ଅମରାବତୀ: ମତଦାନ କେନ୍ଦ୍ରରେ ଇଭିଏମ୍ କଚାଡ଼ି ଭାଙ୍ଗି ଦେଲେ ଜଣେ ବିଧାୟକ ପ୍ରାର୍ଥୀ। ଏ ଘଟଣା ଘଟିଛି ଆନ୍ଧ୍ରପ୍ରଦେଶର ଅନନ୍ତପୁର ଜିଲ୍ଲାର ଗୁଣ୍ଟକଲ ନିର୍ବାଚନ ମଣ୍ଡଳୀରେ। ଏହି ବିଧାୟକ ପ୍ରାର୍ଥୀଙ୍କ ନାଁ ମଧୁସୂଦନ ଗୁପ୍ତା। ସେ ଜନସେନା ପକ୍ଷରୁ ପ୍ରାର୍ଥୀ ହୋଇଥିବା ବେଳେ ତାଙ୍କୁ ନିର୍ବାଚନ ଡ୍ୟୁଟିରେ ଥିବା ପୁଲିସ୍ ଗିରଫ କରିଛି।
#WATCH Jana Sena MLA candidate Madhusudhan Gupta smashes an Electronic Voting Machine (EVM) at a polling booth in Gooty, in Anantapur district. He has been arrested by police. #AndhraPradesh pic.twitter.com/VoAFNdA6Jo
— ANI (@ANI) April 11, 2019
ଅନନ୍ତପୁର ଜିଲ୍ଲାର ଗୁତି ସ୍ଥିତ ବୁଥ୍କୁ ମଧୁସୂଦନ ଭୋଟ୍ ଦେବାକୁ ଆସିଥିଲେ। ତେବେ ଇଭିଏମ୍ରେ ବିଧାନସଭା ଓ ଲୋକସଭା ଆସନର ନାଁ ଭଲ ଭାବେ ଦେଖା ନଯିବାରୁ ସେ ଏହାକୁ କଚାଡ଼ି ଭାଙ୍ଗି ଦେଇଥିଲେ ବୋଲି ଜଣାପଡ଼ିଛି। ସେ ପ୍ରଥମେ ଏନେଇ ପୋଲିଂ ଅଧିକାରୀଙ୍କ ନିକଟରେ ଅଭିଯୋଗ କରି ଥିଲେ। ତେବେ ସନ୍ତୋଷଜନକ ଉତ୍ତର ନ ପାଇବାରୁ ସେ ଇଭିଏମ୍କୁ ତଳେ କଚାଡ଼ି ଭାଙ୍ଗି ଦେଇଥିଲେ ଏବଂ ପାଟିତୁଣ୍ଡ କରିଥିଲେ। ଏହାପରେ ପୁଲିସ୍ ତାଙ୍କୁ ଗିରଫ କରିଥିଲା।
ଆନ୍ଧ୍ର ପ୍ରଦେଶରେ ଆଜି ଏକା ସାଙ୍ଗରେ ସମସ୍ତ ୨୫ଟି ଲୋକସଭା ଆସନ ଓ ଏହା ଅନ୍ତର୍ଗତ ୧୭୫ଟି ବିଧାନସଭା ଆସନ ପାଇଁ ମତଦାନ ଚାଲିଛି। କିଛି ସ୍ଥାନରେ ଇଭିଏମ୍ରେ ଯାନ୍ତ୍ରିକ ତ୍ରୁଟି ଯୋଗୁ ମତଦାନ ବିଳମ୍ବରେ ଆରମ୍ଭ ହୋଇଥିଲା।
ଆନ୍ଧ୍ର ପ୍ରଦେଶର ମୁଖ୍ୟ ନିର୍ବାଚନ ଅଧିକାରୀ ନିଜର ଭୋଟ୍ ଦେବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଥିଲେ, ୫୦ଟି ସ୍ଥାନରେ ଇଭିଏମରେ ତ୍ରୁଟି ଦେଖାଯାଇଥିବା ଅଭିଯୋଗ ଆସିଛି। ସମସ୍ୟାର ସମାଧାନ ପାଇଁ ବୈଷୟିକ ଟିମ୍କୁ ନିୟୋଜିତ କରାଯାଇଛି।
ଆନ୍ଧ୍ର ପ୍ରଦେଶରେ ପାଖାପାଖି ୪ କୋଟି ଭୋଟର ଥିବା ଜଣାପଡ଼ିଛି। ୧୭୫ଟି ବିଧାନସଭା ଆସନ ପାଇଁ ୨ ହଜାର ୧୧୮ ଜଣ ପ୍ରାର୍ଥୀ ହୋଇଥିବା ବେଳେ ୨୫ଟି ଲୋକସଭା ଆସନ ପାଇଁ ୨୧୯ ଜଣ ପ୍ରାର୍ଥୀ ହୋଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
