ସିବିଆଇ ଆବେଦନରେ ବି ରହିଛି ଓଡ଼ିଶା ପ୍ରସଙ୍ଗ

ନୂଆଦିଲ୍ଲୀ: ସିବିଆଇ ଓ ପଶ୍ଚିମବଙ୍ଗ ସରକାରଙ୍କ ମଧ୍ୟରେ ସୃଷ୍ଟି ହୋଇଥିବା ବିବାଦ ତୀବ୍ର ରୂପ ଧାରଣ କରିବା ପରେ ଏବେ ମାମଲା ସୁପ୍ରିମକୋର୍ଟରେ ପହଞ୍ଚିଛି। ସୁପ୍ରିମକୋର୍ଟ ମଙ୍ଗଳବାର ମାମଲାର ଶୁଣାଣି କରିବେ। ତେବେ ସିବିଆଇ ତା’ର ଆବେଦନରେ କ’ଣ ଲେଖିଛି ଆସନ୍ତୁ ଜାଣିବା। ଏହି ଘଟଣାକୁ ସିବିଆଇ ଅଭୂତପୂର୍ବ ବୋଲି ଦର୍ଶାଇଛି।

ସୁପ୍ରିମକୋର୍ଟରେ ଦାଖଲ ହୋଇଥିବା ଆବେଦନରେ ସିବିଆଇ କହିଛି ଯେ ୨୦୧୪ ମସିହା ଜୁନ୍‌ ୯ରେ ସୁପ୍ରିମକୋର୍ଟ ପଶ୍ଚିମବଙ୍ଗ ଏବଂ ଓଡ଼ିଶାର ବିଭିନ୍ନ ପୁଲିସ୍‌ ଷ୍ଟେସନ୍‌ରେ ରୁଜୁ ହୋଇଥିବା ମାମଲାଗୁଡ଼ିକୁ ସିବିଆଇକୁ ହସ୍ତାନ୍ତର କରିଥିଲେ। ଏଥିରେ ଶାରଦା କମ୍ପାନୀ ସହ ଅନ୍ୟ ୪୪ଟି ଚିଟଫଣ୍ଡ କମ୍ପାନୀର ନାଁ ରହିଥିଲା। ସିବିଆଇ ସେଗୁଡ଼ିକର ତଦନ୍ତ କରୁଥିବା ବେଳେ ପଶ୍ଚିମବଙ୍ଗ ଏବଂ ଓଡ଼ିଶାର ରାଜ୍ୟ ସରକାରମାନେ କୌଣସି ସହଯୋଗ କରୁନାହାନ୍ତି।

ଏଥିରେ ଉଲ୍ଲେଖ ରହିଛି ଯେ ସିବିଆଇ ସୁପ୍ରିମକୋର୍ଟଙ୍କ ନିର୍ଦ୍ଦେଶରେ ତଦନ୍ତ କରୁଛି। କୋଲକାତା ପୁଲିସ୍‌ କମିଶନର ରାଜୀବ କୁମାରଙ୍କ ବିରୋଧରେ ସିବିଆଇ ଗୁରୁତ୍ୱପୂର୍ଣ୍ଣ ଦସ୍ତାବିଜ ପାଇଛି। ସିବିଆଇ ତାଙ୍କୁ ବାରମ୍ବାର ସମନ କରିଥିଲେ ହେଁ ରାଜୀବ କୁମାର ଏହାର ଜବାବ ଦେଇ ନଥିଲେ। ରାଜୀବ କୁମାର ଚିଟ୍‌ଫଣ୍ଡ ଘଟଣାରେ କିଛି ଗୁରୁତ୍ୱପୂର୍ଣ୍ଣ ପ୍ରମାଣକୁ ନଷ୍ଟ କରିଥିବା ମଧ୍ୟ ଅଭିଯୋଗ ହୋଇଛି। କୋଲକାତା ପୁଲିସ୍‌ ସିବିଆଇ ଅଫିସକୁ ଘେରାଉ କରି ରଖିଛି। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଓ ବରିଷ୍ଠ ପୁଲିସ୍‌ ଅଧିକାରୀମାନେ ଖୋଲାଖୋଲି ଭାବେ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ ଅବମାନନା କରିଛନ୍ତି।

ପଶ୍ଚିମବଙ୍ଗ ପୁଲିସ୍‌ ବେଆଇନ୍‌ ଭାବେ ୨୫ ଜଣ ସିବିଆଇ ଅଫିସରଙ୍କୁ ପଣବନ୍ଦୀ କରି ରଖିଥିଲା। ରାଜ୍ୟର ସରକାର ଅଗଣତାନ୍ତ୍ରିକ ଭାବେ ଗୁଣ୍ଡାଗିରିକୁ ପ୍ରୋତ୍ସାହନ ଯୋଗାଉଛନ୍ତି। ଆମ ପାଖରେ ଏମିତି କିଛି ପ୍ରମାଣ ରହିଛି, ଯାହାଦ୍ୱାରା ଆମେ ବିନା ୱାରେଣ୍ଟରେ ଗିରଫ କରିପାରିବୁ ଏବଂ କୋଲକାତାର ପୁଲିସ୍‌ କମିଶନର ଏହି ଦେଶର ଆଇନ୍‌କୁ ମାନିବା ଦରକାର ବୋଲି ସିବିଆଇର ଆବେଦନରେ କୁହାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।