ନୂଆଦିଲ୍ଲୀ: କେନ୍ଦ୍ରର କୃଷି ଆଇନ ବିରୋଧରେ ଆନ୍ଦୋଳନ କରୁଥିବା ଜଣେ ଚାଷୀଙ୍କ ଝୁଲନ୍ତା ମୃତଦେ ଦିଲ୍ଲୀ ସୀମାନ୍ତ ସିଙ୍ଘୁ ସୀମାରୁ ମିଳିଛି। ମୃତ ଚାଷୀ ଜଣଙ୍କ ହେଲେ ଗୁରପ୍ରୀତ ସିଂହ। ତାଙ୍କ ଘର ପଞ୍ଜାବର ଫତେପୁର ସାହିବ ଅନ୍ତର୍ଗତ ଅମରୋହ ଗାଁରେ। ଭାରତୀୟ କିଷାନ ୟୁନିୟନର ସିଦ୍ଧୁପୁର ସଂଗଠନର ସଦସ୍ୟ ଭାବେ ଗୁରୁପ୍ରୀତ ବେଶ ଜଣାଶୁଣା ଥିଲେ।
କୁଣ୍ଡଲି ପୁଲିସ୍ ଗୁରୁପ୍ରୀତଙ୍କ ମୃତଦେହ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି। ତେବେ ମୃତ୍ୟୁର କାରଣ ସମ୍ପର୍କରେ କିଛି ବି କହିନି। କେବଳ ସେ ଦୀର୍ଘଦିନ ହେଲା ଅନ୍ୟ ଚାଷୀଙ୍କ ଭଳି ସିଙ୍ଘୁ ସୀମାନ୍ତରେ ହିଁ ଆନ୍ଦୋଳନ କରୁଥିଲେ। ଆଜି ଭୋରରୁ ହଠାତ୍ ତାଙ୍କ ମୃତଦେହ ମିଳିଛି ବୋଲି କୁହାଯାଇଛି।
ଗତ ସପ୍ତାହରେ ଲଖବୀର ସିଂହ ନାମକ ଜଣେ ଶ୍ରମିକଙ୍କ କ୍ଷତବିକ୍ଷତ ଝୁଲନ୍ତା ମୃତଦେହ ସିଙ୍ଘୁ ସୀମାରେ ଲାଗିଥିବା ବ୍ୟାରିକେଡରୁ ଜବତ ହୋଇଥିଲା। ସେ ନିହାଙ୍ଗ ଶିଖଙ୍କ ପବିତ୍ର ଗ୍ରନ୍ଥକୁ ଅପବିତ୍ର କରିବାକୁ ଚେଷ୍ଟା କରୁଥିବାରୁ ତାଙ୍କୁ ଅତ୍ୟନ୍ତ ଅମାନୁଷିକ ଭାବେ ହତ୍ୟା କରାଯାଇଥିଲା। ତାଙ୍କର ଗୋଟିଏ ହାତକୁ କାଟି ଦିଆଯିବା ସହ ବ୍ୟାରିକେଡରେ ଝୁଲାଇ ଦିଆଯାଇଥିଲା। ଏହି ଘଟଣାରେ ପୁଲିସ୍ ନିହାଙ୍ଗ ଶିଖ ସଂପ୍ରଦାୟର ଦୁଇ ଜଣଙ୍କୁ ଗିରଫ କରିଥିଲା। ସେହିପରି ଆଉ ଦୁଇ ଜଣ ସୋନିପତ ପୁଲିସ୍ ନିକଟରେ ଆତ୍ମସମର୍ପଣ କରିଥିଲେ।
ସୂଚନାଯୋଗ୍ୟ, ଦୀର୍ଘ ଗୋଟିଏ ବର୍ଷ ହେଲାଣି ପଞ୍ଜାବ, ଉତ୍ତର ପ୍ରଦେଶ ଓ ହରିୟାଣାର ଶତାଧିକ ଚାଷୀ ଦିଲ୍ଲୀର ସୀମାନ୍ତରେ ଆନ୍ଦୋଳନ କରୁଛନ୍ତି। କେନ୍ଦ୍ର ସରକାର ଆଣିଥିବା ୩ଟି ଯାକ କୃଷି ଆଇନକୁ ପ୍ରତ୍ୟାହାର ସହ ଏମଏସ୍ପି ଉପରେ ଆଇନଗତ ମାନ୍ୟତା ଦେବାକୁ ସେମାନେ ଦାବି କରୁଛନ୍ତି।
ହେଲେ କେନ୍ଦ୍ର ସରକାର କୃଷି ଆଇନ ପ୍ରତ୍ୟାହାର କରିବା ମୁଡରେ ନାହାନ୍ତି। ତଥାପି ଏହା ଉପରେ ଚୂଡ଼ାନ୍ତ ନିଷ୍ପତ୍ତି ନେବାକୁ ଚାଷୀମାନେ କେନ୍ଦ୍ର ସରକାରଙ୍କୁ ନଭେମ୍ବର ୨୬ ଯାଏ ମହଲତ ଦେଇଛନ୍ତି। ଯଦି ଏହି ସମୟ ସୀମା ମଧ୍ୟରେ ସରକାର କୌଣସି ପ୍ରକାରର ନିଷ୍ପତ୍ତି ନ ନେବେ, ତା’ହେଲେ ଆନ୍ଦୋଳନକୁ ଆହୁରି ତୀବ୍ର କରାଯିବ ବୋଲି ଚାଷୀ ସଂଗଠନର ନେତା ରାକେଶ ଟିକାୟତ ଚେତାବନୀ ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
