କାବୁଲ: ଆଫଗାନିସ୍ତାନର ଗୋଟିଏ ଜେଲ ମଧ୍ୟରେ ବନ୍ଧୁକଧାରୀମାନେ ପ୍ରବେଶ କରି ଆଖିବୁଜା ଗୁଳିମାଡ଼ କରିଛନ୍ତି। ଏଥିରେ ୨୯ ଜଣଙ୍କ ଜୀବନ ଯାଇଥିବା ବେଳେ ୫୦ରୁ ଅଧିକ ଲୋକ ଆହତ ହୋଇଛନ୍ତି। ଏହି ଆକ୍ରମଣ ପାଇଁ ବିଦ୍ରୋହୀ ସଂଗଠନ ଆଇଏସଆଇଏଲ ନିଜକୁ ଦାୟୀ କରିଛି।
ଆଫଗାନିସ୍ତାନର ଜଲାଲବାଦ ଠାରେ ଜେଲରେ ହୋଇଥିବା ଆକ୍ରମଣରେ କଏଦୀଙ୍କ ବ୍ୟତୀତ, ସାଧାରଣ ନାଗରିକ, ଜେଲ କର୍ମଚାରୀ ଓ ଆଫଗାନିସ୍ତାନର ସୁରକ୍ଷାକର୍ମୀ ପ୍ରାଣ ହରାଇଥିବା ସରକାରଙ୍କ ପକ୍ଷରୁ କୁହାଯାଇଛି। ସମସ୍ତ ଆହତଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ଲୋକଙ୍କ ଅବସ୍ଥା ସଙ୍କଟାପନ୍ନ ରହିଛି।
ପ୍ରଥମେ ବିଦ୍ରୋହୀମାନେ ବିସ୍ଫୋରକ ଖଚିତ ଗାଡ଼ିକୁ ଜେଲର ପ୍ରବେଶ ପଥରେ ରଖିଥିଲେ। କେହି କିଛି ବୁଝିବା ଆଗରୁ ଏହା ଭୟଙ୍କର ବିସ୍ଫୋରଣ କରିଥିଲା। ଏହାପରେ ବନ୍ଧୁକଧାରୀମାନେ ଜେଲ ମଧ୍ୟରେ ପ୍ରବେଶ କରି ଆଖିବୁଜା ଗୁଳିମାଡ଼ କରିଥିଲେ। ଜେଲ ମଧ୍ୟରେ ଆଇଏସଆଇଏଲ ଓ ତାଲିବାନ ଆତଙ୍କବାଦୀଙ୍କ ସମେତ ପ୍ରାୟ ୨ ହଜାର କଏଦ ରହିଥିଲେ।
ସୁରକ୍ଷାକର୍ମୀଙ୍କ ପାଲଟା ଆକ୍ରମଣରେ ବିଦ୍ରୋହୀ ଗୋଷ୍ଠୀର କିଛି ସଦସ୍ୟ ମଧ୍ୟ ପ୍ରାଣ ହରାଇଛନ୍ତି। ଜେଲ ମଧ୍ୟରୁ କିଛି କଏଦୀ ଏହାର ସୁଯୋଗ ନେଇ ଫେରାର ହୋଇଯାଇଥିବା କୁହାଯାଉଛି। ସମଗ୍ର ଜଲାଲବାଦରେ କର୍ଫ୍ୟୁ ଲାଗୁ କରାଯାଇ ସୁରକ୍ଷାକର୍ମୀଙ୍କ ପକ୍ଷରୁ ସର୍ଚ୍ଚ ଅପରେସନ ଜୋରଦାର କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।