କାଲିଠାରୁ ଅନ୍ତର୍ଜାତୀୟ ବିମାନ ସେବା, ଏହି ସବୁ ସ୍ଥାନକୁ ଆରମ୍ଭ ହେବ ଉଡ଼ାଣ

ନୂଆଦିଲ୍ଲୀ: କରୋନା ଲକଡାଉନ ପାଇଁ ବନ୍ଦ ରହିଥିବା ଅନ୍ତର୍ଜାତୀୟ ବିମାନ ସେବା ଆସନ୍ତାକାଲି ଠାରୁ ଆରମ୍ଭ ହେବ। ଏନେଇ ଭାରତ ସରକାର ଫ୍ରାନ୍ସ ଓ ଆମେରିକା ସହ ସ୍ୱତନ୍ତ୍ର ଚୁକ୍ତି କରିଛନ୍ତି। ଚୁକ୍ତି ଅନୁୟାୟୀ, କିଛି ନିର୍ଦ୍ଦିଷ୍ଟ ବିମାନକୁ ଯିବା ଆସିବା ପାଇଁ ଅନୁମତି ମିଳିବ।

ଏ ସମ୍ପର୍କରେ ଆଜି ଭାରତର ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂହ ପୁରି ସୂଚନା ଦେଇଛନ୍ତି। ସେ କହିଛନ୍ତି, ଫ୍ରାନ୍ସ ଓ ଆମେରିକା ସହ ହୋଇଥିବା Air Bubbles ଚୁକ୍ତି ଅନୁଯାୟୀ ଆସନ୍ତାକାଲି ଠାରୁ ଅନ୍ତର୍ଜାତୀୟ ବିମାନ ଉଡ଼ିବ। ବ୍ରିଟେନ ଓ ଜର୍ମାନୀ ସହ ମଧ୍ୟ ସମାନ ଧରଣର ଚୁକ୍ତି କରିବାକୁ ପ୍ରସ୍ତୁତ ଚାଲିଛି। ଏହା ଖୁବଶୀଘ୍ର ଶେଷ ହେବ। ବ୍ରିଟେନ ସହ ଚୁକ୍ତି ହେଲେ ଦିଲ୍ଲୀରୁ ଲଣ୍ଡନ ଦୈନିକ ଦୁଇଟି ବିମାନ ଚଳାଚଳ କରିବ ବୋଲି ସେ କହିଛନ୍ତି।

ଆମେରିକାର ବିମାନ କମ୍ପାନୀ ୟୁନାଇଟେଡ ଏୟାର ଲାଇନ୍ସ ଭାରତ ଓ ଆମେରିକା ମଧ୍ୟରେ ୧୮ଟି ବିମାନ ଚଳାଚଳ କରିବ। ଜୁଲାଇ ୧୭ରୁ ଏହା ଆରମ୍ଭ ହୋଇ ୩୧ ତାରିଖ ଯାଏ ଚାଲିବ। ୟୁନାଇଟେଡ୍‌ ଏୟାର ଲାଇନ୍ସ ଦୈନିକ ଦିଲ୍ଲୀରୁ ନ୍ୟୁୟର୍କ ମଧ୍ୟରେ ସେବା ଯୋଗାଇବ। ସେହିପରି ସପ୍ତାହକୁ ୩ଥର ଦିଲ୍ଲୀରୁ ସାନ ଫ୍ରାନ୍ସିକୋ ମଧ୍ୟରେ ବିମାନ ଚାଲିବ।

ସେହିପରି ୧୮ ତାରିଖରୁ ଅଗଷ୍ଟ ୧ ଯାଏ ଏୟାର ଫ୍ରାନ୍ସ ୨୮ଟି ବିମାନ ଚଳାଚଳ କରିବ। ଏଗୁଡ଼ିକ ଦିଲ୍ଲୀ, ମୁମ୍ବାଇ, ବେଙ୍ଗାଲୁରୁ ଓ ପ୍ୟାରିସ୍‌ ମଧ୍ୟରେ ସେବା ଯୋଗାଇ ଦେବ।

Air Bubbles ଚୁକ୍ତି ଦୁଇ ଦେଶ ମଧ୍ୟରେ ହୋଇଥାଏ। ଚୁକ୍ତି ଅନୁଯାୟୀ, ଏକ ନିର୍ଦ୍ଦିଷ୍ଟ କଟକଣା ମଧ୍ୟରେ ଦୁଇ ଦେଶ ମଧ୍ୟରେ ବିମାନ ଚଳାଚଳ କରିଥାଏ। ଜୁଲାଇ ୯ରେ ଭାରତ ସରକାର ୟୁଏସ ସହ Air Bubbles ଚୁକ୍ତି କରିଥିଲେ। ଏହା ଜୁଲାଇ ୧୨ରୁ ୨୬ ଯାଏ କାର୍ଯ୍ୟକ୍ଷମ ରହିବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।