ନୂଆଦିଲ୍ଲୀ: ସବୁ ଧର୍ମର ଯୁବକ ଓ ଯୁବତୀଙ୍କ ବିବାହର ସର୍ବନିମ୍ନ ବୟସ ସୀମା ୨୧ କରାଯାଉ। ଏ ଭଳି ଦାବି କରି ସୁପ୍ରିମକୋର୍ଟରେ ଆବେଦନ କରାଯାଇଛି। ସୁପ୍ରିମକୋର୍ଟ ଏହାକୁ ଗ୍ରହଣ କରି କେନ୍ଦ୍ର ସରକାରଙ୍କୁ ନୋଟିସ କରିଛନ୍ତି। କେନ୍ଦ୍ର ସରକାର ଏହା ଉପରେ ଜବାବ ରଖିବା ପରେ ଆସନ୍ତା ସପ୍ତାହରେ ମାମଲାର ପରବର୍ତ୍ତୀ ଶୁଣାଣି କରାଯିବ।
ଆବେଦନକାରୀ ଆହୁରି କହିଛନ୍ତି ଯେ ବାହାଘର ବୟସ ୨୧ ବର୍ଷ କରିବାକୁ ରାଜସ୍ଥାନ ଓ ଦିଲ୍ଲୀ ହାଇକୋର୍ଟରେ ହୋଇଥିବା ଆବେଦନଗୁଡ଼ିକୁ ସୁପ୍ରିମକୋର୍ଟକୁ ସ୍ଥାନାନ୍ତର କରାଯାଉ। ଏ ସମ୍ପର୍କରେ ମଧ୍ୟ ଜବାବ ଦେବାକୁ କେନ୍ଦ୍ରକୁ ନୋଟିସରେ କୁହାଯାଇଛି। ବିଭିନ୍ନ କୋର୍ଟରେ ମାମଲାର ଥିବାରୁ ଭିନ୍ନଭିନ୍ନ ରାୟ ଆସିବାର ସମ୍ଭାବନା ରହିଛି। ତେଣୁ ସୁପ୍ରିମକୋର୍ଟ ଏକକାଳୀନ ଏହାର ଶୁଣାଣି କରିବାକୁ ଚାହୁଁଛନ୍ତି। ପ୍ରଧାନ ବିଚାରପତି ଜଷ୍ଟିସ ଏସଏ ବୋବଡେଙ୍କ ନେତୃତ୍ୱରେ ଗଠିତ ଖଣ୍ଡପୀଠ ମାମଲା ଶୁଣାଣି କରି ଏପରି ନୋଟିସ କରିଛନ୍ତି।
ବିଜେପି ନେତା ଅଶ୍ୱିନୀ ଉପାଧ୍ୟାୟ ପୁଅ ଓ ଝିଅଙ୍କ ବିବାହ ବୟସ ୨୧ ବର୍ଷ କରିବାକୁ ଆବେଦନ କରିଛନ୍ତି। ଉପାଧ୍ୟାୟଙ୍କ ଆବେଦନ ଉପରେ ୨୦୧୯ ଅଗଷ୍ଟରେ ଦିଲ୍ଲୀ ହାଇକୋର୍ଟ ଶୁଣାଣି କରି କେନ୍ଦ୍ର ସରକାରଙ୍କୁ ନୋଟିସ କରିଥିଲେ। ରାଜସ୍ଥାନ ହାଇକୋର୍ଟ ମଧ୍ୟ ଏସଂକ୍ରାନ୍ତ ମାମଲାର ଶୁଣାଣି କରି କେନ୍ଦ୍ର ସରକାରଙ୍କୁ ଜବାବ ମାଗିଥିଲେ।
ସୂଚନାଯୋଗ୍ୟ, ବର୍ତ୍ତମାନ ଦେଶରେ ଝିଅଙ୍କ ବିବାହର ସର୍ବନିମ୍ନ ବୟସ ୧୮ ବର୍ଷ ରହିଥିବା ବେଳେ ପୁଅଙ୍କ ବିବାହ ବୟସ ୨୧ ବର୍ଷ ରହିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
