ୍ତାକାଲି ଭାରତ ବନ୍ଦ ଡାକରା ଦେଇଛନ୍ତି। ଏହାକୁ କେଜ୍ରିୱାଲଙ୍କ ସହ ୧୮ଟି ବିରୋଧୀ ଦଳ ସମର୍ଥନ ମଧ୍ୟ କରିଛନ୍ତି। କେଜ୍ରିୱାଲ ଟ୍ୱିଟ କରି କହିଥିଲେ ଯେ “୮ ତାରିଖରେ ଚାଷୀମାନେ ଦେଇଥିବା ଭାରତ ବନ୍ଦ ଡାକରାକୁ ଆମ ଆଦମୀ ପାର୍ଟି ପୂର୍ଣ୍ଣ ସମର୍ଥନ କରୁଛି।

ଶାନ୍ତିପୂର୍ଣ୍ଣ ଭାବେ ଏହି ବନ୍ଦକୁ ସମଗ୍ର ଭାରତରେ ଥିବା ଆମ ଆଦମୀ ପାର୍ଟିର କର୍ମୀମାନେ ସମର୍ଥନ କରିବେ। ଲୋକମାନେ ଚାଷୀଙ୍କୁ ସମର୍ଥନ କରନ୍ତୁ ଓ ଭାରତ ବନ୍ଦରେ ସାମିଲ ହେବାକୁ ମୁଁ ନିବେଦନ କରୁଛି।”

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।