ରାମପୁର: ଉତ୍ତର ପ୍ରଦେଶର ଅଜିମ ନଗର ପୁଲିସ୍ ଷ୍ଟେସନ ଅଞ୍ଚଳରେ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଏଥିରେ ୭ ଜଣଙ୍କ ଜୀବନ ଯାଇଥିବା ବେଳେ ଆଉ ୪ ଜଣ ଆହତ ହୋଇଛନ୍ତି। ଆହତଙ୍କ ଅବସ୍ଥା ସଙ୍କଟାପନ୍ନ ରହିଛି ଓ ସେମାନଙ୍କୁ ସ୍ୱତନ୍ତ୍ର ଡାକ୍ତରୀ ଟିମ୍ ଚିକିତ୍ସା କରୁଛନ୍ତି।
ମିଳିଥିବା ସୂଚନା ଅନୁଯାୟୀ, ମୋରଦାବାଦ ଜିଲ୍ଲାରେ ରହୁଥିବା ୧୧ ଜଣ ଲୋକ ଗୋଟିଏ କାର୍ରେ ରାମପୁରରେ ଆୟୋଜିତ ବାହାଘର କାର୍ଯ୍ୟକ୍ରମକୁ ଯାଉଥିଲେ। ତେବେ ଅଧା ବାଟରେ ସେମାନଙ୍କ କାର୍ ପ୍ରଥମେ ଗୋଟିଏ ବିଦ୍ୟୁତ ଖୁଣ୍ଟିକୁ ଧକ୍କା ଦେଇଥିଲା। ଏହାପରେ ରାସ୍ତା କଡ଼ରେ ଥିବା ଗୋଟିଏ ଗଛରେ ପିଟି ହୋଇଥିଲା।
ଦୁର୍ଘଟଣା ଏତେ ଭୟଙ୍କର ଥିଲା ଘଟଣାସ୍ଥଳରେ ହିଁ ୬ ଜଣଙ୍କ ମୃତ୍ୟୁ ଘଟିଥିଲା। ଚିକିତ୍ସାଧୀନ ଅବସ୍ଥାରେ ଆଉ ଜଣଙ୍କ ଜୀବନ ଯାଇଛି। ଏବେ ହସ୍ପିଟାଲରେ ଆଉ ୪ ଜଣ ଚିକିତ୍ସିତ ହେଉଛନ୍ତି। ସେମାନଙ୍କ ଅବସ୍ଥା ମଧ୍ୟ ସଙ୍କଟାପନ୍ନ ଥିବା ପୁଲିସ୍ କହିଛି।
ପୁଲିସ୍ କହିଛି ଯେ ମୃତାହତମାନେ ରାହାତା ମାଫି ଗାଁର। ଦୁର୍ଘଟଣା ବେଳେ କାରର ବେଗ ଅତ୍ୟନ୍ତ ଅଧିକ ଥିଲା। ତେଣୁ ଏତେ ବଡ଼ ଘଟଣା ଘଟିଛି। ଦୁର୍ଘଟଣାରେ ବୀନିତ, ରାଜେଶ, କ୍ରଶାବ, ଆକାଶ ସକସେନା, ବିବେକ ଚୌହାନ, ସୌରଭ ଓ ତୁରଣଙ୍କ ମୃତ୍ୟୁ ଘଟିଛି। ରାମପୁର ଜିଲ୍ଲା ହସ୍ପିଟାଲର ଡେପୁଟି ମୁଖ୍ୟ ମେଡିକାଲ ଅଫିସର ଡାକ୍ତର ଦଶରତ ସିଂହ କହିଛନ୍ତି, “ଆମେ ପ୍ରଥମେ ୬ଟି ମୃତଦେହ ଗ୍ରହଣ କରିଥିଲୁ। ଚିକିତ୍ସାଧୀନ ଅବସ୍ଥାରେ ଗୁରୁତର ଆହତ ହୋଇଥିବା ତୁରଣ ନାମକ ଆଉ ଜଣେ ଯୁବକଙ୍କ ମୃତ୍ୟୁ ଘଟିଛି। ଅନ୍ୟ ଆହତମାନେ ଆଇସିୟୁରେ ଅଛନ୍ତି ଓ ସେମାନଙ୍କୁ ମୀରଟ ସ୍ଥାନାନ୍ତର କରାଯାଇଛି।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
