ନୂଆଦିଲ୍ଲୀ: କେରଳ କୋଝିକୋଡ ବିମାନ ଦୁର୍ଘଟଣାରେ ଦୁଇ ପାଇଲଟଙ୍କ ସମେତ ୧୮ ଜଣଙ୍କ ମୃତ୍ୟୁ ଘଟିଛି। ଏୟାର ଇଣ୍ଡିଆର ବିମାନଟି ଦୁବାଇରୁ ୧୯୦ ଜଣ ଲୋକଙ୍କୁ ଧରି କେରଳ ଆସୁଥିବା ବେଳେ କୋଝିକୋଡ ବିମାନବନ୍ଦରରେ ଗତକାଲି କ୍ରାଶ ଲ୍ୟାଣ୍ଡିଂ କରିଥିଲା।
ଏହି ଦୁର୍ଘଟଣାରେ ପ୍ରାଣ ହରାଇଥିବା କୋ ପାଇଲଟ ହେଉଛନ୍ତି ଅଖିଲେଶ କୁମାର। ଅଖିଲେଶ କୁମାର ଆଉ କିଛି ଦିନ ପରେ ବାପା ହେବାକୁ ଯାଉଥିଲେ। କାରଣ ତାଙ୍କ ପତ୍ନୀ ଆଉ ୧୦ରୁ ୧୫ ଦିନ ମଧ୍ୟରେ ଗୋଟିଏ ସନ୍ତାନଙ୍କୁ ଜନ୍ମ ଦେବାର ଥିଲା। ହେଲେ ବାପା ଡାକ ଶୁଣିବା ପୂର୍ବରୁ ଅଖିଲେଶ ବିମାନ ଦୁର୍ଘଟଣାରେ ସବୁଦିନ ପାଇଁ ଆଖି ବୁଜି ଦେଇଛନ୍ତି।
ଅଖିଲେଶ ପତ୍ନୀ ଗର୍ଭବତୀ ଥିବା ତାଙ୍କ ସମ୍ପର୍କୀୟ ଭାଇ ବାସୁଦେବ ବେଶ ବାଷ୍ପରୁଦ୍ଧ କଣ୍ଠରେ ଗଣମାଧ୍ୟମକୁ ସୂଚନା ଦେଇଛନ୍ତି। ବାସୁଦେବ କହିଛନ୍ତି, ଅଖିଲେଶ କରୋନା ଲକଡାଉନ ପୂର୍ବରୁ ଶେଷଥର ପାଇଁ ଘରକୁ ଆସିଥିଲେ। ସେ ଜଣେ ଭଲ ମଣିଷ ଓ ପାଇଲଟ ଭାବେ ବେଶ ପ୍ରଶଂସା ସାଉଁଟି ଥିଲେ।
ଆସନ୍ତା ୧୦ରୁ ୧୫ ଦିନ ମଧ୍ୟରେ ତାଙ୍କ ପତ୍ନୀ ଗୋଟିଏ ସନ୍ତାନକୁ ଜନ୍ମ ଦେବାର ଥିଲା। ସେ ୨୦୧୭ରେ ଏୟାର ଇଣ୍ଡିଆରେ ଯୋଗଦେଇଥିଲେ। ୨୦୧୮ ଡିସେମ୍ବର ମାସରେ ତାଙ୍କର ବାହାଘର ହୋଇଥିଲା। ହେଲେ ଏବେ ସବୁ କିଛି ଶେଷ ହୋଇଯାଇଛି।
ଅଖିଲେଶଙ୍କ ବାପା ତୁଲସୀ ରାମ କହିଛନ୍ତି, ଆମକୁ ଫୋନ ଯୋଗେ ବିମାନ ଦୁର୍ଘଟଣାର ସୂଚନା ଦିଆଯାଇଥିଲା। ପ୍ରଥମେ ଅଖିଲେଶର ଅବସ୍ଥା ଗୁରୁତର ଥିବା ଆମକୁ କୁହାଯାଇଥିଲା। ଏହାପରେ ମୃତ୍ୟୁ ସମ୍ପର୍କରେ ଆମକୁ ସୂଚନା ଦିଆଗଲା। ଏବେ ଅଖିଲେଶର ସାନ ଭାଇ ଓ ଭିଣୋଇ କେରଳ ଯାଇଥିବା ସେ କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।