ଚେନ୍ନାଇ: ଲଗାଣ ବର୍ଷା ତାମିଲନାଡୁର ଚେନ୍ନାଇ ସ୍ଥିତିକୁ ପୂରା ବେହାଲ କରିଦେଇଛି। ବୁଧବାର ଦିନ ତମାମ ବର୍ଷା ଲାଗି ରହିବାରୁ ଲୋକମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଗତକାଲି ୨ ସେମି ଯାଏ ବର୍ଷା ରେକର୍ଡ କରାଯାଇଛି। ଫଳରେ ବିଭିନ୍ନ ସ୍ଥାନରେ ପାଣି ଜମି ରହିଛି।
ଏହାକୁ ଦୃଷ୍ଟିରେ ରଖି ତାମିଲନାଡୁର ୨୧ଟି ଜିଲ୍ଲାରେ ଆଜି ସ୍କୁଲ ଓ କଲେଜକୁ ବନ୍ଦ ଘୋଷଣା କରାଯାଇଛି। ସାଲେମ, ଟ୍ରିଚୀ ଓ ଥିରୁଭାନାମାଲ୍ଲାଇରେ କେବଳ ସ୍କୁଲ ବନ୍ଦ ରହିଛି। ଏଠାରେ କଲେଜ ଖୋଲା ରହିଛି।
ଲଗାଣ ବର୍ଷା ଜନିତ ସ୍ଥିତିର ମୁକାବିଲା କରିବାକୁ ଚେନ୍ନାଇ କର୍ପୋରେସନରେ ଗୋଟିଏ ୱାର ରୁମ ପ୍ରସ୍ତୁତ କରାଯାଇଛି। ଯେଉଁଠାରେ ପୌରପାଳିକାର ଅଧିକାରୀମାନେ ରେଡ ଆଲର୍ଟ ଜନିତ ସ୍ଥିତିକୁ ଅନୁଧ୍ୟାନ କରୁଛନ୍ତି। ଆଜି ଥିରୁଭାଲ୍ଲୁର, ଚେନ୍ନାଇ, କାଞ୍ଚୀପୁରମ ଓ ରାଣୀପେଟ୍ଟାଇ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବାର ଆଶଙ୍କା ରହିଛି। ଏହି ସମୟରେ ଘଡ଼ଘଡ଼ି ମଧ୍ୟ ମାରିପାରେ। ସେହିପରି ଥିରୁଭାନାମାଲ୍ଲାଇ, ବିଲ୍ଲୁପୁରମ, କୁଡ୍ଡାଲୋର, ଚେଙ୍ଗାଲପାଟ୍ଟୁ, ଥିରୁପାଟ୍ଟୁର ଓ ଭେଲୋର ଜିଲ୍ଲାର କିଛି ସ୍ଥାନ ପ୍ରବଳ ବର୍ଷା ହୋଇପାରେ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ପୂର୍ବାନୁମାନ କରିଛି।
କେନ୍ଦ୍ର ପକ୍ଷରୁ କୁହାଯାଇଛି ଯେ ବର୍ତ୍ତମାନ ବଙ୍ଗୋପ ସାଗରରେ ଗୋଟିଏ ଲଘୁଚାପ କ୍ଷେତ୍ର ରହିଛି। ଏହା ଆମ ଆଡ଼କୁ ଆସୁଛି। ସେହିପରି ଆରବ ସାଗରରେ ବି ଗୋଟିଏ ଲଘୁଚାପ ରହିଛି। ପୂର୍ବ ଓ ପଶ୍ଚିମରେ ଏପରି ଦୁଇଟି ଲଘୁଚାପ ଯୋଗୁ ପ୍ରବଳରୁ ଅତି ପ୍ରବଳ ବର୍ଷା ହେବାର ଆଶଙ୍କା ରହିଛି।
ସମୁଦ୍ର ଅଶାନ୍ତ ରହୁଥିବାରୁ ମତ୍ସ୍ୟଜୀବୀମାନଙ୍କୁ ଏହା ଭିତରକୁ ଯିବାକୁ ବାରଣ କରାଯାଇଛି। ପାଣିପାଗ କେନ୍ଦ୍ର ଲୋକଙ୍କୁ ଅଯଥାରେ ଘରୁ ନବାହାରିବାକୁ କହିଛି। ସେହିପରି ଲୋକଙ୍କୁ ପର୍ଯ୍ୟାପ୍ତ ପରିମାଣର ପିଇବା ପାଣି ଗଚ୍ଛିତ କରିବାକୁ ମଧ୍ୟ ପରାମର୍ଶ ଦିଆଯାଇଛି।
ନଭେମ୍ବର ୨୧ ଯାଏ ତାମିଲନାଡୁ, ପଡୁଚେରୀ ଓ କରାଇକ୍କଲର ଅଧିକାଂଶ ସ୍ଥାନରେ ବର୍ଷା ଲାଗି ରହିବ ବୋଲି କେନ୍ଦ୍ର ପକ୍ଷରୁ ଆକଳନ କରାଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
