ମୋହାଲି: “କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଯଦି ଉତ୍ତର ପ୍ରଦେଶର ଆମେଠିରୁ ହାରିଯିବେ, ତା’ହେଲେ ମୁଁ ରାଜନୀତି ଛାଡ଼ିଦେବି।” ଏଭଳି ବୟାନ ଲୋକସଭା ନିର୍ବାଚନ ପୂର୍ବରୁ ପଞ୍ଜାବ କଂଗ୍ରେସର ମନ୍ତ୍ରୀ ନବଜୋତ ସିଂହ ସିଦ୍ଧୁ ଦେଇଥିଲେ। ଏବେ ରାହୁଲ ଗାନ୍ଧି ଆମେଠିରେ ହାରି ଯାଇଥିବାରୁ ସିଦ୍ଧୁ କେବେ ରାଜନୀତି ଛାଡ଼ିବେ,ତା’କୁ ନେଇ ଚର୍ଚ୍ଚା ଜୋର ଧରିଛି। ଆଜି ମୋହାଲିର ବିଭିନ୍ନ ସ୍ଥାନରେ “ସିଦ୍ଧୁ ଆପଣ କେବେ ରାଜନୀତି ଛାଡ଼ିବେ।
ଏବେ କଥା ରଖିବାର ସମୟ ଆସିଛି। ଆମେ ଆପଣଙ୍କ ନିଷ୍ପତ୍ତିକୁ ଅପେକ୍ଷା କରିଛୁ” ଲେଖାଥିବା ପୋଷ୍ଟର୍ ମରାଯାଇଛି। ଏହି ପୋଷ୍ଟରକୁ ବିଭିନ୍ନ ଲୋକ ଟ୍ୱିଟ୍ରେ ଶେୟାର କରି ସିଦ୍ଧୁଙ୍କୁ ତାଚ୍ଛଲ୍ୟ ମଧ୍ୟ କରିଛନ୍ତି।
ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂହ ଓ ସିଦ୍ଧୁଙ୍କ ମଧ୍ୟରେ ବାକ୍ଯୁଦ୍ଧ ଚାଲିଥିବା ବେଳେ ସିଦ୍ଧୁଙ୍କ ବିରୋଧରେ ଏଭଳି ପୋଷ୍ଟର ଅଭିଯାନ ଘଟଣାକୁ ପୂରା ନୂଆ ମୋଡ଼ ଦେଇଛି।