ଆମେରିକା ପରେ ଭାରତକୁ ଆସିଲା ଆଉ ଏକ ଭୟଙ୍କର ରୋଗ

ସୁରତ: ମହାମାରୀ କରୋନା ପାଇଁ ଦୟନୀୟ ସ୍ଥିତିର ସମ୍ମୁଖୀନ ହେଉଥିବା ଭାରତ ପାଇଁ ଚିନ୍ତା ଆହୁରି ବଢ଼ିଛି। ଆମେରିକା ଓ ୟୁରୋପ ପରେ ଆଉ ଗୋଟିଏ ନୂଆ ରୋଗ ଏବେ ଭାରତରେ ଦେଖିବାକୁ ମିଳିଛି। ଗୁଜରାଟର ସୁରତରେ ଜଣେ ଛୋଟ ପିଲାର ଶରୀରରେ ଏହି ମାରାତ୍ମକ ରୋଗର ଲକ୍ଷଣ ଦେଖାଯିବା ପରେ ପୂରା ରାଜ୍ୟବାସୀ ଭୟଭୀତ ହୋଇପଡ଼ିଛନ୍ତି।

ଏହି ନୂଆ ରୋଗର ନାଁ ହେଲା ମଲ୍ଟିସିଷ୍ଟମ ଇନଫ୍ଲାମେଟରୀ ସିଣ୍ଡ୍ରୋମ ବା MIS-C ବୋଲି ଡାକ୍ତରମାନେ କହିଛନ୍ତି। ସୁରତରେ ରହୁଥିବା ଗୋଟିଏ ପରିବାରର ୧୦ ବର୍ଷର ପିଲାର ଶରୀରରେ MIS-C ରୋଗ ଲକ୍ଷଣ ଦେଖାଯାଇଛି। ଭାରତରେ ଏହା ପୂର୍ବରୁ କେବେ ହେଲେ MIS-Cର ଲକ୍ଷଣ କାହାର ବି ଦେଖାଯାଇ ନଥିଲା।

ଆମେରିକା ଓ ୟୁରୋପରେ ଏହା ଦେଖାଯାଇଥାଏ। ଲକ୍ଷଣ ଦେଖାଯିବା ପରେ ପରିବାର ସଦସ୍ୟମାନେ ପିଲାଟିକୁ ହସ୍ପିଟାଲ ନେଇଥିଲେ। ପିଲାଟି ଶରୀରରେ ଜ୍ୱର ରହିଛି। ସେହିପରି ତା’ର ବାନ୍ତି, କାଶ ଓ ଝାଡ଼ା ମଧ୍ୟ ହେଉଛି। ତା’ର ଆଖି ଏବଂ ଓଠ ମଧ୍ୟ ନାଲି ପଡ଼ିଯାଉଛି।

ହସ୍ପିଟାଲରେ ଡାକ୍ତର ଆଶିଷ ପିଲାଟିର ଲକ୍ଷଣ ଦେଖି ଆଶ୍ଚର୍ଯ୍ୟ ହୋଇଥିଲେ। ଏହାପରେ ସେ ସୁରତ ଓ ମୁମ୍ବାଇରେ ଥିବା ଅନ୍ୟ ଡାକ୍ତରମାନଙ୍କ ସହ ଏ ସମ୍ପର୍କରେ ଆଲୋଚନା କରିଥିଲେ। ପାରୀକ୍ଷା ପରେ ଜଣାପଡ଼ିଲା ଯେ ପିଲାଟି MIC-C ରୋଗରେ ଆକ୍ରାନ୍ତ ହୋଇଛି।

ଏହି ମାରତ୍ମାକ ରୋଗରେ ଆକ୍ରାନ୍ତ ହୋଇଥିବା ପିଲାଟିର ପମ୍ପିଂ ମଧ୍ୟ ପାଖାପାଖି ୩୦% ହ୍ରାସ ପାଇଯାଇଥିଲା। ତା’ ଶରୀରର ଶିରା ଗୁଡ଼ିକ ମଧ୍ୟ ଫୁଲିବା ଆରମ୍ଭ କରିଥିଲା। ତେବେ ୭ ଦିନର ଚିକିତ୍ସା ପରେ ପିଲାଟିକୁ ଘରକୁ ପଠାଇ ଦିଆଯାଇଛି। ଡାକ୍ତରମାନେ ଏହି ରୋଗ ସାରା ଦେଶରେ ସଂକ୍ରମିତ ହେବାର ଆଶଙ୍କା ପ୍ରକାଶ କରିଛନ୍ତି। ଏହି ମାରାତ୍ମକ ରୋଗରେ ୩ ବର୍ଷରୁ ୨୦ ବର୍ଷ ମଧ୍ୟରେ ଥିବା ଛୋଟ ପିଲା ଓ କିଶୋରମାନେ ଅଧିକ ଆକ୍ରାନ୍ତ ହେବାର ଆଶଙ୍କା ରହିଛି। କରୋନା ଭଳି ପ୍ରାଥମିକ ପର୍ଯ୍ୟାୟରେ ଏହାକୁ ଚିହ୍ନଟ କରିବା କଷ୍ଟକର। ତେବେ ଲକ୍ଷଣ ଦେଖାଯିବା ମାତ୍ରେ ଏହାର ଚିକିତ୍ସା କଲେ ଏଥିରୁ ଆରୋଗ୍ୟ ମିଳିପାରିବ ବୋଲି ଡାକ୍ତରମାନେ କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।