ଜୟପୁର: ରାଜସ୍ଥାନର ରାଜନୀତିକ ହଟଚମଟ ଭିତରେ ଗେମ୍ ଚେଞ୍ଜର ସାବ୍ୟସ୍ତ ହେବାକୁ ଥିବା ଭାରତୀୟ ଟ୍ରାଇବାଲ ପାର୍ଟି(ବିଟିପି)ର ଦୁଇ ଜଣ ବିଧାୟକ ଆଜି ସକାଳୁ କଂଗ୍ରେସ ଠାରୁ ସମର୍ଥନ ପ୍ରତ୍ୟାହାର କରି ନେଇଛନ୍ତି। ସଚିନ ପାଇଲଟଙ୍କ ବିଦ୍ରୋହ ଘୋଷଣା ମଧ୍ୟରେ ଦୁଇ ବିଧାୟକଙ୍କ ସମର୍ଥନ ପ୍ରତ୍ୟାହାର କଂଗ୍ରେସ ସରକାରଙ୍କ ପାଇଁ ଆହୁରି ଜଟିଳ ପରିସ୍ଥିତି ସୃଷ୍ଟି କରିଛି।
ଏବେ ଏହି ଦୁଇ ବିଧାୟକଙ୍କ ମଧ୍ୟରୁ ଜଣେ ପଣବନ୍ଦୀ ଭଳି ସ୍ଥିତିର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି। ଏନେଇ ସେ ଏକ ଭିଡିଓ ମଧ୍ୟ ପୋଷ୍ଟ କରିଛନ୍ତି।
ବିଟିପି ବିଧାୟକ ରାଜକୁମାର ରୋଅଟା କହିଛନ୍ତି, “ବର୍ତ୍ତମାନର ସ୍ଥିତିକୁ ଦେଖିଲେ, ଆମେ ପଣବନ୍ଦୀ ହୋଇ ରହିଥିବା ଭଳି ଲାଗୁଛି। ୩ ଦିନ ହେଲାଣି ଆମେ ବିଧାୟକ କ୍ୱାର୍ଟର୍ସରେ ହିଁ ରହି ଆସୁଛୁ। ଅନେକ ଲୋକ ଆସି କହୁଛନ୍ତି, ଆମ ସହ ଆସ, ଆମ ସହ ଆସ। ଆଜି ମୁଁ ମୋ ନିର୍ବାଚନ ମଣ୍ଡଳୀକୁ ଯିବା ବେଳେ ୩ରୁ ୪ଟି ପୁଲିସ୍ କାର୍ ମୋ ପିଛା କରିଥିଲେ।
https://twitter.com/i/status/1282948487378726912
ମୋ ଗାଡ଼ିକୁ ସେମାନେ ଘେରି ଯାଇ ଚାବି ନେଇଯାଇଥିଲେ। ତେଣୁ ମୋତେ ପଣବନ୍ଦୀ ହୋଇ ରହିବା ଭଳି ଲାଗୁଛି। ଏହା ଅଭଦ୍ରଙ୍କ ଭଳି ବ୍ୟବହାର କରିବା ସହ ସମାନ।”
ସୋମବାର ବିଟିପି ମୁଖ୍ୟ ମହେଶ ଭାଇ ବସଭା କହିଥିଲେ ଯେ ବିଧାନସଭା ଆସ୍ଥା ଭୋଟ ବେଳେ ଆମ ଦଳ ନିରପେକ୍ଷ ରହିବ। ଏପରି କି ଆମ ଦଳର ଦୁଇ ବିଧାୟକ କୌଣସି ପ୍ରକାରର ଆସ୍ଥା ଭୋଟରେ ଭାଗ ନେବେନାହିଁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।