ନୂଆଦିଲ୍ଲୀ: ସବୁ ରାଜନୀତିକ ଦଳ ଏବେ ୫ ରାଜ୍ୟରେ ଅନୁଷ୍ଠିତ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଜୋରଦାର ପ୍ରସ୍ତୁତ କରୁଛନ୍ତି। ହେଲେ ଦେଶର ସବୁଠାରୁ ପୁରୁଣା ରାଜନୀତିକ ଦଳ କଂଗ୍ରେସରେ ଦଳ ଡିଆଁ ପର୍ବ ଜାରି ରହିଛି। ପୂର୍ବରୁ ଏକାଧିକ ବରିଷ୍ଠ ନେତା ଦଳ ଛାଡ଼ିଥିବା ବେଳେ ଏବେ ଆଉ ଜଣେ ପୂର୍ବତନ କେନ୍ଦ୍ରମନ୍ତ୍ରୀ ସମାନ ପଦକ୍ଷେପ ନେଇଛନ୍ତି।
ଦଳୀୟ ଅସନ୍ତୋଷ ଯୋଗୁ ପୂର୍ବତନ କେନ୍ଦ୍ରମନ୍ତ୍ରୀ ସିଏମ ଇବ୍ରାହିମ କଂଗ୍ରେସକୁ ବାଏବାଏ କହିଛନ୍ତି। ଦଳରେ ତାଙ୍କୁ ଅଣଦେଖା କରାଯାଉଥିବାରୁ ସେ ଏପରି ପଦକ୍ଷେପ ନେଇଥିବା କହିଛନ୍ତି। କଂଗ୍ରେସ କ୍ଷମତାକୁ ଫେରିବାକୁ ବ୍ୟାକୁଳ ହେଉଥିବା ବେଳେ ଜଣଙ୍କ ପରେ ଜଣେ ବରିଷ୍ଠ ନେତା ଦଳ ଛାଡ଼ିବା ଦଳୀୟ ହାଇକମାଣ୍ଡଙ୍କ ପାରିବା ପଣିଆ ଉପରେ ପ୍ରଶ୍ନ ସୃଷ୍ଟି କରିଛି।
କଂଗ୍ରେସ ଛାଡ଼ିଥିବା ଇବ୍ରାହିମ କର୍ଣ୍ଣାଟକାର ଜଣେ ଟାଣୁଆ ନେତା। ସେ ବିଧାନ ପରିଷଦର ବିରୋଧୀ ଦଳ ନେତା ଭାବେ କାର୍ଯ୍ୟ କରିବାକୁ ଚାହୁଁଥିଲେ। ହେଲେ ଦଳ ତାଙ୍କୁ ଅଣଦେଖା କରି ବିକେ ହରିପ୍ରସାଦଙ୍କୁ ଏହି ପଦରେ ନିଯୁକ୍ତି ଦେଇଛି। ଏଥିପାଇଁ ଇବ୍ରାହିମ କଂଗ୍ରେସରୁ ଇସ୍ତଫା ଦେଇଥିବା ଜଣାପଡ଼ିଛି।
ଇବ୍ରାହିମ କହିଛନ୍ତି, “ଏଆଇସିସି ସଭାପତି ସୋନିଆ ଗାନ୍ଧି ମୋ ଉପରେ ରହିଥିବା ଚାପରୁ ମୋତେ ମୁକ୍ତ କରିଥିବାରୁ ମୁଁ ବହୁତ ଖୁସି। ଏବେ ମୁଁ ମୁକ୍ତ ଭାବେ ମୋର ନିଷ୍ପତ୍ତି ନେଇ ପାରିବି। ମୁଁ ଖୁବଶୀଘ୍ର ମୋର ଶୁଭେଚ୍ଛୁ ମାନଙ୍କ ସହ ଆଲୋଚନା କରିବି ଓ ପବର୍ତ୍ତୀ ପଦକ୍ଷେପ ସମ୍ପର୍କରେ ଘୋଷଣା କରିବି।
ଏଠାରେ କଂଗ୍ରେସ ମୋ ପାଇଁ ଗୋଟିଏ ବନ୍ଦ ଅଧ୍ୟାୟ। କଂଗ୍ରେସ ନିଜକୁ ନିଜେ ଧ୍ୱଂସ କରୁଛି। ଟଙ୍କା ନଥିଲେ କଂଗ୍ରେସରେ କାମ କରିପାରିବା ବେଶ କଷ୍ଟ। ଇନ୍ଦିରା ଗାନ୍ଧି ଓ ନେହରୁଙ୍କ ବେଳେ କଂଗ୍ରେସ ଗୋଟିଏ ସମାଜବାଦ ପାର୍ଟି ଭାବେ କାର୍ଯ୍ୟ କରୁଥିଲା। କିନ୍ତୁ ଏବେ କଂଗ୍ରେସ ‘ଲେନା ବ୍ୟାଙ୍କ’ରେ ପରିଣତ ହୋଇଛି। କଂଗ୍ରେସ କର୍ଣ୍ଣାଟକାରେ ହାରିବ। ରାଜ୍ୟରେ ଦଳ ବୁଡ଼ିବ।”
#WATCH Congress is destroying itself. People cannot work without money in Congress. At the time of Indira Ji and Nehru Ji, Congress was a socialistic party but now it is only a 'Lena bank'. Congress will be defeated in Karnataka. The party has sunk: Congres leader CM Ibrahim pic.twitter.com/xAlcpPmsYw
— ANI (@ANI) January 27, 2022
ବୁଧବାର କଂଗ୍ରେସ ବିକେ ହରିପ୍ରସାଦଙ୍କୁ କର୍ଣ୍ଣାଟକା ବିଧାନ ପରିଷଦର ବିରୋଧୀ ଦଳ ନେତା ଭାବେ ନିଯୁକ୍ତି ଦେଇଛି। ଏସ୍ଆର ପାଟିଲ ଅବସର ନେବା ପରେ ଏହି ପଦ ଖାଲି ପଡ଼ିଥିଲା। କଂଗ୍ରେସର ଏପରି ନିଯୁକ୍ତିକୁ ଇବ୍ରାହିମ ବିରୋଧ କରିଛନ୍ତି। ସେ କହିଛନ୍ତି, “ବିକେ ହରି ପ୍ରସାଦ ଜଣେ ଜୁନିୟର ନେତା। ମୁଁ କେମିତି ତାଙ୍କ ଅଧୀନରେ କାମ କରିବି?”
ଇବ୍ରାହିମ ୧୯୯୬ରେ ଏଚଡି ଦେବଗୌଡ଼ାଙ୍କ ସରକାରରେ ବେସାମରିକ ବିମାନ ଚଳାଚଳ ମନ୍ତ୍ରୀ ଓ ପର୍ଯ୍ୟଟନ ମନ୍ତ୍ରୀ ଭାବେ କାର୍ଯ୍ୟ କରିଥିଲେ। ସେ କହିଛନ୍ତି, “ମୁଁ ଦେବଗୌଡ଼ାଙ୍କ ଭଳି ନେତାଙ୍କୁ ଛାଡ଼ି କଂଗ୍ରେସରେ ମିଶିଥିଲି। ସିଦ୍ଧରମୈୟାଙ୍କ ପାଇଁ ମୁଁ ସବୁ କିଛି କରିଥିଲି। ହେଲେ ସେ ମୋ ସହ କ’ଣ କଲେ? ରାଜ୍ୟର ଯେଉଁମାନେ ମୋତେ ଭଲ ପାଆନ୍ତି ଓ ସମର୍ଥନ କରନ୍ତି, ସେମାନେ କଂଗ୍ରେସକୁ ଉଚିତ ଜବାବ ଦେବେ।”
କଂଗ୍ରେସ ଛାଡ଼ିଥିବା ଇବ୍ରାହିମ ଜେଡିଏସ୍ରେ ହିଁ ମିଶିବେ ବୋଲି କୁହାଯାଉଛି। ସୂଚନାଯୋଗ୍ୟ, କିଛି ଦିନ ତଳେ ପୂର୍ବତନ କେନ୍ଦ୍ରମନ୍ତ୍ରୀ ଆରପିଏନ୍ ସିଂହ କଂଗ୍ରେସ ଛାଡ଼ି ବିଜେପିରେ ମିଶିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।