ପୂର୍ବତନ ପ୍ରେମିକାକୁ ହତ୍ୟା, ୬ ଖଣ୍ଡ କରି କୂଅରେ ଫିଙ୍ଗିଦେଲା ଯୁବକ

ଲକ୍ଷ୍ନୌ: ପୁଣି ଦିଲ୍ଲୀ ହତ୍ୟା ଘଟଣାର ପୁନରାବୃତ୍ତି। ଦିଲ୍ଲୀର ଶ୍ରଦ୍ଧା ହତ୍ୟା ମାମଲା ଏଯାଏଁ ସମାଧାନ ନ ହେଉଣୁ ଏଭଳି ଏକ ସମାନ ଅମାନବୀୟ ଘଟଣା ସାମ୍ନାକୁ ଆସିଛି। ନିଜ ପୂର୍ବତନ ପ୍ରେମିକାକୁ ହତ୍ୟା ପରେ ୬ ଖଣ୍ଡ କରି କାଟି ଦେଇଛି ନୃଶଂସ ପ୍ରେମିକ। କେବଳ ସେତିକି ନୁହେଁ ଖଣ୍ଡ ବିଖଣ୍ଡିତ ମରଶରୀରକୁ ପଲିଥିନ୍‌ରେ ପୂରାଇ କୂଅରେ ଫିଙ୍ଗି ଦେଇଛି ଯୁବକ। ଏଭଳି ଏକ ଛାତିଥରା ଘଟଣା ଘଟିଛି ଉତ୍ତରପ୍ରଦେଶର ଆଜମଗଡରେ।

ଉତ୍ତରପ୍ରଦେଶ ଆଜମଗଡର ପ୍ରିନ୍ସ ଯାଦବ ଓ ଇସାକପୁର ଗାଁର ଆରାଧନା। ଦୁହେଁ ପରସ୍ପରକୁ ଭଲ ପାଉଥିଲେ। ବେଶ୍ କିଛି ଦିନ ଧରି ଉଭୟଙ୍କ ମଧ୍ୟରେ ସମ୍ପର୍କ ମଧ୍ୟ ଥିଲା। କିନ୍ତୁ ଚଳିତ ବର୍ଷ ପ୍ରିନ୍ସଙ୍କୁ ଛାଡି ଅନ୍ୟ ଜଣକୁ ବିବାହ କରିନେଇଥିଲେ ଆରାଧନା। ଏହାକୁ ନେଇ ରାଗି ଯାଇଥିଲା ପ୍ରିନ୍ସ।

UP man who killed ex-girlfriend and cuts her body into 6 parts says 'betrayal' led

ନଭେମ୍ବର ୧୫ ତାରିଖରେ ପ୍ରିନ୍ସ ଆରଧନାକୁ ଦେଖା କରିବାକୁ ଡାକିଥିଲା। ଏହାପରେ ତାଙ୍କୁ ବାଇକ୍‌ରେ ବସାଇ ଏକ ମନ୍ଦିରକୁ ନେଇଥିଲା। ମନ୍ଦିରରେ ପୂର୍ବରୁ ହିଁ ପ୍ରିନ୍ସଙ୍କ ଜଣେ ସମ୍ପର୍କୀୟ ଅପେକ୍ଷା କରିଥିଲେ। ଏହାପରେ ଉଭୟ ପ୍ରିନ୍ସ ଓ ତାଙ୍କ ସମ୍ପର୍କୀୟ ମିଶି ପ୍ରଥମେ ଆରାଧନାଙ୍କୁ ଗଳା ଚିପି ହତ୍ୟା କରିଥିଲେ। ଏହାପରେ ଆଖୁ ବାଡକୁ ନେଇ ତାଙ୍କ ଶରୀରକୁ ଧାରୁଆ ଅସ୍ତ୍ରରେ ୬ ଖଣ୍ଡ କରି ପଲିଥିନ୍‌ରେ ବ୍ୟାଗ୍‌ରେ ପୂରାଇ କୂଅରେ ଫିଙ୍ଗି ଦେଇଥିଲେ। ତେବେ ଆରାଧନାଙ୍କ କଟା ମୁଣ୍ଡକୁ ଉଭୟ ଅଭିଯୁକ୍ତ ଆଖୁ ବାଡ ନିକଟରେ ଥିବା ଏକ ପୋଖରୀରେ ଫିଙ୍ଗିଥିଲେ।

ଏହି ଘଟଣା ସାମ୍ନାକୁ ଆସିବା ପରେ ପୁଲିସ ଅଭିଯୁକ୍ତ ପ୍ରିନ୍ସ ଯାଦବକୁ ଗିରଫ କରିଛି। ଗାଁର ଏକ କୂଅରୁ ମୃତ ଆରାଧନାଙ୍କ ଖଣ୍ଡବିଖଣ୍ଡିତ ମର ଶରୀରକୁ ମଧ୍ୟ ଜବତ କରିଛି ପୁଲିସ। ତେବେ ଆରାଧନାଙ୍କ କଟା ମୁଣ୍ଡକୁ ଖୋଜିବା ଘଟଣାସ୍ଥଳକୁ ଯିବା ବେଳେ ଅଭିଯୁକ୍ତ ପ୍ରିନ୍ସ ଅଧାରାସ୍ତାରେ ପୁଲିସ କବଳରୁ ଫେରାର ହେବାକୁ ଚେଷ୍ଟା କରିଥିଲା। ଏହାପରେ ପୁଲିସ ତା’ଉପରକୁ ଗୁଳିମାଡ କରିଥିଲା। ତାକୁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ପୁଲିସ ଘଟଣାର ତଦନ୍ତ ଜାରି ରଖିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।