ସୁଶାନ୍ତଙ୍କ ମୃତ୍ୟୁର ସିବିଆଇ ତଦନ୍ତ ନିର୍ଦ୍ଦେଶ: ମୁହଁ ଖୋଲିଲେ ରିୟା ଚକ୍ରବର୍ତ୍ତୀ

ନୂଆଦିଲ୍ଲୀ: ବହୁ ଚର୍ଚ୍ଚିତ ବଲିଉଡ ଅଭିନେତା ସୁଶାନ୍ତ ସିଂହ ରାଜପୁତ ମୃତ୍ୟୁ ମାମଲାର ସିବିଆଇ ତଦନ୍ତ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ। ଏହା ସହିତ ବର୍ତ୍ତମାନ ପର୍ଯ୍ୟନ୍ତ ତଦନ୍ତରୁ ମିଳିଥିବା ସମସ୍ତ ପ୍ରମାଣକୁ ସିବିଆଇକୁ ହସ୍ତାନ୍ତର କରିବାକୁ ସର୍ବୋଚ୍ଚ କୋର୍ଟ ମୁମ୍ବାଇ ପୁଲିସ୍‌କୁ କହିଛନ୍ତି।

ତେବେ ଏହି ରାୟ ପରେ ଓକିଲଙ୍କ ଜରିଆରେ ନିଜର ପ୍ରତିକ୍ରିୟା ରଖିଛନ୍ତି ସୁଶାନ୍ତ ସିଂହ ରାଜପୁତଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀ। ରିୟାଙ୍କ ପକ୍ଷରୁ ତାଙ୍କ ଓକିଲ ସତୀଶ ମାନେସିନ୍ଧେ କହିଛନ୍ତି, ମାନ୍ୟବର ସୁପ୍ରିମକୋର୍ଟ ସବୁ କଥାକୁ ବିଚାର କରି ଓ ମୁମ୍ବାଇ ପୁଲିସ୍‌ର ରିପୋର୍ଟକୁ ଆଧାର କରି ସିବିଆଇ ତଦନ୍ତ ନିର୍ଦ୍ଦେଶ ଦେଇଛନ୍ତି।

ରିୟା ଚକ୍ରବର୍ତ୍ତୀ ମଧ୍ୟ ପୂର୍ବରୁ ସିବିଆଇ ତଦନ୍ତ ସପକ୍ଷରେ ମତ ରଖିଥିଲେ। ତେଣୁ କୋର୍ଟ ସମସ୍ତଙ୍କ କଥାକୁ ବିଚାରକୁ ନେଇ ସିବିଆଇ ତଦନ୍ତ ନିର୍ଦ୍ଦେଶ ଦେଇଛନ୍ତି। ସୁଶାନ୍ତଙ୍କ ମୃତ୍ୟୁକୁ ନେଇ ଦୁଇ ରାଜ୍ୟ ମଧ୍ୟରେ ବିବାଦ ସୃଷ୍ଟି ହୋଇଥିଲା। ତେଣୁ ନ୍ୟାୟର ସ୍ୱାର୍ଥ ଦୃଷ୍ଟିରୁ ସୁପ୍ରିମକୋର୍ଟ ଏଭଳି ରାୟ ଦେଇଥିବା ମଧ୍ୟ କହିଛନ୍ତି।

କୋର୍ଟ ଧାରା ୧୪୨ ଅଧୀନରେ ସିବିଆଇ ତଦନ୍ତ ନିର୍ଦ୍ଦେଶ ଦେଇଥିବାରୁ ରିୟା ମଧ୍ୟ ସବୁ ପ୍ରକାରର ସହଯୋଗ କରିବେ। ମୁମ୍ବାଇ ପୁଲିସ୍‌କୁ ସେ ଯେମିତି ସହଯୋଗ କରୁଥିଲେ, ଏବେ ସିବିଆଇକୁ ମଧ୍ୟ ସମାନ ଢଙ୍ଗରେ ସହଯୋଗ କରିବେ। ପ୍ରବର୍ତ୍ତନ ନିର୍ଦ୍ଦେଶାଳୟକୁ ମଧ୍ୟ ରିୟା ତଦନ୍ତରେ ସବୁ ପ୍ରକାରର ସହଯୋଗ କରିଛନ୍ତି।

ସେ ପୂର୍ବରୁ ମଧ୍ୟ ସହଯୋଗ କରିବାକୁ ରାଜି ଥିବା ସମସ୍ତଙ୍କୁ ଜଣାଇ ସାରିଛନ୍ତି। ଯେ କୌଣସି ସଂସ୍ଥା ତଦନ୍ତ କଲେ ମଧ୍ୟ ସତ୍ୟ ସର୍ବଦା ସତ୍ୟ ହୋଇ ରହିବ। ତେଣୁ ଏଥିରେ ବ୍ୟସ୍ତ ହେବାର କିଛି କାରଣ ନାହିଁ ବୋଲି ସେ କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।