ଏହି ସବୁ ଦେଶରେ ପେଟ୍ରୋଲ ଲିଟର୍‌ ୨ରୁ ୪ ଟଙ୍କା, ପଢ଼ନ୍ତୁ ପୂରା ତାଲିକା

ନୂଆଦିଲ୍ଲୀ: ଭାରତରେ ଉଭୟ ପେଟ୍ରୋଲ ଓ ଡିଜେଲ ଦର ପ୍ରତିଦିନ ବୃଦ୍ଧି ପାଇବାରେ ଲାଗିଛି। ସ୍ଥିତି ଏପରି ହୋଇଛି ଯେ କିଛି ସ୍ଥାନରେ ପେଟ୍ରୋଲର ଲିଟର ପିଛା ଦର ୧୦୦ ଟଙ୍କା ମଧ୍ୟ ପାର କରିଗଲାଣି। ଦିଲ୍ଲୀର ତ ପେଟ୍ରୋଲର ଲିଟର ପିଛା ଦର ସର୍ବକାଳୀନ ରେକର୍ଡ କରିଛି। କିନ୍ତୁ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ ବିଶ୍ୱରେ ଏମିତି କିଛି ରାଷ୍ଟ୍ର ରହିଛି, ଯେଉଁଠାରେ ପେଟ୍ରୋଲ ଲିଟର ପିଛା ୨ରୁ ୧୦ ଟଙ୍କା ମଧ୍ୟରେ ବିକ୍ରି କରାଯାଉଛି।

ଭାରତରେ ପେଟ୍ରୋଲ ଓ ଡିଜେଲ ଦର ଫେବୃଆରୀ ୯ରୁ କ୍ରମାଗତ ଭାବେ ବୃଦ୍ଧି ପାଉଛି। ୧୨ ଦିନ ମଧ୍ୟରେ ଦିଲ୍ଲୀରେ ପେଟ୍ରୋଲର ଲିଟର ପିଛା ଦର ୩.୬୩ ଟଙ୍କା ଓ ଡିଜେଲର ଲିଟର ପିଛା ଦର ୩.୮୪ ଟଙ୍କା ମହଙ୍ଗା ହେଲାଣି। ୨୦୨୧ କଥା ବିଚାରକୁ ନେଲେ ତୈଳଦର ପ୍ରାୟ ୨୫ ଥର ବଢ଼ିଲାଣି। ଚଳିତ ବର୍ଷ ପେଟ୍ରୋଲ ୭.୨୨ ଟଙ୍କା ଓ ଡିଜେଲର ଲିଟର ପିଛା ଦର ୭.୪୫ ଟଙ୍କା ମହଙ୍ଗା ହୋଇଛି।

ତେବେ ଆସନ୍ତୁ ଜାଣିବା କେଉଁ ଦେଶରେ ପେଟ୍ରୋଲର ଲିଟର ପିଛା ଦର କେତେ ଅଛି

୧-ଭେନଜୁଏଲାରେ ପେଟ୍ରୋଲର ଲିଟର ପିଛା ଦର ୧.୪୫ ଟଙ୍କାରେ ବିକ୍ରି ହେଉଛି। ଫେବୃଆରୀ ୨୨ରେ ସମଗ୍ର ଭେନଜୁଏଲାରେ ପେଟ୍ରୋଲର ଲିଟର ପିଛା ଦର ଭାରତୀୟ ମୁଦ୍ରାରେ ୧.୪୫ ଟଙ୍କା ରହିଥିଲା ବୋଲି ଅନ୍ତର୍ଜାତୀ ଗଣମାଧ୍ୟମରେ ଖବର ପ୍ରକାଶ ପାଇଛି।

୨-ଭେନଜୁଏଲା ପରେ ଇରାନ ବିଶ୍ୱର ଦ୍ୱିତୀୟ ରାଷ୍ଟ୍ର ଯେଉଁଠାରେ ପେଟ୍ରୋଲ ସବୁଠାରୁ ଶସ୍ତାରେ ଉପଲବ୍ଧ ହୋଇଥାଏ। ବର୍ତ୍ତମାନ ସେଠାରେ ପେଟ୍ରୋଲର ଲିଟର ପିଛା ଦର ମାତ୍ର ୪.୩୯ ଟଙ୍କା ରହିଛି।

୩-ଅଙ୍ଗୋଲାରେ ପେଟ୍ରୋଲ ଲିଟର ୧.୮୦ ଟଙ୍କାରେ ବିକ୍ରି ହେଉଥିବା ଜଣାପଡ଼ିଛି।

୪-ଆଲଜେରିଆରେ ପେଟ୍ରୋଲର ଲିଟର ପିଛା ଦର ୨୫.୦୩ ଟଙ୍କା ରହିଛି।

୫-କ୍ୟୁଏତରେ ପେଟ୍ରୋଲର ଲିଟର ପିଛା ଦର ୨୫.୩୩ ଟଙ୍କା, ସୁଦାନରେ ୨୭.୪୦୭ ଟଙ୍କା ଓ କତାର୍‌ରେ ପେଟ୍ରୋଲ ଲିଟର ୨୯.୮୨୫ ଟଙ୍କାରେ ବିକ୍ରି କରାଯାଉଛି।

ଭାରତରେ ପେଟ୍ରୋଲ ଓ ଡିଜେଲ ଉପରେ ଅଧିକ ଟିକସ ଲାଗୁଛି। ଉଭୟ କେନ୍ଦ୍ର ଓ ରାଜ୍ୟ ସରକାର ଏହା ଉପରେ ଟିକସ ଲଗାଉଥିବାରୁ ଗ୍ରାହକଙ୍କ ପାଖରେ ପହଞ୍ଚିଲା ବେଳକୁ ଏହା ଅତ୍ୟନ୍ତ ମହଙ୍ଗା ହୋଇଯାଉଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।