ନୂଆଦିଲ୍ଲୀ: ଦେଶର ପୂର୍ବତନ ରାଷ୍ଟ୍ରପତି ତଥା ଭାରତ ରତ୍ନ ପ୍ରଣବ ମୁଖାର୍ଜୀଙ୍କ ଅବସ୍ଥା ଅତ୍ୟନ୍ତ ଗମ୍ଭୀର ହୋଇଯାଇଛି। ସୋମବାର ରାତିରୁ ଭେଣ୍ଟିଲେଟରରେ ଥିବା ପ୍ରଣବ ଦା’ ଏବେ କୋମାକୁ ଚାଲି ଯାଇଛନ୍ତି। ତାଙ୍କ ସ୍ୱାସ୍ଥ୍ୟାବସ୍ଥାରେ କୌଣସି ପରିବର୍ତ୍ତନ ହେଉନାହିଁ ବୋଲି ଦିଲ୍ଲୀ ସ୍ଥିତି ଆର୍ମିର ରିସିର୍ଚ୍ଚ ଆଣ୍ଡ ରେଫରାଲ ହସ୍ପିଟାଲ ପକ୍ଷରୁ ସୂଚନା ଦିଆଯାଇଛି।
ପ୍ରଣବ ଦା’ଙ୍କ ସ୍ୱାସ୍ଥ୍ୟାବସ୍ଥା ଉପରେ ନଜର ରଖିଥିବା ଡାକ୍ତରମାନଙ୍କ କହିବା ଅନୁଯାୟୀ ବ୍ରେନ ସର୍ଜରୀ ପରେ ତାଙ୍କର ଅବସ୍ଥା ସଙ୍କଟାପନ୍ନ ହୋଇଥିଲା। ତାଙ୍କୁ ଭେଣ୍ଟିଲେଟରରେ ରଖାଯାଇଥିଲେ। ଏବେ ତାଙ୍କ ସ୍ୱାସ୍ଥ୍ୟାବସ୍ଥାରେ କୌଣସି ପରିବର୍ତ୍ତନ ଆସୁନାହିଁ ଓ ସେ ଗଭୀର କୋମାକୁ ଚାଲି ଯାଇଛନ୍ତି। ତାଙ୍କ ଗୁରୁତ୍ୱପୂର୍ଣ୍ଣ ଅଙ୍ଗଗୁଡ଼ିକ ସ୍ଥିର ରହିଛି ଓ ସେ ପୂର୍ବଭଳି ଭେଣ୍ଟିଲେଟରରେ ରହିଛନ୍ତି ବୋଲି ହସ୍ପିଟାଲ ପକ୍ଷରୁ କୁହାଯାଇଛି।
କିଛି ଦିନ ତଳେ ଘରର ବାଥରୁମରେ ପଡ଼ିଯିବାରୁ ପ୍ରଣବ ଦା’ଙ୍କ ମୁଣ୍ଡରେ ରକ୍ତ ଜମାଟ ବାନ୍ଧି ଯାଇଥିଲା। ଏହି କାରଣରୁ ସେ ଅଗଷ୍ଟ ୧୦ରେ ବ୍ରେନ ସର୍ଜରୀ ପାଇଁ ହସ୍ପିଟାଲ ଆସିଥିଲେ। ଏହି ସମୟରେ ତାଙ୍କର କରୋନା ପରୀକ୍ଷା କରାଯାଇଥିଲା ଓ ଏହା ପଜିଟିଭ ଆସିଥିଲା। ତଥାପି ହସ୍ପିଟାଲ ପକ୍ଷରୁ ତାଙ୍କର ବ୍ରେନ ସର୍ଜରୀ କରାଯାଇଥିଲା। ସର୍ଜରୀ ପରେ ସେ ଭେଣ୍ଟିଲେଟରରେ ହିଁ ରହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।