ଏଣିକି କର୍ଣ୍ଣାଟକା ଚାଷୀଙ୍କ ଠାରୁ ସିଧାସଳଖ ଜମି କିଣିପାରିବେ ଶିଳ୍ପସଂସ୍ଥା

ବେଙ୍ଗାଲୁରୁ: ଶିଳ୍ପ ସଂସ୍ଥାଗୁଡ଼ିକ ପାଇଁ ଜମି କିଣାବିକା ନିୟମକୁ ଅଧିକ ସହଜ କରିଛନ୍ତି କର୍ଣ୍ଣାଟକା ସରକାର। ଏଣିକି ଶିଳ୍ପ ସଂସ୍ଥାଗୁଡ଼ିକ ନିଜର ଅଭିବୃଦ୍ଧି ପାଇଁ ସିଧାସଳଖ ଚାଷୀମାନଙ୍କ ଠାରୁ ଜମି କିଣିପାରିବେ। ଏନେଇ କର୍ଣ୍ଣାଟକା ସରକାର ଜମି ସଂସ୍କାର ଆଇନ ୧୯୬୧ରେ ସଂଶୋଧନ କରିଛନ୍ତି।

ପୂର୍ବ ଆଇନ ବଳରେ ଶିଳ୍ପ ସଂସ୍ଥାଗୁଡ଼ିକ କେବଳ ସରକାରୀ ଏଜେନ୍ସି ଦ୍ୱାରା ହିଁ ଚାଷୀଙ୍କ ଠାରୁ ଜମି କିଣି ପାରୁଥିଲେ। ହେଲେ ଏବେ ଆଉ ଏହି କଟକଣା ରହିବ ନାହିଁ। ତଥାପି ଶିଳ୍ପ ସଂସ୍ଥା ଗୁଡ଼ିକ ଜମି କିଣିବା ପୂର୍ବରୁ ରାଜସ୍ୱ ବିଭାଗର ଅନୁମତି ନେବେ।

ଯଦି ଡେପୁଟି କମିଶନର କୌଣସି ରେଡ ସିଗ୍ନାଲ ନ ଦେଖାନ୍ତି ଓ ୩୦ ଦିନ ମଧ୍ୟରେ ଅନୁମତିକୁ ମଞ୍ଜୁର ଦିଅନ୍ତି, ତା’ହେଲେ ଶିଳ୍ପ ସଂସ୍ଥାଗୁଡ଼ିକ ସିଧାସଳଖ ଜମି କିଣିପାରିବେ।

କର୍ଣ୍ଣାଟକା ସରକାର ପ୍ରସ୍ତୁତ କରିଥିବା ଜମି ସଂସ୍କାର ସଂଶୋଧିତ ଆଇନ ୨୦୨୦କୁ ରାଜ୍ୟପାଳଙ୍କ ଅନୁମୋଦନ ମିଳିବା ପରେ ଏନେଇ ବିଜ୍ଞପ୍ତି ପ୍ରକାଶ ପାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।