ଜୟପୁର: ଅନ୍ୟର ଜୀବନ ବଞ୍ଚାଇବା ପାଇଁ ନିଜ ମହାନତାର ପରିଚୟ ଦେଇଛନ୍ତି ଜଣେ ମହିଳା ଓ ଜଣେ ପୁରୁଷ। ଉଭୟ କରୋନାରୁ ସୁସ୍ଥ ହେବା ପରେ ନିଜ ସମ୍ପର୍କୀୟଙ୍କ ଜୀବନ ବଞ୍ଚାଇବାକୁ କିଡନୀ ଦାନ କରିଛନ୍ତି। ରାଜସ୍ଥାନର ଦୁଇଟି ସ୍ଥାନରେ ଘଟିଥିବା ଏଭଳି ଘଟଣା ଏବେ ଚାରିଆଡ଼େ ଚର୍ଚ୍ଚାର ବିଷୟ ହୋଇଛି।
ସୂଚନା ଅନୁସାରେ, ୩୦ ବର୍ଷୀୟ ଦୁର୍ଗା ଦେବୀ ଓ ୪୪ ବର୍ଷୀୟ ମହମ୍ମଦ ଆରିଫ କିଡନୀ ରୋଗରେ ପୀଡ଼ିତ ଥିଲେ। ଫଳରେ ଡାକ୍ତର କିଡ୍ନୀ ପ୍ରତିରୋପଣ ପାଇଁ ପରାମର୍ଶ ଦେଇଥିଲେ। ଡୋନର ମଧ୍ୟ ରେଡ୍ଡୀ ହୋଇଥିଲେ। ତେବେ କିଡ୍ନୀ ଦାନ କରିବାକୁ ଥିବା ଲୋକଙ୍କୁ ହଠାତ କରୋନା ହୋଇଯିବାରୁ ସମସ୍ତଙ୍କ ଚିନ୍ତା ବଢ଼ିଥିଲା।
ରାଜସ୍ଥାନର କୋଟାରେ ରହୁଥିବା ଦୁର୍ଗା ଏହି ଖବର ପାଇ ମର୍ମାହତ ହୋଇଥିଲେ। କାରଣ ଦୁର୍ଗା ଦେବୀଙ୍କୁ ତାଙ୍କ ଦିଅର ଧନା ଲାଲ କିଡ୍ନୀ ଦାନ କରିବାର ଥିଲେ ହେଁ ସେ କରୋନାରେ ଆକ୍ରାନ୍ତ ହୋଇଯାଇଥିଲେ। ଦୁର୍ଗାଙ୍କ ସ୍ୱାମୀ ରତ୍ନ ଲାଲ କହିଛନ୍ତି, କିଡ୍ନୀ ପ୍ରତିରୋପଣ ପାଇଁ ଆମେ ୧୭ ତାରିଖରେ ଜୟପୁରରେ ପହଞ୍ଚି ଥିଲୁ। ତେବେ ଶେଷ ମୁହୂର୍ତ୍ତରେ ଜଣାପଡ଼ିଥିଲା ଯେ ମୋ ଭାଇ(ଧନା ଲାଲ) କରୋନରେ ସଂକ୍ରମିତ।
୧୪ ଦିନ ଚିକିତ୍ସିତ ହେବା ପରେ ତା’ ରିପୋର୍ଟ ନେଗେଟିଭ ଆସିଥିଲା। ସେହିପରି ୧୪ ଅଗଷ୍ଟରେ ସେ ପୂରା ସୁସ୍ଥ ହେବା ପରେ କିଡ୍ନୀ ପ୍ରତିରୋପଣ ହୋଇଥିଲା। ଏବେ ଦୁର୍ଗା ଓ ମୋ ଭାଇ ପୂରା ସୁସ୍ଥ ଅଛନ୍ତି।
ଦ୍ୱିତୀୟ ଘଟଣାଟି ସିକର ଠାରେ ଦେଖିବାକୁ ମିଳିଛି। କିଡ୍ନୀ ରୋଗରେ ପୀଡ଼ିତ ଆରିଫଙ୍କ ପତ୍ନୀ ଫିରଦୋସ ତାଙ୍କୁ କିଡ୍ନୀ ଦେବାର ଥିଲା। ହେଲେ ଜୁନ୍ ୨୯ରେ ୩୫ ବର୍ଷୀୟ ଫିରଦୋସ କରୋନାରେ ଆକ୍ରାନ୍ତ ଥିବା ଜଣାପଡ଼ିଥିଲା। ଦୁଇ ମାସ ପରେ କରୋନାରୁ ଫିରଦୋସ ସଂପୂର୍ଣ୍ଣ ସୁସ୍ଥ ହୋଇଥିଲେ। ଏହାପରେ ସେ ନିଜ ସ୍ୱାମୀଙ୍କୁ କିଡନୀ ଦାନ କରି ତାଙ୍କ ଜୀବନ ବଞ୍ଚାଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।