ବେଙ୍ଗାଲୁରୁ: ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ପରେ ବୟାନ ଦେଇ ଚର୍ଚ୍ଚାରେ ରହିଥିବା ଅଭିନେତ୍ରୀ କଙ୍ଗନା ରାଣାୱତଙ୍କ ଅଡ଼ୁଆ ବଢ଼ିଛି। କେନ୍ଦ୍ରର କୃଷି ବିଲକୁ ବିରୋଧ କରି ଆନ୍ଦୋଳନ କରୁଥିବା ଚାଷୀଙ୍କ ସମ୍ପର୍କରେ କଙ୍ଗନା ବିବାଦୀୟ ବୟାନ ଦେଇଥିଲେ। ଏଥିପାଇଁ ଆଜି କର୍ଣ୍ଣାଟକାର ତୁମକୁର ଜେଏମଏଫସି କୋର୍ଟରେ ତାଙ୍କ ନାଁରେ ଅପରାଧିକ ମାମଲା ରୁଜୁ କରାଯାଇଛି।
କେନ୍ଦ୍ର ସରକାର ସଂସଦରେ ପାରିତ କରିଥିବା ବିବାଦୀୟ ଚାଷୀ ବିଲକୁ ଦେଶର ଅଧିକାଂଶ ଚାଷୀ ସଂଗଠନ ବିରୋଧ କରୁଛନ୍ତି। ଏଥିପାଇଁ ଗତକାଲି ଚାଷୀ ସଂଗଠନ ପକ୍ଷରୁ ଭାରତ ବନ୍ଦ ଡାକରା ଦିଆଯାଇଥିଲା। ତେବେ ଚାଷୀ ବିଲକୁ ବିରୋଧ କରି ଆନ୍ଦୋଳନ କରୁଥିବା ଚାଷୀ ଓ ଲୋକଙ୍କୁ ସେପ୍ଟେମ୍ବର ୨୦ରେ କଙ୍ଗନା ଆତଙ୍କବାଦୀ ବୋଲି କହିଥିଲେ। କଙ୍ଗାନଙ୍କ ଏହି ଟ୍ୱିଟ ପାଇଁ ଧାରା ୪୪,୧୦୮,୧୫୩, ୧୫୩ ଏ ଓ ୫୦୪ରେ ଅପରାଧିକ ମାମଲା ରୁଜୁ କରାଯାଇଛି।
ନୂଆ ବିଲକୁ ନେଇ ସୃଷ୍ଟି ହୋଇଥିବା ବିବାଦ ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ୱିଟ କରି ସ୍ପଷ୍ଟୀକରଣ ଦେବାକୁ ଚେଷ୍ଟା କରିଥିଲେ। ଏହା ଉପରେ ପ୍ରତିକ୍ରିୟା ଦେବାକୁ ଯାଇ କଙ୍ଗନା ରି-ଟ୍ୱିଟ କରିଥିଲେ।
ଏଥିରେ ସେ ଲେଖିଥିଲେ, “ପ୍ରଧାନମନ୍ତ୍ରୀ, ଜଣେ ଶୋଇଥିଲେ, ତାଙ୍କୁ ଉଠାଇ ହେବ। ଯଦି କେହି ବୁଝି ପାରୁନାହାନ୍ତି, ତା’ହେଲେ ସେମାନଙ୍କୁ ତଥ୍ୟ ଦେଇ ବୁଝାଇ ହେବ। କିନ୍ତୁ ଜଣେ ଯଦି ଶୋଇବାର ଅଭିନୟ କରୁଥିବ ଓ ବୁଝିବାକୁ ଚାହୁଁ ନଥିବ, ତା’ହେଲେ ତାଙ୍କୁ କ’ଣ କରାଯିବ? ଏମାନେ ହେଉଛନ୍ତି ସେହି ସମାନ ଆତଙ୍କବାଦୀ। ସିଏଏ ଦ୍ୱାରା ଜଣେ ବି ନାଗରିକତା ହରାଇ ନାହାନ୍ତି। କିନ୍ତୁ ସେମାନେ ଏଥିପାଇଁ ପ୍ରବଳ ରକ୍ତପାତ କରିଥିଲେ।”
କଙ୍ଗନା ନିଜ ବୟାନ ଜରିଆରେ ଆନ୍ଦୋଳନକାରୀ ଚାଷୀ ଓ ବିରୋଧୀ ଦଳଗୁଡ଼ିକୁ ଆତଙ୍କବାଦୀଙ୍କ ସହ ତୁଳନା କରିଥିବାରୁ ବିବାଦ ସୃଷ୍ଟି ହୋଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
