‘ସରକାରୀ ସ୍କୁଲରେ ପଢ଼ିଥିବା ପିଲାଙ୍କୁ କେବଳ ସରକାରୀ ଚାକିରୀ‘

ରାଞ୍ଚି : ବିବାଦୀୟ ବୟାନ ଦେଇ ଚର୍ଚ୍ଚାରେ ଝାରଖଣ୍ଡର ଶିକ୍ଷା ମନ୍ତ୍ରୀ ଜଗରନାଥ ମହତୋ। ମନ୍ତ୍ରୀ ଶ୍ରୀ ମହତୋ କହିଛିନ୍ତି ଯେ କେବଳ ସରକାରୀ ସ୍କୁଲରେ ପଢ଼ୁଥିବା ଛାତ୍ରଛାତ୍ରୀଙ୍କୁ ହିଁ ସରକାରୀ ଚାକିରୀ ମିଳିବ। ରାଜ୍ୟ ସରକାର ଏ ଦିଗରେ ବାଚାରବିମର୍ଶ କରୁଥିବା ସେ ସୂଚନା ଦେଇଛନ୍ତି।

ସେ କହିଛନ୍ତି ଯେ ଏବେ ଶିକ୍ଷକମାନଙ୍କୁ ଶିକ୍ଷକତା ବ୍ୟତୀତ ଆଉ କୌଣସି ଭିନ୍ନ କାର୍ଯ୍ୟ କରିବାକୁ ଦିଆଯିବ ନାହିଁ। ସେହିପରି ଅନ୍ୟ କାର୍ଯ୍ୟ କରୁଥିବା ଶିକ୍ଷକଙ୍କୁ ଏଥିରୁ ବିରତ କରାଯିବ। ଏହାଦ୍ୱାରା ଶିକ୍ଷକମାନେ ସମ୍ପୂର୍ଣ୍ଣ ଭାବେ ଶିକ୍ଷା ପ୍ରତି ଧ୍ୟାନ ଦେଇପାରିବେ। ସେହିପରି ପିଲାମାନଙ୍କୁ ଗୁରୁତ୍ୱର ସହ ଶିକ୍ଷାଦାନ କରିପାରିବେ ବୋଲି ସେ କହିଛନ୍ତି।

ତେବେ ଶିକ୍ଷାମନ୍ତ୍ରୀଙ୍କ ଏହି ବୟାନକୁ ବିପକ୍ଷ ତ ବିପକ୍ଷ ଖୋଦ୍ ମେଣ୍ଟ ସରକାରରେ ଥିବା ମନ୍ତ୍ରୀମାନେ ମଧ୍ୟ ବିରୋଧ କରିଛନ୍ତି। ମନ୍ତ୍ରୀ ଜଗରନାଥଙ୍କର ଏହି ବୟାନକୁ ନେଇ ଝରଖଣ୍ଡ ରାଜନୀତିରେ ହଙ୍ଗାମା ସୃଷ୍ଟି ହୋଇଛି। କଂଗ୍ରେସରେ ଥାଇ ବି ଜେଏମଏମ ସରକାରରେ ରାଜସ୍ୱ ମନ୍ତ୍ରୀ ହୋଇଥିବା ରାମେଶ୍ୱର ଉରାଂବ କହିଛନ୍ତି, ଶିକ୍ଷାମନ୍ତ୍ରୀ ଦେଇଥିବା ବୟାନ ସମ୍ପୂର୍ଣ୍ଣ ରୂପେ ଅସମ୍ୱିଧାନିକ। ମନ୍ତ୍ରୀଙ୍କର ଏହି ବୟାନ ପ୍ରତିଭାଶାଳୀ ଛାତ୍ରଛାତ୍ରୀଙ୍କୁ ସରକାରୀ ଚାକିରୀ ଠାରୁ ଦୂରେଇ ଦେବ। ଏହାର ବ୍ୟବହାରିକ ରୂପେ ସମ୍ଭବ ନୁହେଁ। ଶିକ୍ଷକଙ୍କୁ ଅନ୍ୟ କାର୍ଯ୍ୟରୁ ନିବୃତ କରିବା ଏକ ସ୍ୱାଗତ ଯୋଗ୍ୟ ପଦକ୍ଷେପ। ଏହା ସରକାରୀ ସ୍କୁଲର ଶିକ୍ଷା ବ୍ୟବସ୍ଥାକୁ ସୁଦୃଢ଼ କରିବ ବୋଲି ସେ କହିଛନ୍ତି।

ଝାରଖଣ୍ଡର ପ୍ରମୁଖ ବିରୋଧୀ ପାର୍ଟି ବିଜେପି ଏହି ବୟାନକୁ ନେଇ ଶିକ୍ଷାମନ୍ତ୍ରୀଙ୍କୁ ଘେରିଛି। ବିଜେପି କହିଛି ଯେ ଏହା ମନ୍ତ୍ରୀଙ୍କ ପିଲାଳିଆମି। ବିଜେପି ବିଧାୟକ ସିପି ସିଂ କହିଛନ୍ତି, ଯଦି ଦମ ଅଛି, ତା’ହେଲେ ଶିକ୍ଷାମନ୍ତ୍ରୀ ଓ ରାଜ୍ୟ ସରକାର ଘରୋଇ ସ୍କୁଲ ଗୁଡ଼ିକୁ ବନ୍ଦକରି ଦେଖାନ୍ତୁ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।