ଟିଆରପି ସ୍କାମ: ଗିରଫ ହେଲେ ବାର୍କର ପୂର୍ବତନ ସିଇଓ

ମୁମ୍ବାଇ: ଟିଭି ରେଟିଂ ପଏଣ୍ଟ (ଟିଆରପି) ସ୍କାମରେ ମୁମ୍ବାଇ ପୁଲିସ ଗୁରୁବାର ବାର୍କର ପୂର୍ବତନ ସିଇଓ ପାର୍ଥ ଦାସ୍ତଗୁପ୍ତାଙ୍କୁ ଗିରଫ କରିଛି। ଟିଆରପି ସ୍କାମର ତଦନ୍ତ କରୁଥିବା ମୁମ୍ବାଇ ପୁଲିସ୍‌ ଏହି ଘଟଣାରେ ୧୫ ଜଣଙ୍କୁ ଗିରଫ କରି ସାରିଲାଣି। ଦାସଗୁପ୍ତାଙ୍କୁ ରାଇଗଡ଼ରୁ ଗିରଫ କରିବା ପରେ ପୁଲିସ୍‌ ତାଙ୍କୁ ଥାନାକୁ ଆଣିଥିଲା। ଆଜି ତାଙ୍କୁ କୋର୍ଟରେ ହାଜର କରାଯିବ।

ଗତ ସପ୍ତାହରେ ବାର୍କର ପୂର୍ବତନ ସିଓଓ ରୋମିଲ ରାମଗଡ଼ିଆଙ୍କୁ ମଧ୍ୟ ପୁଲିସ ମୁମ୍ବାଇରୁ ଗିରଫ କରିଥିଲା। ରୋମିଲ କିଛି ନିର୍ଦ୍ଦିଷ୍ଟ ଟିଭି ଚ୍ୟାନେଲକୁ ସେମାନଙ୍କ ଟିଆରପି ବୃଦ୍ଧି କରି ଦେଖାଇବା ପାଇଁ ଗୁପ୍ତ ତଥ୍ୟ ଓ ସୂଚନା ଦେଇଥିବା ଅଭିଯୋଗ ହୋଇଥିଲା। ଜଣେ ପୁଲିସ୍‌ ଅଫିସର କହିଛନ୍ତି ଯେ ତଦନ୍ତକାରୀ ଅଧିକାରୀମାନେ ରୋମିଲ ଓ ARG Outlier Media Private Limitedର ନିର୍ଦ୍ଦେଶକ ଏବଂ ସିଇଓଙ୍କ ମଧ୍ୟରେ ହୋଇଥିବା ଟିଆରପି ସ୍କାମ ସମ୍ପର୍କିତ ହ୍ୱାଟସଆପ୍‌ ଚ୍ୟାଟ୍‌ ମଧ୍ୟ ଠାବ କରିଛନ୍ତି।

ARG Outlier Media Private Limitedର ମାଲିକାନାରେ ରିପବ୍ଲିକ ମିଡିଆ ନେଟୱର୍କ ରହିଛି। ଏହାର ସିଇଓ ବିକାଶ ଖାନଚନ୍ଦାନୀଙ୍କୁ ପୁଲିସ୍‌ ଗତ ମାସରେ ଗିରଫ କରିଥିଲା। ତେବେ ତାଙ୍କୁ ପରବର୍ତ୍ତୀ ଅବସ୍ଥାରେ ଜାମିନ ମିଳିଛି। ସେହିପରି ରିପବ୍ଲିକ ନେଟୱର୍କର ବିତରଣ ମୁଖ୍ୟ ଘନଶ୍ୟାମ ସିଂହ ବି ଗତ ମାସରେ ଗିରଫ ହୋଇଥିଲେ।

ଟିଆରପି ସ୍କାମରେ ମୁମ୍ବାଇ ପୁଲିସ୍‌ ଦାଖଲ କରିଥିବା ଚାର୍ଜଶିଟ୍‌ରେ ରିପବ୍ଲିକ ଟିଭର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ୱାମୀଙ୍କ ନାଁ ରହିଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।