ବିବାଦ ଭିତରେ କାଲି ସୋନିଆ ଗାନ୍ଧିଙ୍କୁ ଭେଟିବେ ପଞ୍ଜାବ ମୁଖ୍ୟମନ୍ତ୍ରୀ

ନୂଆଦିଲ୍ଲୀ: ଆସନ୍ତାବର୍ଷ ବିଧାନସଭା ନିର୍ବାଚନ ପୂର୍ବରୁ ପଞ୍ଜାବ କଂଗ୍ରେସରେ ସୃଷ୍ଟି ହୋଇଥିବା କନ୍ଦଳ ଦିନକୁ ଦିନ ତୀବ୍ର ହେବାରେ ଲାଗିଛି। ପଞ୍ଜାବ ମୁଖ୍ୟମନ୍ତ୍ରୀ କ୍ୟାପ୍ଟେନ ଅମରିନ୍ଦର ସିଂହ ଓ ବରିଷ୍ଠ ନେତା ନବଜୋତ ସିଂହ ସିଦ୍ଧୁଙ୍କ ମଧ୍ୟରେ ସୃଷ୍ଟି ହୋଇଥିବା କ୍ଷମତା ଯୁଦ୍ଧକୁ ପ୍ରଶମିତ କରିବା ପାଇଁ ଦଳୀୟ ହାଇକମାଣ୍ଡ ଉଦ୍ୟମ ଜାରି ରଖିଛନ୍ତି।

ବିବାଦର ସମାଧାନ କରିବା ଦିଗରେ ଆଲୋଚନା କରିବା ପାଇଁ ଆସନ୍ତାକାଲି ମୁଖ୍ୟମନ୍ତ୍ରୀ ଅମରିନ୍ଦର ସିଂହ କଂଗ୍ରେସର ଅନ୍ତରୀଣ ଅଧ୍ୟକ୍ଷ ସୋନିଆ ଗାନ୍ଧିଙ୍କୁ ଭେଟିବେ। ଶ୍ରୀ ସିଂହ ଦିଲ୍ଲୀ ଯାଇ ସୋନିଆଙ୍କୁ ତାଙ୍କ ବାସଭବନରେ ଭେଟିବାର କାର୍ଯ୍ୟକ୍ରମ ରହିଛି।

ଗତ ସପ୍ତାହରେ ସିଦ୍ଧୁ ଦିଲ୍ଲୀ ଯାଇ ରାହୁଲ ଗାନ୍ଧି ଓ ପ୍ରିୟଙ୍କା ଗାନ୍ଧି ଭଦ୍ରାଙ୍କୁ ଭେଟି ନିଜର ଦାବି ଜଣାଇଥିଲେ। ଏହାର କିଛି ଦିନ ପୂର୍ବରୁ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ବିବାଦର ସମାଧାନ ପାଇଁ ସୋନିଆ ଗାନ୍ଧି ନିଯୁକ୍ତ କରିଥିବା ୩ ଜଣିଆ କମିଟି ନିକଟରେ ହାଜର ହୋଇଥିଲେ।

ସେ କମିଟି ନିକଟରେ ହାଜର ହେବାକୁ ଦିଲ୍ଲୀ ଯାଇଥିଲେ ହେଁ ଗାନ୍ଧି ପରିବାରର କୌଣସି ସଦସ୍ୟଙ୍କୁ ନ ଭେଟି ପଞ୍ଜାବ ଫେରିଥିଲେ। ଏବେ କିନ୍ତୁ ସେ ସୋନିଆ ଗାନ୍ଧିଙ୍କୁ ଭେଟିବେ।

ଆସନ୍ତାକାଲିର ବୈଠକ ବେଶ ଗୁରୁତ୍ୱପୂର୍ଣ୍ଣ। କାରଣ ବିବାଦର ସମାଧାନ ପାଇଁ ସିଦ୍ଧୁଙ୍କୁ ପଞ୍ଜାବ କଂଗ୍ରେସ କିମ୍ବା ରାଜ୍ୟ ସରକାରରେ କୌଣସି ବଡ଼ ପଦ ଦେବା ସମ୍ପର୍କରେ ସୋନିଆ କାଲି ଶ୍ରୀ ସିଂହଙ୍କ ସହ ଆଲୋଚନା କରିବେ। ଶ୍ରୀ ସିଂହଙ୍କୁ ରାଜି କରାଇବା ପାଇଁ ସୋନିଆ ସବୁ ପ୍ରକାରର ପଦକ୍ଷେପ ଗ୍ରହଣ କରିବାକୁ କସରତ ଆରମ୍ଭ କରିଛନ୍ତି।

ସୂତ୍ର ଅନୁସାରେ, ସିଦ୍ଧୁଙ୍କ ସହ ଆଉ ଜଣେ କଂଗ୍ରେସର ପଞ୍ଜାବ ମୁଖ୍ୟ ହୋଇପାରନ୍ତି। ସେହିପରି ନିର୍ବାଚନ ପୂର୍ବରୁ ପଞ୍ଜାବ କ୍ୟାବିନେଟରେ କିଛି ପରବର୍ତ୍ତନ ମଧ୍ୟ ହୋଇପାରେ। ସିଦ୍ଧୁ ନିକଟରେ ପ୍ରିୟଙ୍କାଙ୍କୁ ଭେଟି ୪ ଘଣ୍ଟା କାଳ ଆଲୋଚନା କରିଥିଲେ। ଏହାପରେ ସେ ରାହୁଲଙ୍କୁ ଭେଟିଥିଲେ।

ରାହୁଲ ପ୍ରଥମେ ସିଦ୍ଧୁଙ୍କ ସହ କୌଣସି ବୈଠକ ପାଇଁ ସମୟ ଧାର୍ଯ୍ୟ ହୋଇ ନଥିବା କହିଥିଲେ। ହେଲେ ପ୍ରିୟଙ୍କା ତାଙ୍କୁ ବୁଝାଇବା ପରେ ସେ ସିଦ୍ଧୁଙ୍କ ସହ ବିଭିନ୍ନ ପ୍ରସଙ୍ଗରେ ୪୫ ମିନିଟ୍‌ ଧରି ଆଲୋଚନା କରିଥିଲେ। ଏହି ସମୟରେ ଉଭୟ ରାହୁଲ ଓ ପ୍ରିୟଙ୍କା ପଞ୍ଜାବ କଂଗ୍ରେସରେ ସିଦ୍ଧୁଙ୍କୁ ବଡ଼ ପଦବୀ ଦେବାକୁ ସହମତି ହୋଇଥିବା ଜଣାପଡ଼ିଛି।

ଆସନ୍ତାକାଲିର ବୈଠକ ପରେ ୭ରୁ ୧୦ ତାରିଖ ମଧ୍ୟରେ କଂଗ୍ରେସ ହାଇକମାଣ୍ଡ ପଞ୍ଜାବ ସମ୍ପର୍କରେ ବଡ଼ ଘୋଷଣା କରିବାକୁ ଯୋଜନା ରଖିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।