ରାଜକୋଟ: ବର୍ଷା କାରଣରୁ ସିଂହମାନେ ସହର ମୁହାଁ ହେଉଛନ୍ତି। ଜଙ୍ଗଲରେ ଖାଦ୍ୟ ମିଳୁ ନଥିବାରୁ ଶିକାର ସଂଗ୍ରହ କରିବାରେ ବୋଧ ହୁଏ ସେମାନଙ୍କୁ ଅସୁବିଧା ହେଉଛି। ଯାହା ଫଳରେ ସେମାନେ ଜନବସତି ଆଡ଼କୁ ମୁହାଁଇଛନ୍ତି।
ଏହିପରି ଏକ ଭିଡିଓ ଏବେ ଭାଇରାଲ ହେଉଛି। ଯେଉଁଥିରେ ଛଅଟି ସିଂହ ଏକାଠି ହୋଇ ଗୁଜରାଟର ଆମ୍ରେଲି ଫରେଷ୍ଟଠାରୁ ୨୦ ୨୫ କିମି ଦୂର ମୋରଜ ଗାଁ କୁ ପଶି ଆସିଥିବା ଦେଖାଯାଉଛି। ସୋମାନେ ଗାଁ ନିକଟବର୍ତ୍ତୀ ଏକ ବସ୍ ଷ୍ଟାଣ୍ଡ ଭିତରେ ପଶିବା ସହ ସେଠାରେ ଦୀର୍ଘ ସମୟ ବିଶ୍ରାମ ନେଇଥିବା ଦୃଶ୍ୟ କ୍ୟାମେରାରେ କଏଦ ହୋଇଛି। ଖାଲି ସେତିକି ନୁହେଁ, ବସ୍ ଷ୍ଟାଣ୍ଡ ନିକଟରେ ପୂର୍ବରୁ ଶୋଇଥିବା ଗୋଟିଏ ଗଧକୁ ସେମାନେ ଶିକାର ମଧ୍ୟ କରିଛନ୍ତି। ଦୀର୍ଘ ସମୟ ଧରି ସେମାନେ ରାସ୍ତା ଉପରେ ବିଚରଣ କରୁଥିଲେ।
ସେହି ବାଟଦେଇ ଯାଉଥିବା ଜଣେ ବ୍ୟକ୍ତି ଏହି ଭିଡିଓଟିକୁ ଅତି ସତର୍କର ସହ କାର ଭିତରେ ଥାଇ ରେକର୍ଡ କରିଛନ୍ତି । ଯାହା ଏବେ ଭାଇରାଲ ହୋଇଛି ।
ସ୍ଥାନୀୟ ବାସିନ୍ଦାଙ୍କ କହିବା ମୁତାବକ ଏହି ଗାଁ ଏକ ସିଂହ ପ୍ରବଣ ଜଙ୍ଗଲ ପାଖରେ ଅବସ୍ଥିତ ହେଇଥିବାରୁ ପ୍ରାୟ ସମୟରେ ସିଂହମାନେ ଏଠାକୁ ଚାଲି ଆସନ୍ତି। ବନ ବିଭାଗର ହସ୍ତକ୍ଷେପ ପରେ ଏମାନେ ଜଙ୍ଗଲକୁ ଚାଲିଯାଆନ୍ତି। ତେବେ ଏହି ଛଅଟି ସିଂହ ବିଳମ୍ୱିତ ରାତି ଯାଏ ସେହି ଅଞ୍ଚଳରେ ବୁଲାବୁଲି କରୁଥିବା ସେମାନେ କହିଛନ୍ତି।
ଏ ନେଇ ଗ୍ରାମବାସୀ ବନ ବିଭାଗକୁ ଖବର ଦେଇଥିଲେ। ପରେ ବନ ବିଭାଗ ସେଠାରେ ପହଞ୍ଚି ସିଂହ ଗୁଡ଼ିକୁ ଜଙ୍ଗଲକୁ ଘଉଡ଼ାଇଥିବା ଜଣାପଡ଼ିଛି ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।