ସଂସଦ ଘେରାଉରେ ସାମିଲ ହେବେ ୪୦ ଲକ୍ଷ ଟ୍ରାକ୍ଟର, ଚେତାବନୀ ଦେଲେ ରାକେଶ ଟିକାୟତ

ସିକାର(ରାଜସ୍ଥାନ): କେନ୍ଦ୍ର ସରକାର ଯଦି ୩ଟି ଯାକ କୃଷି ଆଇନକୁ ଉଚ୍ଛେଦ ନ କରିବେ, ତା’ହେଲେ ଏହା ବିରୋଧରେ ଆନ୍ଦୋଳନ କରୁଥିବା ଚାଷୀମାନେ ସଂସଦ ଘେରାଉ କରିବେ। ୪ ଲକ୍ଷ ନୁହେଁ ଏଥର ୪୦ ଲକ୍ଷ ଟ୍ରାକ୍ଟରରେ ଚାଷୀମାନେ ସଂସଦ ଯାଏ ରାଲି କରି ଏହାକୁ ଘେରାଉ କରିବେ ବୋଲି ଚାଷୀ ନେତା ରାକେଶ ଟିକାୟତ ସରକାରଙ୍କୁ ଚେତାବନୀ ଦେଇଛନ୍ତି। ଏଥିସହ ଦିଲ୍ଲୀ ମାର୍ଚ୍ଚ ପାଇଁ ଚାଷୀମାନେ ପ୍ରସ୍ତୁତ ରୁହନ୍ତୁ ଓ ଯେକୌଣସି ସମୟରେ ଡାକରା ମିଳିପାରେ ବୋଲି ମଧ୍ୟ ସେ କହିଛନ୍ତି।

ରାଜସ୍ଥାନର ସିକାରରେ ଆୟୋଜିତ କିଷାନ ମହାପଞ୍ଚାୟତରେ ଉଦବୋଧନ ଦେଇ ରାକେଶ ଟିକାୟତ କହିଛନ୍ତି, ଏଥର ସଂସଦ ଘେରାଉ କରିବାକୁ ଡାକରା ଦିଆଯିବ। ଆମେ ଡାକରା ଦେବୁ ଓ ଶୋଭାଯାତ୍ରା ଦିଲ୍ଲୀ ଅଭିମୁଖେ ବାହାରିବ। ଏଥର ୪ ଲକ୍ଷ ବଦଳରେ ୪୦ ଲକ୍ଷ ଟ୍ରାକ୍ଟର ଶୋଭାଯାତ୍ରାରେ ସାମିଲ ହେବେ। ଚାଷୀମାନେ ଇଣ୍ଡିଆ ଗେଟ୍‌ରେ ଚାଷ କରିବେ ଓ ସେଠାରେ ଫସଲ ଅମଳ କରିବେ।

ବିଭିନ୍ନ ଚାଷୀ ସଂଗଠନ ଏକାଠି ହୋଇ ସଂସଦ କେବେ ଘେରାଉ କରାଯିବ, ତା’ର ତାରିଖ ସ୍ଥିର କରିବେ। ଜାନୁଆରୀ ୨୬ରେ ଚାଷୀଙ୍କୁ ବଦନାମ କରିବା ପାଇଁ ଷଡ଼ଯନ୍ତ୍ର କରାଯାଇଥିଲା। କିନ୍ତୁ ସମସ୍ତଙ୍କୁ ମନେ ରଖିବାକୁ ହେବ ଯେ ଦେଶର ଚାଷୀମାନେ ତ୍ରିରଙ୍ଗାକୁ ଭଲ ପାଆନ୍ତି, ଦେଶର ନେତାଙ୍କୁ ନୁହେଁ। ଯଦି କେନ୍ଦ୍ର ସରକାର କୃଷି ଆଇନକୁ ପ୍ରତ୍ୟାହାର ନ କରିବେ ଓ ଏମଏସପି ଲାଗୁ ନ କରିବେ, ତା’ହେଲେ ଚାଷୀମାନେ ବାଧ୍ୟ ହୋଇ ଦେଶରେ ଥିବା ବଡ଼ବଡ଼ କମ୍ପାନୀର ଗୋଦାମଗୁଡ଼ିକୁ ଧ୍ୱଂସ କରିଦେବେ। ଏ ସମ୍ପର୍କରେ ଖୁବଶୀଘ୍ର ତାରିଖ ମଧ୍ୟ ଘୋଷଣା ହେବ ବୋଲି ସେ ଖୋଲାଖୋଲି ଚେତାବନୀ ଦେଇଛନ୍ତି।

ଏହି କିଷାନ ମହାପଞ୍ଚାୟତରେ ସ୍ୱରାଜ ଆନ୍ଦୋଳନା ଯୋଗେନ୍ଦ୍ର ଯାଦବ, ସର୍ବ ଭାରତୀୟ କିଷାନ ସଭାର ଜାତୀୟ ଉପସଭାପତି ଅମର ରାମ ଓ କିଷାନ ୟୁନିୟନର ଜାତୀୟ ସାଧାରଣ ସମ୍ପାଦକ ଚୌଧୁରୀ ଯୁଦ୍ଧବୀର ସିଂହ ପ୍ରମୁଖ ମଧ୍ୟ ଉଦବୋଧନ ଦେଇଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।