ନୂଆଦିଲ୍ଲୀ: ଦେଶର ରାଜଧାନୀ ଦିଲ୍ଲୀର ସରାଇ କାଲେ ଖାନ ଅଞ୍ଚଳରେ ଗୋଟିଏ ଅଭାବନୀୟ ଘଟଣା ଘଟିଛି। ଏଠାରେ ନିଜ ପୁରୁଷ ବନ୍ଧୁଙ୍କ ସହ ଅଟୋରେ ଯାଉଥିବା ଜଣେ ଯୁବତୀ ରାସ୍ତାରେ ପଡ଼ି ପ୍ରାଣ ହରାଇଥିବା ଅଭିଯୋଗ ହୋଇଛି। ମୃତ ଯୁବତୀ ଜଣଙ୍କ ହେଉଛନ୍ତି ପରମଜୀତ କୌର। ତାଙ୍କ ଘର ପୂର୍ବ ଦିଲ୍ଲୀର କଲ୍ୟାଣପୁରୀରେ। ପୁଲିସ୍ ଏହି ଘଟଣାରେ ପରମଜୀତଙ୍କ ପୁରୁଷ ବନ୍ଧୁ ହ୍ରିତିକଙ୍କୁ ଅଟକ ରଖି ପଚରାଉଚରା କରୁଛି।
ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ପରମଜୀତ ଓ ହ୍ରିତିକଙ୍କ ମଧ୍ୟରେ ପ୍ରେମ ସମ୍ପର୍କ ରହିଥିଲା। ଆଶାରାମ ଚୌକ ନିକଟରେ ସେମାନେ ଅଟୋରେ ବସିବା ପୂର୍ବରୁ ପରସ୍ପର ସହ ପ୍ରବଳ ପାଟିତୁଣ୍ଡ କରିଥିଲେ। ଏହି ସମୟରେ ପରମଜୀତଙ୍କ ଆଉ ଜଣେ ବନ୍ଧୁ ସିର୍ଦ୍ଧାଥ ସେଠାରେ ପହଞ୍ଚିଥିଲେ। ତେବେ ହ୍ରିତିକି ଓ ପରମଜୀତ ଅଟୋରେ ବସି ଚାଲି ଯାଇଥିଲେ।
ସ୍ଥିତି ଏପରି ହୋଇଥିଲା ଯେ ହ୍ରିତିକ ଅଟୋରେ ବସିବା ପୂର୍ବରୁ ପରମଜୀତଙ୍କୁ ବାରମ୍ବାର ଚାପୁଡ଼ା ମାରିଥିଲେ। ଶେଷରେ ତାଙ୍କୁ ଅଟୋରେ ବସାଇ କଲ୍ୟାଣପୁରୀ ଘରେ ଛାଡ଼ିବା ପାଇଁ ନେଇଥିଲେ। ଅଟୋରେ ଯିବା ସମୟରେ ମଧ୍ୟ ସେ ପରମଜୀତଙ୍କୁ ବାଡ଼େଇଥିଲେ।
ଅଟୋରେ ଯାଉଥିବା ବେଳେ ପରମଜୀତ ରାଗି ଯାଇ ନିଜ ମୋବାଇଲ ଫୋନକୁ ରାସ୍ତାରେ ଫୋପାଡ଼ି ଦେଇଥିଲେ। ହ୍ରିତିକ ଅଟୋକୁ ଅଟକାଇ ରାସ୍ତାରେ ପଡ଼ି ଭାଙ୍ଗି ଯାଇଥିବା ମୋବାଇଲ ଆଣିଥିଲେ ଓ ଉଭୟ ପୁଣି ଅଟୋରେ ବସି ଆଗକୁ ବଢ଼ିଥିଲେ। ଅଟୋଟି ଏନଏଚ୍ ୨୪ ଫ୍ଲାଏ ଓଭର୍ ନିକଟରେ ଥିବା ବେଳେ ହଠାତ୍ ପରମଜୀତ ଏହା ମଧ୍ୟରୁ ଖସି ପଡ଼ିଥିଲେ ବୋଲି ଅଟୋ ଡ୍ରାଇଭର ଶାମସୁ ଅଲୀ ସୂଚନା ଦେଇଛନ୍ତି।
ଘଟଣା ପରେ ସିଦ୍ଧାର୍ଥ ମଧ୍ୟ ସେଠାରେ ପହଞ୍ଚିଥିଲେ। ସେ ହ୍ରିତିକଙ୍କ ସହ ମିଶି ପରମଜୀତଙ୍କୁ ହସ୍ପିଟାଲ ନେଇଥିଲେ ହେଁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୁଲିସ୍ ହ୍ରିତିକଙ୍କୁ ଅଟକ ରଖି ସେ ଅଟୋରୁ ପରମଜୀତଙ୍କୁ ଠେଲିଛନ୍ତି କି ନାହିଁ, ତା’ର ତଦନ୍ତ କରୁଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।