ୱାଶିଂଟନ: ଆମେରିକା ରାଷ୍ଟ୍ରପତି ଜୋ ବାଇଡେନ୍ ବିଭିନ୍ନ ଦେଶର ୪୦ ଜଣ ନେତାଙ୍କୁ ବିଶ୍ୱ ପରିବେଶ ସମ୍ମିଳନୀକୁ ନିମନ୍ତ୍ରଣ କରିଛନ୍ତି। ଏମାନଙ୍କ ମଧ୍ୟରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ରହିଛନ୍ତି। ଏପ୍ରିଲ ୨୨-୨୩ ଦୁଇ ଦିନ ଧରି ଭିଡିଓ କନଫରେନ୍ସିଂ ମାଧ୍ୟମରେ ଏହି ସମ୍ମିଳନୀ ଆୟୋଜନ ହେବ।
ଲୋକମାନେ ଯେମିତି କାର୍ଯ୍ୟକ୍ରମକୁ ଦେଖିପାରିବେ, ସେଥିପାଇଁ ଏହାର ସିଧାପ୍ରସାରଣର ବ୍ୟବସ୍ଥା କରାଯିବ ବୋଲି ହ୍ୱାଇଟ ହାଉସ ପକ୍ଷରୁ କୁହାଯାଇଛି। ହ୍ୱାଇଟ ହାଉସ ପକ୍ଷରୁ କୁହାଯାଇଛି ଯେ ଚଳିତ ବର୍ଷ ଗ୍ଲାସଗୋରେ ମିଳିତ ଜାତିସଂଘର କ୍ଲାଇମେଟ୍ ଚେଞ୍ଜ କନଫରେନ୍ସ(ସିଓପି୨୬) ଅନୁଷ୍ଠିତ ହେବ।
ଏହାପୂର୍ବରୁ ଆମେରିକା ନେତୃତ୍ୱରେ ବିଶ୍ୱ ପରିବେଶ ସମ୍ମିଳନୀ କରାଯିବ। ଏହା ସିଓପି୨୬ ପାଇଁ ଏକ ମାଇଲଷ୍ଟୋନ ଭାବେ ଉଭା ହେବ। ଏଥିପାଇଁ ବିଶ୍ୱର ୪୦ ବିଶିଷ୍ଟ ବ୍ୟକ୍ତିଙ୍କୁ ସମ୍ମିଳନୀ ପାଇଁ ନିମନ୍ତ୍ରଣ କରାଯାଇଛି। ପରିବେଶର ସୁରକ୍ଷା ପାଇଁ କ’ଣ କରାଯାଇ ପାରିବ ଓ ଏହାଦ୍ୱାରା ଆର୍ଥିକ ଫାଇଦା କେମିତି ମିଳିବ, ସେସବୁର ଆଲୋଚନା ବିଶ୍ୱ ପରିବେଶ ସମ୍ମିଳନୀରେ କରାଯିବ ବୋଲି ହ୍ୱାଇଟ ହାଉସ କହିଛି।
ଏହି ସମ୍ମିଳନୀ ପାଇଁ ମୋଦିଙ୍କ ବ୍ୟତୀତ ଚାଇନା ରାଷ୍ଟ୍ରପତି ସି ଜିନପିଙ୍ଗ, ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ, ଜାପାନ ପ୍ରଧାନମନ୍ତ୍ରୀ ୟୋଶିହିଡେ ସୁଗା, ବ୍ରାଜିଲ ରାଷ୍ଟ୍ରପତି ଜାଇର ବୋଲସୋନାରୋ, କାନାଡା ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ, ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ, ସାଉଦି ଆରବ ରାଜା ସଲମାନ ବିନ୍ ଅବଦୁଲାଜିଜ ଅଲ ସାଉଦ ଓ ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ ପ୍ରମୁଖ ରହିଛନ୍ତି।
ବାଂଲାଦେଶ ପ୍ରଧାନମନ୍ତ୍ରୀ ଶେଖ ହସିନା ଓ ବୁଟାନ ପ୍ରଧାନମନ୍ତ୍ରୀ ଲୋଟାୟ ଟଶେରିଂଙ୍କୁ ମଧ୍ୟ ଦୁଇ ଦିନିକିଆ ବିଶ୍ୱ ପରିବେଶ ସମ୍ମିଳନୀକୁ ନିମନ୍ତ୍ରଣ କରାଯାଇଛି। ଆମେରିକା ସମସ୍ତଙ୍କୁ ନିମନ୍ତ୍ରଣ କରି ସବୁ ଦେଶର ରାଷ୍ଟ୍ରମୁଖ୍ୟକୁ ପରିବେଶ ସୁରକ୍ଷା ଉପରେ ମତ ରଖିବାକୁ କୁହାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
