ନୂଆଦିଲ୍ଲୀ: ମହିଳା ସଶକ୍ତୀକରଣ ଦିଗରେ ପଞ୍ଜାବ ସରକାର ଆଜି ବଡ଼ ନିଷ୍ପତ୍ତି ନେଇଛନ୍ତି। ଏଣିକି ସରକାରୀ ଚାକିରି ମହିଳାଙ୍କ ପାଇଁ ୩୩% ପଦ ସଂରକ୍ଷଣ ହୋଇ ରହିବ। ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂହ ଟ୍ୱିଟ୍ କରି ଏ ସମ୍ପର୍କରେ ସୂଚନା ଦେଇଛନ୍ତି।
ସେ କହିଛନ୍ତି, ଆଜି ପଞ୍ଜାବ ପାଇଁ ଏକ ଐତିହାସିକ ଦିନ। ଆଜି କ୍ୟାବିନେଟରେ ସର୍ବସମ୍ମତିକ୍ରମେ ସରକାରୀ ଚାକିରିରେ ମହିଳାମାନଙ୍କ ପାଇଁ ୩୩% ସଂରକ୍ଷଣ ବ୍ୟବସ୍ଥା କରିବାକୁ ନିଷ୍ପତ୍ତି ହୋଇଛି। ମୋର ଆଶା ଏହି ନିଷ୍ପତ୍ତି ଆମ ଝିଅମାନଙ୍କୁ ଅଧିକ ସଶକ୍ତ କରିବ ଓ ସମାଜରେ ସମାନତା ଦିଗରେ ଏହି ନିଷ୍ପତ୍ତି ସହାୟକ ହେବ।
ଏହି ନିଷ୍ପତ୍ତି ପରେ ପଞ୍ଜାବର ସିଭିଲ ସର୍ଭିସ, ବୋର୍ଡସ ଓ କର୍ପୋରେସନରେ ମହିଳାମାନଙ୍କୁ ୩୩% ସଂରକ୍ଷଣ ମିଳିବ। ପଞ୍ଜାବ ସିଭିଲ ସର୍ଭିସେସ୍ (ମହିଳାଙ୍କ ପାଇଁ ପୋଷ୍ଟର ସଂରକ୍ଷଣ) ନିୟମ, ୨୦୨୦କୁ ଅନୁମୋଦନ ମିଳିଛି। ଏହାଦ୍ୱାରା ମହିଳାମାନଙ୍କୁ ଏହି ସରକାରୀ ପଦବୀରେ ସିଧାସଳଖ ନିଯୁକ୍ତି ମିଳିବ ଓ ସଂରକ୍ଷଣ ବ୍ୟବସ୍ଥା ରହିବ।
ଅମରିନ୍ଦରଙ୍କ କ୍ୟାବିନେଟ ପଞ୍ଜାବ ରାଜ୍ୟ ଭିଜିଲାନ୍ସ କମିଶନ ଅଧ୍ୟାଦେଶ ୨୦୨୦କୁ ରିପ୍ଲେସ କରିବାକୁ ମଞ୍ଜୁରୀ ଦେଇଛି। ଏହି ସବୁ ବିଲ୍ ଆସନ୍ତା ବିଧାନସଭା ଅଧିବେଶନରେ ଉପସ୍ଥାପନ କରାଯିବ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।