ନୂଆଦିଲ୍ଲୀ: ସର୍ବଦା ପାକିସ୍ତାନ ପାଇଁ ଓକିଲାତି କରୁଥିବା ପଞ୍ଜାବର କଂଗ୍ରେସ ମନ୍ତ୍ରୀ ନବଜୋତ ସିଂହ ସିଦ୍ଧୁ ଏବେ ନୂଆ ଅବତାରରେ ସାମ୍ନାକୁ ଆସିଛନ୍ତି। ସେ ଇସ୍ଲାମିକ ଚିହ୍ନ ଥିବା ଏକ ପଗଡ଼ି ପରିଧାନ କରିଛନ୍ତି।
ଏହି ପଗଡ଼ି ପାକିସ୍ତାନର ଜାତୀୟ ପତାକା ଭଳି ହୋଇଛି। ପାକିସ୍ତାନ ପତାକାରେ ଯେଉଁଭଳି ଗାଢ଼ ସବୁଜ ରଙ୍ଗ ଉପରେ ଅର୍ଦ୍ଧ ଚନ୍ଦ୍ର ରହିଛି, ସିଦ୍ଧୁଙ୍କ ପଗଡ଼ିରେ ମଧ୍ୟ ସେହିଭଳି ଦିଶୁଛି। ଏହି ଫଟୋକୁ ଖଲିସ୍ତାନ ଆତଙ୍କବାଦୀ ଗୋପାଲ ଚାୱଲା ସୋଶାଲ୍ ମିଡିଆରେ ପୋଷ୍ଟ କରିବା ପରେ ବିବାଦ ସୃଷ୍ଟି ହୋଇଛି।
ଗୋପାଲ ଏହି ଫଟୋକୁ ଫେସବୁକରେ ଛାଡ଼ିବା ସହ ଏହା ଭାରତରେ ପହଞ୍ଚିବା ଦରକାର ବୋଲି କହିଛନ୍ତି। ତେବେ ଏହି ଫଟୋ ଅସଲି ନା ଫଟୋଶପ୍ କରାଯାଇଛି, ତାହା ଜଣାପଡ଼ିନାହିଁ।
ଗୋପାଲ ଚାୱଲାର ମୁମ୍ବାଇ ଆକ୍ରମଣ ମାଷ୍ଟରମାଇଣ୍ଡ ହାଫିଜ ସୟିଦ ସହ ସମ୍ପର୍କ ରହିଛି। ତଥାପି ପାକିସ୍ତାନ ସରକାର ତାଙ୍କୁ ନିଜ ଦେଶରେ ଆଶ୍ରୟ ଦେବା ସହ ସବୁ ପ୍ରକାରର ସୁବିଧା ସୁଯୋଗ ଯୋଗାଇ ଦେଉଛନ୍ତି। ପାକିସ୍ତାନ ଶିଖ୍ ଗୁରୁଦ୍ୱାର ପ୍ରବନ୍ଧକର ସାଧାରଣ ସମ୍ପାଦକ ଭାବେ ଗୋପାଲ ଚାୱଲା କାର୍ଯ୍ୟ କରୁଛନ୍ତି।
୨୦୧୮ ନଭେମ୍ବର ମାସରେ କର୍ତ୍ତାରରପୁର କରିଡର ଶିଳାନ୍ୟାସ ବେଳେ ସିଦ୍ଧୁଙ୍କ ସହ ଗୋପାଲଙ୍କୁ ଦେଖିବାକୁ ମିଳିଥିଲା। ଏହାକୁ ନେଇ ଭାରତରେ ବେଶ ରାଜନୀତିକ ହଟଚମଟ ସୃଷ୍ଟି ହୋଇଥିଲା।