ଅନ୍ତ୍ୟେଷ୍ଟି ବେଳେ ଅଘଟଣ, ଜଳିଗଲେ ୧୧ ଜଣ

ମୁମ୍ବାଇ: ଅନ୍ତ୍ୟେଷ୍ଟି ବେଳେ ଘଟିଲା ଅଘଟଣ। ଶବଦାହ କରାଯାଉଥିବା ନିଆଁରେ ଜଳିଗଲେ ୧୧ ଜଣ। ଏଭଳି ଏକ ଦୁର୍ଘଟଣା ଘଟିଛି ମହାରାଷ୍ଟ୍ର ପୁଣେର ତାଡିବାଲ ରୋଡ ସ୍ଥିତ ଶବଦାହ ଗୃହରେ। ପୂର୍ବରୁ ଜଳୁଥିବା ଚିତା ଉପରେ ପେଟ୍ରୋଲ ଢ଼ାଳିବା ପରେ ନିଆଁ ବ୍ୟାପି ଯାଇଥିଲା। ଏଥିରେ ୧୧ ଜଣଙ୍କ ଗୁରୁତର ହୋଇଛନ୍ତି। ସେମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।

ପୁଲିସ ସୂଚନା ମୁତାବକ, ଶନିବାର ସନ୍ଧ୍ୟାରେ ଏହି ଅଘଟଣ ଘଟିଛି। ୧୧ ଜଣ ଗୁରୁତରଙ୍କ ମଧ୍ୟରୁ କେତେ ଜଣଙ୍କ ଅବସ୍ଥା ସଙ୍କଟାପନ୍ନ ରହିଛି। କଥିତ ରୂପେ ଆତ୍ମହତ୍ୟା କରିଥିବା ଜଣେ ବ୍ୟକ୍ତିଙ୍କ ଶବଦାହ ଗୃହରେ ଅନ୍ତ୍ୟେଷ୍ଟି ଚାଲିଥିଲା। ଏତିକି ବେଳେ ଜଳୁଥିବା ଚିତାରେ କେହି ଜଣେ ପେଟ୍ରୋଲ ଢ଼ାଳି ଦେଇଥିଲେ। ଏହାପରେ ଦେଖୁ ଦେଖୁ ଏହି ନିଆଁ ହଠାତ୍‌ ବ୍ୟାପି ଯାଇଥିଲା। ଏହି ଦୁର୍ଘଟଣା ବେଳେ ଉକ୍ତ ଶବଦାହ ଗୃହରେ ମୃତକଙ୍କ ପରିବାର ଓ ବନ୍ଧୁବାନ୍ଧବଙ୍କୁ ମିଶାଇ ପ୍ରାୟ ୮୦ ଜଣ ଉପସ୍ଥିତ ଥିଲେ।

ସୂଚନା ପାଇ ପୁଲିସ ଘଟଣାସ୍ଥଳରେ ପହଞ୍ଚି ଗୁରୁତରଙ୍କୁ ଉଦ୍ଧାର କରି ସେସନ ଜେନେରାଲ ହସ୍ପିଟାଲ ଏବଂ ସୂର୍ଯ୍ୟ ହସ୍ପିଟାଲରେ ଭର୍ତ୍ତି କରିଛି। ତେବେ ଉକ୍ତ ଘଟଣାର ତଦନ୍ତ ଜାରି ରଖିଛି ପୁଲିସ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।